Ntibimenyerewe ko umuntu arira ku mbehe imwe n\u2019amatungo cyangwa ngo banywere ku nkongoro imwe. Ibi ariko siko bimeze mu Murenge wa Rwimiyaga kuko abaturage banywa ndetse bagakoresha mu buzima bwa buri munsi amazi inka zatayemo amase zikanagangamo, bakaba basaba Leta amazi meza.<\/p>\n
Ni mu gishanga cy\u2019Akagera, ahateganye n\u2019umusozi wo muri Tanzania witwa Karyuwimba, hari amazi yibese uruzi atembera mu gishanga, afite ibara risa n\u2019ikigina nubwo bitoroshye gushushanya isura yayo nyirizina.<\/p>\n
Aya mazi ni yo abatuye Gatebe ya mbere n\u2019iya kabiri, Nyenyeri, mu Gikobwa n\u2019ahandi mu Murenge wa Rwimiyaga bavoma bakayanywa, bakayakoresha n\u2019indi mirimo, niyo kandi ashorwamo inka ndetse n\u2019amatungo magufi.<\/p>\n
Abaturage bakora urugendo rw\u2019ibirometero bisaga 10 bajya kuyavoma, higanjemo abagabo dore ko ngo nta mugore cyangwa umwana wayisukira adaherekejwe. Mu kuyavoma baba bahigika amase n\u2019indi myanda, ari na ko babyigana n\u2019abidumbaguza ndetse n\u2019abatsiritana imbyiro.<\/p>\n
Inka n\u2019amatungo magufi nazo zikora urwo rugendo kuko nta handi zashoka bugufi, nta wabura kuvuga ko zihagera zatagangaye dore ko ngo hari n\u2019amatungo amara kunywa akanogoka.<\/p>\n
Mbere yo kuvoma babanza kuyagotomera<\/strong><\/p>\n Ngarambe Eric, abyuka saa cyenda z\u2019ijoro agiye kuvoma. Yagize ati \u201cMbyuka butaracya njye n\u2019abagabo duturanye tuba dufite amagare tumurika amatoroshi inzira yose, iyo tuje mu museso nibwo tubona amazi asa neza kuko inka ziba zitaratangira gushokamo, iyo bwamaze gucya tuyavoma duhigika amase yazo. Sinakubwira ko tuyanywa atetse kuko na mbere yo kuyavoma tubanza kuyagotomera.\u201d<\/p>\n Byukusenge Edmond akora urugendo rw\u2019ibirometero bisaga 10 kugira ngo agere kuri aya mazi.Yagize ati \u201cMbere yo kuyavoma turabanza tukayagotomera kubera inyota duterwa n\u2019urugendo rurerure tuba twakoze, ni ukuvuga ngo iyo uje bwacyeye uvoma amazi yuzuyemo amase n\u2019amaganga y\u2019inka zashotsemo.\u201d<\/p>\n \u201cKuvoma aya mazi ntibyoroshye niyo mpamvu udashobobora kubona abagore cyangwa abana hano keretse iyo baherekejwe n\u2019abagabo kuko muri aya mazi habamo ingona.\u201d<\/p>\n Hari abanyeshuri biga rimwe mu cyumweru<\/strong><\/p>\n Umuyobozi w\u2019Ikigo cy\u2019Amashuri abanza cya Gatebe, Bumbakare Faustin, avuga ko igihe cy\u2019izuba hari abana baza kwiga badakarabye, abandi ugasanga ntibaheruka kumesa.<\/p>\n Yagize ati \u201cHari abana basiba ishuri kubera ko bagiye kuvoma bakavayo bakerewe. Nakubwira ko nko mu minsi itanu hari abana baza kwiga nk\u2019iminsi itatu gusa. Urebye mu makayi duhamagariramo wakumirwa.\u201d<\/p>\n Mwarimu ava kwigisha akajya kuvoma<\/strong><\/p>\n Abarimu batandukanye bigisha ku Ishuri ribanza rya Gatebe nabo badutangarije ko barangiza akazi basiganwa no kujya kuvoma amazi yo mu Kagera. Umwe muri bo yagize ati \u201cIyo turangije kwigisha, umuntu afata igare agashyiraho amajerekani nk\u2019atatu aba yazanye mu gitondo ubundi akajya kuvoma. Turavunika cyane ariko nta kundi twabigenza. \u00bb<\/p>\n Ingaruka zitandukanye ku bavoma aya mazi<\/strong><\/p>\n Abaturage bavuga ko muri aya mazi habamo ingona ndetse n\u2019inzoka, hari kandi n\u2019abajya baza kuyavoma bakarohamamo. Indwara zikomoka ku gukoresha amazi adasukuye zirimo inzoka zo mu nda na byo ngo bibasimburanwaho.<\/p>\n