Natangajwe cyane n’imvugo y’amanyanga no gukina abanyarwanda ku mu byimba, yavuzwe na perezida Paul Kagame ubwo yatahaga ibigega bye bihunika peteroli yujuje i Rusororo.
Ubusanzwe mu kinyarwanda kubaka ikigega ukacyuzuza imyaka ni ikimenyetso kidasubirwaho cy’ubukungu ugitashye aba ashaka kwereka abandi. Bigaragaza ko wejeje byinshi, ukagira ibyo urya n’ibyo uhunika uzarya mu gihe abandi bazaba batangiye gusonza. Cyakora guhamagara rubanda, uzi neza ko rwicira isazi ku jisho, ukarumurikira ibigega byawe, utari bubahe, ni agashinyaguro kadakwiriye umukuru w’igihugu.
Ngibyo ibyo perezida Paul Kagame yashatse gukorera abanyarwanda, ubwo yamurikaga ibigega bye ahunitsemo peteroli agaragiwe n’umurinzi wabyo ariwe Gatera Egide. Mu minsi iri mbere mwitege igiciro iyo peteroli izajya itangwaho!
Nk’uko asanzwe, mu mvugo ye yuzuye ubwirasi no kwishongora, perezida Paul Kagame yaboneyeho kubwira abanyarwanda akababaro yatewe no kumva ko ngo abanyamahanga baherutse mu nama i Kigali batashye badahaze.
Iyo nama yari ifite insanganyamatsiko igira iti:“Guhuza umutungo w’Afurika hifashishijwe ikoranabuhanga rigezweho”, ikaba yarabaye kuva ku wa 11-13 Gicurasi!
Paul Kagame yagize ati:“Ibintu byose mu Rwanda ni byiza,baranezerewe pe! Ariko hari ikintu kimwe: ntabwo barya ngo bahage! Ukajya muri hoteli ukicara bakazana isahane ingana itya,bagashyiraho akantu kamwe iruhande bagashyiraho n’akarabyo,warangiza ukishyura ugahaguruka ukagenda! Icyo ngicyo barakinenze!”
Nawe ngaho iyumvire umukuru w’igihugu aho kubabazwa n’imbaga y’abanyarwanda, bishwe n’inzara yiswe Nzaramba, ngo ababajwe n’abagashize b’abanyamahanga, baje koko bakabura icyo barya, ariko nibura bizeye kuzarya bageze iwabo.
None se perezida Kagame aragirango bahazwe n’iki mu gihe n’abenegihugu bakibuze. Bari kubona icyo kurya bate mu gihe aho yubatse ibigega, yahirukanye abahinzi ku ngufu, kandi bari bahafite imirima myiza, yatumaga bagemurira amahoteli ya Kigali.
Babona ibyo barya bate, mu gihe ibishanga byose abaturage bahingagamo babinyazwe, bikagabirwa abambari b’ingoma y’abagashize.
None ngo inyama zitekerwa muri za hoteli I Kigali zituruka mu mahanga. Inyama zaturuka he mu Rwanda mu gihe imibande abaturage baragiragamo amatungo bayinyazwe!
Nk’uko bisanzwe leta ya Kigali ibabajwe n’uko ngo abanyamahanga batashye badasingiza Paul Kagame! Kuvugwa neza nicyo kimubabaje, aho yababajwe n’abaturage bamazwe n’inzara bakaba basiganwa basuhuka.
Ngo ababajwe n’uko umunyamahanga ucumbitse muri hoteli y’inyenyeli eshanu, akaba arya gatatu ku munsi isahani ye itasenderejwe, mu gihe imbehe z’abanyarwanda ziriho ubusa. Barifuza kurya nibura rimwe ku munsi bakabibura, bakagera aho basuhuka bahunga inzara. Icyo si ikibazo kuri Kagame, mu gihe iwe buzuza amasahani, bakarya bakamena ibisigaye. Ntiwakumva na rimwe avuga ko abanyarwanda bashonje mu gihe abana b’abanyarwanda bagera kuri 40% barwaye bwaki! Ngo icyangombwa ni uko bakomeza kumuririmba, bagashenguka bashira kuko intore ntiganya.
Ubutegetsi bw’igitugu bwose bwifuza ko buririmbwa na bose kandi igihe cyose butitaye ku mibereho y’abaturage. Bwifuza guhora bubeshywa ko bukora ibyiza gusa. Ibi birarambiranye. Ni ngombwa ko abanyarwanda bahabwa urubuga rwo kuvugiramo akababaro kabo, ntibategereze kuvugirwa n’abanyamahanga.
Ni ngombwa kuvanaho ubutegetsi bwicisha abantu inzara, bwarangiza bukabafata ku munwa bubabuza gutaka no gutabaza. Duhagurukire rimwe tuburwanye. Turwanye akarengane mu banyarwanda.
Isaba Jeannette,
RNC Belgique
