ISHYANO : NYIRARUGANZU NYIRARUMAGA NGO AKURE BIKIRA MARIYA KU NTEBE!

KAGAME NA FPR YE BIYEMEJE KUBA IMANA MU RWANDA BASIRIBANGA KILIZIYA, NDETSE BATI SI BIKIRAMARIYA NYINA WA JAMBO AHUBWO NI NYIRARUGANZU NYIRARUMAGA WABONEKEYE I KIBEHO

Burya koko ngo urwishigishiye ararusoma, kandi ngo akabi gasekwa nk’akeza. Ibi tubona abakuriye kiriziya y’u Rwanda nibo babihaye icyuho.

Umwami Rudahigwa yaragije u Rwanda Kirisitu Umwami, Perezida Habyarimana yaragije u Rwanda Bikiramariya Nyina wa Jambo, none turuzi Perezida Kagame we ashaka kuruhubuza mu biganza bya Yezu na Bikiramariya akarwihera Nyirarumaga Nyiraruganzu ! Aranakataje rero ntimugire ngo arakina, icyo apfa na Yezu na Bikiramariya nicyo atabwira abanyarwanda.

Uyu Nyirashyano ushaka kuvanaho Bikiramariya ubundi ni muntu ki, ese ingoma ya Ruganzu yabaye Ngoma ki (atubabarire ntacyo dupfa nawe ahubwo abashaka gukorera coup d’etat Bikiramariya nibo baduteye kumubona dutya. Barashaka gukora nk’ibyo ku rucunshu ahari )? yaranzwe n’iki ? Ruganzu ubwe yapfuye ate? n’ingabo ze zamurindaga zashize zite nk’izihanzweho n’amadayimoni ? Abatazi amateka bayabaze neza uko byagendekeye izo ngabo, kuko shitani itihishira. Ruganzu yarihanukiriye ati : « Ingoma idahoora iba ari igicuma ! ». Arigisha vengeance ubwo akaba yarayitojwe. Ibyo sibyo Yezu na Bikiramariya badushishikariza.

Dore bijya kuzamba abasenyeri, abapadiri n’ababikira babayemo ibice bibiri ariko byose bihuriza hamwe guhuhura Kiliziya y’u Rwanda no guha imbaraga umwishi wayo akaba n’uwa rubanda rw’abanyagihugu.

Byumvikane ko barimo abatarabyemeye bakaguma ku isezerano ryabo, maze bakicwa, abandi bagahutazwa, abandi bagafungwa, abandi bagahunga, abandi bakambikwa ibisebo, abandi bagahatirwa kwegura cyangwa se bagateshwa umutwe ngo bigizweyo, … Aba ntitubatindaho muri iyi nyandiko kuko urugero batanze ni rwiza kandi akababaro kabo n’akabandi banyarwanda benshi Imana irakazi. Mu bahotowe cyangwa se ababujijwe uburenganzira bwo kwivuza na DMI/FPR kuko batari agati gakozwa mu mwanda, kuko baharaniye kwiyubaha no kubaha Imana n’abantu harimo : musenyeri Focas Nikwigize, musenyeri Sibomana (kinyamateka), musenyeri Mubirigi F., Padiri Kayumba (groupe sc. Butare), … barimo abahutu n’abatutsi kandi ni benshi cyane ntitwabarondora ngo tubarangize, barishwe kiliziya nyarwanda iryumaho ngo ititeranya kubera bya bice bibiri twavuze tugiye kugarukaho hasi aha. Ntitwirirwa twibutsa ko mbere y’aba Kiliziya y’u Rwanda yaciwe umutwe ubwo abayikuriye bahotorwaga bunyamaswa i Gakurazo. Abakuru ba Kiliziya nabwo bararuciye bararumira, habe no kurega ingabo n’umutwe wa politiki byabishe mu nkiko, habe no gusaba abakirisitu kubyamagana ku mugaragaro. Icyakurikiyeho ni ukwica uruhongohongo n’abandi uko imyaka igenda ihita indi igataha.

