Akaga karagwira. Inkotanyi zigeze n’aho zifunga ihene umunwa? Ibi ni ibiki?
Umuturage ntakivuga, barica umuturage ntiyemerewe kuvuga , batwara utwe umuturage akanuma, bamukura mu isambu ye, funga kinwa tuu.
None n’udutungo tugufi dutunzwe n’umuturage wo hasi natwo barimo badufunga umunwa kugirango ejo tuzageraho tugahebeba twamagana akarengane gokorerwa banyiratwo.
Mana izi nkotanyi zavuye mu yihe si koko? Yemwe ni ibimanuka byahurudutse muri Himalaya ibyahanutse mu ijuru nibura birangwa n’impumeko yo mu ijuru.
Inkotanyi zigeze n’aho zikanga udutungo kweli? Inka ntizafungwa umunwa kuko zitunzwe n’ibimanuka, nta karengane zibona, zinywa amazi meza, zirara mu rwuri rusukuye. Mu gihe ihene irarana na nyirayo mu karuri, ikaburara, ikabona uburyo nyirayo asangira nayo ibirohwa, iyo hene nigute agatsiko katakwikanga ko umunsi umwe iriya hene izageraho igahebeba yamagana urugomo rukorwa nyirayo?
Nkotanyi rwose murabizi namwe abaturage mwabafunze umunwa, nugize ngo arahagurutse avugire rubanda mukamwangira kwinjira, nonese murabona igisigaye nyine atari utudutungo tuzahaguruka tukamagana aka karengane? Nizo nka zanyu zizageraho zibavemo zamagane ubwo bugome bwanyu mukorera rubanda.
Ntabwo bizaba bibaye ubwa mbere amatungo avuze. Indogobe yaravuze, muri Bibiliya biranditse sinzi niba mujyamubona n’igihe cyo gusoma ibyanditswemo.
Ubwo muri kwanga ko twinjira mu gihugu ngo twegere rubanda dutange umuganda wacu wo kubaka igihugu cyacu amatungo azabavudukana, nubwo mwayaciye ariko duke dusigaye tuzababiza ibyuya dufatanyije n’izo nka zanyu mwubakiye inzuri mu masambu mwambuye rubanda.
Ngaho nimuzifunge iminwa, ntimwibagirwe no gufunga n’iminwa y’inkoko kuko zizabika zinateteze zibamagana.
Mugiye kuba barubebe pe, nako muribo.
Jeanne Mukamurenzi.
