Ni impirimbanyi y\u2019uburenganzira bw\u2019ikiremwamuntu, yabitangiye kera kuko abimazemo imyaka hafi mirongo itatu. Yitwa Yozefu Matata. Ni we muhuzabikorwa w\u2019ikigo giharanira kurwanya umuco wo kudahana no kurenganya mu Rwanda, CLIIR (Centre de lutte contre l\u2019impunit\u00e9 et l\u2019injustice au Rwanda). Iri shyirahamwe ryashinzwe kuwa 18 Kanama 1995. Riharanira uburenganzira bw\u2019ikiremwamuntu, ryamaganira kure akarengane ako ari ko kose kagirirwa abanyarwanda, rigatabariza abarengana bose ritavanguye, ahubwo rishingiye ku kuri. Ibi ni Matata ubwe ubisobanura nk\u2019uko tunabisanga mu kiganiro kiri ku mpera z\u2019iyi nyandiko.<\/p>\n
Ubusanzwe, kimwe mu bigomba kuranga imiryango itegamiye kuri Leta (urugero nk\u2019iharanira uburenganzira bwa muntu ndetse n\u2019itangazamakuru), ni ugushyira imbere inyungu rusange. Kwirinda guteshuka cyangwa guta indangagaciro bitewe n\u2019ihinduka ry\u2019ubutegetsi, cyangwa kubera amaramuko. Yozefu Matata avuga ko nta cyatuma ateshuka ku migambi y\u2019iri shyirahamwe bitewe no kurambagizwa n\u2019ibikomerezwa n\u2019abanyabubasha bashukisha ba mutimamuke amafaranga n\u2019imyanya mu butegetsi.<\/p>\n
Mu kwezi k\u2019Ukwakira 1990, Yozefu Matata yafunzwe mu bakekwaga no mu bagerekwagwaho kuba ibyitso by\u2019Inkotanyi zari zagabye ibitero, zitangiza intambara. Uyu mugabo w\u2019inararibonye azi ingaruka z\u2019akababaro, akarengane, no gufungirwa ubusa. Matata yemeza ko ibyo byamuhaye kumenya kurushaho ukuntu urengana aba akwiye kugira abaharanira ko yarenganurwa.<\/p>\n
Yozefu Matata avuga ko yakoze ubushakashatsi kuri jenoside n\u2019ibikorwa bitandukanye by\u2019ubugizibwanabi byakoze ku banyarwanda imbere no hanze y\u2019igihugu. Yemeza ko afite amakuru menshi ashingiye ku bimenyetso byuzuye. Mu w\u20191991 amaze gufungurwa yakoreye umuryango nyarwanda uharanira kurengera uburenganzira bwa muntu ARDHO (Association rwandaise de d\u00e9fense des droits de l\u2019homme). Yaje kuwubera umunyamabanga uhoraho. Nyuma afatanyije n\u2019abandi bashinga urugaga rw\u2019amashyirahamwe nyarwanda aharanira uburenganzira bw\u2019ikiremwamuntu, CLADHO (Collectif de ligues et associations rwandaises de d\u00e9fense des droits de l\u2019homme). Iyi mpuzamashyirahamwe ni yo yasabye iperereza mpuzamahanga ku bikorwa by\u2019ubugizi bwa nabi n\u2019ubwicanyi bwakozwe kuva ku itariki ya 01\/10\/1990. Ibyavuye muri iryo perereza bishyirwa ahagaragara tariki ya 23\u00a0Mutarama 1993, byerekana ubwicanyi bwakorewe abatutsi, ariko icyo gihe abakoze iperereza bavuga ko ubwicanyi bwakorewe abahutu byabagoye kurikora binononsoye mu gace kari karafashwe n\u2019inkotanyi ngo kuko bitari byoroshye kukinjiramo.<\/p>\n
Yozefu Matata avuga ko yatotejwe bikomeye n\u2019ubutegetsi bwa mbere ya 94 azira kugaragaza akarengane kakorerwaga abatutsi. Aho FPR ifatiye ubutegetsi, ntiyahagaritse ibikorwa byo guharanira uburenganzira bwa muntu.\u00a0Matata avuga ko yazengurutse hirya no hino mu Rwanda abona uburyo jenoside yakozwe. Ubuhamya bumwereka uko interahamwe na bamwe mu basirikare b\u2019icyo gihe bishe abaturage. Mu iperereza kandi yari yatangiye no gucukumbura ukuntu ingabo za APR zishe inzirakarengane. Avuga ko, ibi byamuviriyemo gutotezwa, abonye agerwa amajanja, arahunga. Ubu atuye mu Bubiligi. Aracyaharanira kurengera uburenganzira bwa muntu.<\/p>\n
Yozefu Matata ni umwe mu bantu bemeza ko jenoside yibasiye abo mu bwoko bw\u2019abatutsi ndetse ikanahitana n\u2019abo mu bwoko bw\u2019abahutu. Abafite ubutegetsi mu Rwanda bavuga ko ababibona\u00a0gutyo nka Matata ari\u00a0abahakanyi cyangwa abapfobya jenoside yibasiye abatutsi.\u00a0Yozefu Matata n\u2019abandi nka we, bo bakabwira abo bategetsi ko ahubwo ari bo bahakanyi (n\u00e9gationnistes) ngo kuko bemeza ko hishwe ubwoko bumwe bagahakana ko n\u2019ubundi bwishwe mu nzira zimwe.\u00a0Matata asobanura ko kuvuga ko n\u2019abahutu bishwe bitavanaho icyaha no guhana abishe abatutsi. Bityo kuri we, mu rwego rwo guca umuco wo kudahana, asanga abishe abahutu na bo batagomba kubihakana, bakaba bagomba no kubihanirwa. Ibi akabivuga yibutsa ko umuntu ari nk\u2019undi, ko kandi Urwanda ruzarushaho kuba igihugu cyiza nirwubahiriza ihame ryo kureshyeshya abenegihugu imbere y\u2019amategeko. Umugabo witwa\u00a0Prosper Bamara na we aherutse gusohora inyandiko<\/a>, aho yemeza ko Urwanda rwubatse ku rutare ruzashingira ku kudahakana ko\u00a0ari abahutu ari n\u2019abatutsi bishwe.\u00a0Ushaka kumenya CLIIR n\u2019umuhuzabikorwa wayo Yozefu Matata yasoma ku rubuga:\u00a0http:\/\/www.cliir.org\/<\/a><\/p>\n Ikiganiro musanga munsi aha, Yozefu Matata\u00a0yakigiranye n\u2019umunyamakuru Tharcisse Semana ku itariki ya 28\/05\/2016, i Buruseli mu Bubiligi, nyuma y\u2019inama imiryango itegamiye kuri Leta yari yifuje gutangamo ibitekerezo ku bakora politiki.<\/p>\n