Mu bice bibiri by’abihaye Imana twavuze rero byonkeje ishyano harimo : Igice kimwe kigizwe n’abihayimana b’abatutsi biyumvise mu bwoko cyane maze bakivana ku Mana bakisenyera muri FPR buhumyi bazi ngo bashyitse mu nstinzi babaye intyoza mu bandi bazi gusangira ku by’ingoma. Ingero ni nyinshi mu basenyeri, abapadiri, ababikira, abafurere, … Ikindi gice kigizwe n’abihayimana b’abahutu biyumvise mu bwoba cyane maze bakivana ku Mana bakisenyera munsi y‘ibirenge bya FPR buhumyi ngo babe abanyarwanda b’inyaryenge muri bwa bucakura bwo kwirinda kubaha Imana ngo uko zimye niko zitambirwa maze hakabaho guha urubuga ishyano ryaguye.

Iyi myitwarire yatumye Kiliziya y’u Rwanda ijegajega ku mpamvu nyinshi, ariko twavuga nk’eshatu gusa mu zindi :

  • Impamvu ya mbere : Abihayimana bagiranye, hagati yabo, imibanire mibi cyane, bishingiye ku moko, ndetse bikagera n’aho bamwe bashinja abandi ibinyoma cyangwa se bagambanira abihaye Imana bagenzi babo ngo bicwe cyangwa basuzuguzwe ;
  • Impamvu ya kabiri : bamwe binjiye ishyamba ry’Intore bigira intore za FPR biyemeza kuyikorera buhumyi, maze bahabwa amabwiriza, baba biyemeje kubangikanya Imana na Mamo. Ingaruka zikaba zose;
  • Impamvu ya gatatu : Vatikani yagiye itseta ibirenge kubera kwirinda kwiteranya na ba mpatsibihugu bimitse umwicanyi mu Rwanda, na ruswa yatangwaga ikora akazi kayo. Vatikani isa n’itegereje ko amerika na Kanada n’ubwongereza batanga « go ahead » ko ubwicanyi bwa FPR bukurikiranwa maze ikabona kuvuga akayiri ku mutima. Nayo business z’ibi bihangange bibangamira « justice internationale » mu nyungu za Kagame, ntiziyigwa nabi, ubanza ibonaho aka cumi.

Ikibabaje, aho gusaba abahotozi kwaka imbabazi z’abasenyeri n’abanyarwanda bishe, ahubwo leta y’abahotozi yasabye Kiliziya ngo gusaba imbabazi. Ni uko za ntore zabo (burya intore y’umuhotozi nayo iba yabaye nk’umuhotozi direct ou indirect !), zigwiriye muri Kiliziya zikikiriza cyangwa se zikarya iminwa kubera igihango cya kabiri zarahiriye : gusezerana imbere y’Imana hanyuma ukarengaho ukanasezerana n’uwahotoye abashumba ba Kiliziya y’Imana kuzamukorera buhumyi. Abandi nabo ubwoba ntibutume bavuga, bakoma amashyi gusa cyangwa se bakaryumaho bakemera ibije byose, kandi ataricyo gikwiye.

Leta iti « twiyamye kiliziya » abihayimana bati « uvuze neza mwidishyi », ni uko bagakoma yombi ngo bakomeze bibereho biteranya n’Imana.

None amazi atangiye kubarengera no kurengana inkombe kiliziya aho Kagame atangiye kuyibwira, abinyujije mu bo akura umutima, ko atari Bikiramariya ahubwo ari Nyiraruganzu II Nyirarumaga  wabonekeye i Kibeho.

Ubu ejobundi bazatubwira ngo icyo gihe cya cyera cya Nyiraruganzu hahanuwe ko hazaza Mesiya umutabazi ariwe Kagame ubungubu. Ntitubigire ibikino kuko uyu mugabo ntacyo agitinya kuva aho yimeje gusuzugura Imana mu guhotora abashumba bayo ntagire inkurikizi y’ako kanya. Twibuke ko ejobundi muri america yabwiye umunyamakuru n’abariho bamwumva ko u Rwanda rutari rukiriho mu myaka makumyabiri n’itatu ishize, ubwo yavugaga mu wa 1994, mbese ko ariwe waruremye bundi bushya. Urwo Imana yaremye rwavuyeho, ubu dufite urwaremwe na Kagame ! Mbese ni Umuremyi nk’Imana nyirijuru ! Twibuke ibinezaneza byamusagaga hose iyo abashinyaguzi b’intore z’inkomamashyi n’abasaza rukukuri barimo n’abayoboye za kaminuza, bamubwiraga ngo Uri Yezu, uri murumuna w’Imana, uri murumuna wa Yezu, uri Messiya, iyo tukubonye tubona uri Imana gusa, ni we Mana   (Ndandambara …). Ibi ni ukwigerezaho kandi Kagame ashatse yagabanya aya marere, kuko Imbaraga zizamuhutaza si iziraswa na katiyusha, ni Ububasha butabonekera amaso asanzwe !  NI inama tumugira, ayumvise yakira kandi niba adashaka kuyumva, nakataze. Niyubahe Imana yicishe bugufi, naho nashaka Intebe y’Imana n’intebe y’umuntu azayibura nabi cyane. Guhanantura Imana ku ntebe ntazabibasha, kuko amarira amaze gutuma ashoka nk’imigezi mu bana b’Imana amaze kuba menshi cyane.

