Ibihwihwiswa: ICC/CPI ishobora kuba irimo kugera Perezida Kagame amajanja.

Amakuru agera ku rubuga The Rwandan tutarabonera gihamya ariko turimo gukoraho iperereza, aratumeyesha ko muri iyi minsi bimwe mu bihugu by’ibihangange byashyize igitutu ku mushinjacyaha mukuru w’urukiko mpuzamahanga mpanabyaha (ICC/CPI) rukorera i La Haye mu Buhorandi, Madame Fatou Bensouda ngo atangire amaperereza kuri Perezida Paul Kagame w’u Rwanda ku byaha by’intambara bikomeje kubera mu burasirazuba bwa Congo aho U Rwanda ruregwa gufasha umutwe wa M23 uhanganye na Leta ya Congo.

Nk’uko ayo makuru akomeza abivuga ngo ibyo bihugu by’ibihangange byafashe icyo cyemezo nyuma y’aho byihanangirije Perezida Kagame inshuro nyinshi bimusaba kureka gufasha M23 no gukoresha ingufu ze ngo ayisese kuko n’ubundi ni nk’aho ariwe wayishinze, ariko Perezida Kagame agakomeza kunangira no guhakana avuga ko ntaho ahuriye na M23, ariko bamwereka ibimenyetso akabitura uburakari n’agasuzuguro.

Igishimangira ayo makuru n’uko muri iyi minsi Perezida Kagame yibasiye ubutabera mpuzamahanga, hari benshi bakomeje gukeka ko avugira Bosco Ntaganda ushakishwa n’urukiko mpuzamahanga mpanabyaha (ICC/CPI), ariko ababikurikiranira hafi siko babibona. Ahubwo babona ari Perezida Kagame n’ibyegera bye bya hafi bugarijwe n’urwo rukiko uretse ko nyine n’ifatwa rya Bosco Ntaganda, Perezida Kagame ataryifuza kuko Bosco Ntaganda azi byinshi bishobora kugwa nabi Leta ya Perezida Kagame biramutse bigiye ahagaragara.

Muri iyi minsi Perezida Kagame yavuze kenshi ko ubutabera mpuzamahanga budakora neza, bwashyiriweho abanyafurika gusa, ndetse yongeraho ko aho kureba ukuri bwivanga muri politiki. Iyo habayeho isesengura umuntu akareba ibihano byo guhagarikira imfashanyo u Rwanda kubera ikibazo cya Congo umuntu abona ibi bishobora kuba biganisha kubyabaye kuri Perezida wa Sudani, Omar Hassan Ahmad Al-Bashir,niba Leta y’u Rwanda iyobowe na Perezida Kagame idashatse umuti w’iki kibazo mu maguru mashya.

Ibi bisa nk’aho bigaragazwa n’ibyo Perezida Kagame amaze iminsi atangaza ku bijyanye n’ubutabera mpuzamahanga.

Twatanga urugero:

-Mu nama y’Inteko Rusange y’Umuryango w’Abibumbye yiga ku buyobozi bugendeye ku mategeko (rule of law) yabaye tariki 24/09/2012, Perezida Kagame yavuze ko ubutabera mpuzamahanga bwabaye igikangisho ku bihugu bicyennye aho kuba ubutabera bwunga abanyagihugu n’ubutabera mpuzamahanga. Mu ijambo yagejeje ku bitabiriye iyo nama, Perezida Kagame yavuze ko icyitwa ubutabera mpuzamahanga ngo gikoreshwa mu nyungu z’ibihugu bimwe bigendeye kuri politiki aho kubahiriza amahame avuga ko abantu bareshya imbere y’amategeko. Ngo amategeko mpuzamahanga akoreshwa bitewe n’uwo akorerwaho, kuko hari abo abera. Ngo kugirango ayo mategeko agire agaciro, Perezida Kagame asaba ko ngo ibihugu byose byareshya imbere y’amategeko kandi akagendera ku kuri hatabaye kuvangura ibihugu.

-Mu ijambo Perezida Paul Kagame yavuze atangiza ku mugaragaro umwaka w’ubucamanza wa 2012-2013 kuri uyu wa Kane ku itariki ya 4 Ukwakira 2012, yanenze cyane ubutabera mpuzamahanga ngo bubangamira Afurika mu iterambere. Perezida Kagame yavuze ko ubwo butabera budahwema kwibasira Afurika avuga ko butera imbere bushaka kugena uko ibihugu by’Afurika bibaho. Yangeyeho ati “Ubutabera mpuzamahanga iyo bugeze muri Afurika, no mu Rwanda ntabwo wamenya niba ari ubutabera cyangwa ari politiki. Ubutabera n’ubucamanza mpuzamahanga butera imbere bugena uko ibihugu by’Afurika bikwiriye kubaho. Bumva bayobora Abanyafurika aho bashaka bakoresheje ubutabera n’inkunga.”

Kuba Omar Hassan Ahmad Al-Bashir, Perezida wa Sudan adafatwa n’uko igihugu cye gikize cyane kubera Peteroli gicukura kikaba gicuditse n’ibihugu by’ibihangane nk’ubushinwa kubera ubwo bukungu, ntawamenya rero niba Perezida Kagame nawe hari abamufiteho inyungu nyinshi zatuma bamukingira ikibaba cyane cyane mu gihe yaba adafite Congo neza mu ntoki ze ngo abashaka ubukungu bwayo bamuceho.

Ubwanditsi