Umusirikare wa Uganda yishe abantu barindwi, harimo abana batatu, ubwo yarasaga mu bantu ikivunga mu nkambi ya gisirikare iri ku murwa mukuru Kampala.
Uwo musirikare, Sgt Isaac Obua, nawe yaje kuraswa.
Umukuru w’urwego rw’igipolisi rwo mu gisirikare, Major Edward Birungi yavuze ko Sergent Obua yaba yari yagiranye ibibazo n’umugore we.
Bivugwa ko yari yanyoye, nyuma atangira kurasa igihe yariho ashaka umugore we, we akaba yashoboye kwihisha.
Uretse abana batatu bishwe, Sgt Obua yishe umusirikare w’umugore, n’abandi bagore batatu b’abasirikare.
Abandi babiri bivugwa ko bakomerekeye muri uko kuraswa kwabereye mu nkambi ya Makindye mu majyepfo ya Kampala.
Umuvugizi w’igisirikare cya Uganda Lt Col Paddy Ankunda yavuze ko bose bifatanije mu kababaro n’imiryango y’abo bantu bishwe na Obua.
Umunyamakuru wa BBC, Patience Atuhaire ari i Kampala avuga ko hamaze kuba kenshi ibintu nk’ibyo muri Uganda, aho umusirikare arasa mu bantu.
Mu kwezi gushize, abantu batatu barishwe abandi batandatu barakomereka, mu bunywero, barashwe n’umusirikare.
No mu 2014, umusirikare yashe abantu 10, abarasiye mu bunywero na none.
BBC Gahuza Miryango