Kagame arashaka kuzitwa Umuremyi waremye u Rwanda. Nyirarumaga aho bukera nawe azasimbuzwa Umwegakazi Kanjogera cyangwa Umwegakazi Nyiramongi Nyiramavugo, maze rubure gica ! Urubanza ruzace Imana yonyine kuko ariyo ifite ijambo rya nyuma! Cyangwa se ababangikanye bajye bavuga ko Nyiramongi, Nyirarumaga na Kanjogera aribo ba nyina w’Imana yaremye u Rwanda ariyo Kagame Pawulo ! wow !!!  birabe ibyuya ! Muri make Kagame aravuga ko yasanze urwanda rutariho we akarurema ! Sinzi niba nawe ubwe aba yumva ibyo avuga neza. None ko rutariho yari mu biki ? yarwaniraga iki kitariho ? bite bye ? Twongere twibuke ko Kagame yahanantuye inzibutso ndangamurage zikomeye mu gihugu, ibyo abantu bibukiragaho amateka n’imitsindo, hamwe yitwaje imirimo y’amashanyarazi, ahandi kubaka imihanda n’ibindi, kandi yagacishije amayira ahandi. Ibyo byose ni ukuvanaho u Rwanda. Ubundi ibiriho byose mu Rwanda bikazaba ariwe byitirirwa, mu byifuzo bye.

Ibi birasa n’ibintu byateguwe cyera, ubu abanyarwanda bagomba kuba bamaze igihe bategurirwa gukorerwa « brain-washing » cyangwa se « lavage de cerveau » bakavanwamo Bikiramariya bagacengezwamo Nyirarumaga, bakavanwamo Yezu bagacengezwamo Kagame. Amateka arahimbwa andi akavanwaho, ubundi abakoma amashyi bakayakoma. Ariko gutuka Roho Mutagatifu uwashaka yabyirinda. Iyi ni inama.

Abazimyiza imoso cyane ni abasenyeri n’ab’ihayimana bihaye kwiyibagiza isezerano ryabo, bagatwarwa n’ububwa n’ubuswa. N’ubwoba. N’ivanguramoko, n’umutima muke, bakirundurira mu kuzimu kwa Kagame na FPR, none bakaba bagiye kwisanga bagaraguzwa agati mu rwondo rw’Imanza zo kubatesha agaciro, ndetse no guhatirwa kwihakana no guhakana « Uwo Bemeye » ngo bamamaze Nyirarumaga! Bakiyibagiza ko abashumba n’abihayimana na cyera na kare mbere yabo, mu bihe by’itotezwa rya Kiliziya, banze kuruca ngo barumire bamwe bakicwa bakitwa aba martyrabandi bakihambira ku Mana nyirijuru aho kwiyomeka kuli satani nyirukuzimu n’abagotewe mu bikorwa byayo. Aba basenyeri n’abihayimana bagombye kuba bakangurira Kagame na FPR kugandukira Imana no kureka kwica no go kureka kwigerezaho batoteza kiliziya y’Imana, kandi bakabigira ku mugaragaro bashikamye bashize amanga.

Amaherezo, Site ya kibeho izavanwaho isigare ari indaro yo guterekeramo uyu Nyabingi mushya Kagame yadukanye! Niho bigana, kandi ibi bizaba bitesheje agaciro Kiliziya gatulika y’Urwanda cyane. Nibyo byifuzwa. Hakazasigara ya madini n’aba pasitori bajya gufata amabwiriza n’impamba mu Bunyamabanga bukuru bwa FPR, bakigisha ibyo barahiriye, uwanzi akajyanwa mu ibagiro, akanigwa cyangwa se akarogwa.

Banyarwanda nimucyo dusengere ikigihugu cyacu.

Nyagasani natabare

Bamara

Loading...

LEAVE A REPLY