Aya manyanga akorerwa mu Rwanda yatangiye mu kwezi k'ukwakira 1990.

Thomas Sankara Habyalimana

Ingabire Marie Immaculée yari agerageje nubwo akerereweho imyaka 26. Ikibazo cy’ubukungu, ubusambo byahozeho muri APR iyobowe na FPR. Ibyo ndi umuhamya wabyo, nigeze kubohoza imbunda 5 nza nzikoreye tuvuye ku rugamba, uwari unkuriye ambajije iminyago nazanye mwereka imbunda 5, antera icumu ndarisimbuka nari nkiri umusore.

Ntangiye kwibaza icyo nari nzize, mbona ba bakame bari kumutura ibyo kugurisha. Ubwo rero nanjye nahise nca akenge, menya ibikenewe, none igihugu cyose cyasobanukiwe ibikenewe (order kutoka juu).

Baje bashonje bafite umururumba bafite n’ubwoba ko batazabona ibibahaza. Batangira bicana birengagije impanuro abanyarwenya bavuga ko ngo President Museveni yabahaye, abihanangiriza ngo ntibazamere nka wa mugore wavumbuye isoko y’amata mu gitaka, mu gihe cy’inzara, uko abandi bapfa we akajya gusomaho, nyuma agirira mugenzi we impuhwe ajya kumuhaho.

Uwo mugore ngo yamaze guhembuka abwira uriya wahamweretse ati reka tuhasibure dukureho ibi bitaka hazaze menshi asukuye! Barabikoze ya mata ahita akama. Nguko uko urwo rwenya ruvuga ko ngo Museveni yabihanangirije, ngo mukwikunda kwabo ntibazice Rwigyema ngo kuko nibamwica kwaheri na ya mata.

Ibyo rero ntawe utarabibona, ba afande ba kera barabibona aho baririra mu bipangu byabo i Kigali, mu magereza no mu buhungiro n’abishwe batabarika.

Byose bikorerwa muri wa muco Marie Immaculée Ingabire yavugaga wo guhishirana kw’abayobozi. Mwese murabizi ko Gen Kabarebe, yivugiye ko ngo umushinga wo gutera igihugu Rwigyema yari yarawize nabi ngo kuko yajyaga imbere y’ingabo ku rugamba!!! Ubwo rero murumva ko ikibazo ku mugani wa Kabarebe, ni intore izirusha intambwe (Kagame).

Nkuko rero Rwigema yapfuye, inshuti ze zikicwa, n’umuryango we ugashyirwa ku gahato kandi yarayoboye umunsi umwe gusa, ubwo iyo ntore izirusha intambwe, imaze imyaka 26 mu mishinga mibi gusa izirangaje imbere, ibyayo ni ibiki?

Marie Immaculée Ingabire rero umbabarire kukwibutsa ko ubivuze ukererewe ho imyaka myinshi, n’umuti watanze ntuhagije. Ntabwo ikibazo ari ukureba amakosa ya Rutatina, Kayizari, Byabagamba, Rusagara, Karake, Rushema, n’abandi bose ntarondoye batazi ko iyo bwije buri bucye.

Hakenewe gukubura no gukoropa uhereye hejuru cyangwa imbere, nawe ukagenderamo, nk’umunyamuryango wa FPR kandi n’akazi kawe ugakora nabi, wize umushinga nabi, inama watanze ntizakemura iki kibazo.

Thomas Sankara Habyalimana