{"id":21244,"date":"2017-07-20T10:56:04","date_gmt":"2017-07-20T08:56:04","guid":{"rendered":"http:\/\/www.therwandan.com\/ki\/?p=21244"},"modified":"2017-07-20T11:01:18","modified_gmt":"2017-07-20T09:01:18","slug":"komisiyo-yamatora-yeruye-ishyigikira-kohereza-abakandida-mu-marimbi","status":"publish","type":"post","link":"https:\/\/www.therwandan.com\/ki\/komisiyo-yamatora-yeruye-ishyigikira-kohereza-abakandida-mu-marimbi\/","title":{"rendered":"Komisiyo y\u2019amatora yeruye ishyigikira kohereza abakandida mu marimbi"},"content":{"rendered":"

Yanditswe na Frank Steven Ruta<\/strong><\/p>\n

Ubwo Umukandida w\u2019Ishyaka riharanira Demokarasi no Kurengera Ibidukikije mu Rwanda (Green Party), Dr Frank Habineza yajyaga kwiyamamariza i Rwimiyaga akimurwa inshuro ebyiri bikarangira yoherejwe mu irimbi akabyanga, hari hitezwe ko Komisiyo y\u2019igihugu y\u2019Amatora ibyamagana, igasaba abayobozi kwisubiraho, ariko siko byagenze.<\/p>\n

Ishyaka Green Party rya Frank Habineza ryahise rimenyesha Komisiyo y\u2019Amatora ikibazo bagize, bari batewe n\u2019Umuyobozi wa FPR mu Karere ka Nyagatare, hamwe n\u2019umuyobozi wa FPR mu Murenge wa Rwimiyaga. Aba bombi kandi ni nako bafite imyanya y\u2019ubuyobozi ku rwego rwa Leta, ihuye n\u2019iyo bafite ku rwego rw\u2019ishyaka FPR.<\/p>\n

Abanyamakuru bakomeje kubibaza Komisiyo y\u2019Igihugu y\u2019Amatora ntiyagira icyo ibikoraho, ariko kera kabaye, Prof Kalisa Mbanda uyobora iyi Komisiyo yashyize atangariza Royal TV ko ngo nta kosa ryabayeho mu kohereza Frank Habineza kwiyamamariza hafi y\u2019irimbi.<\/p>\n

Mu gihe Frank Habineza avuga ko bari baramenyesheje akarere ku gihe gikwiye, ntikabahakanire cyangwa ngo kabamenyeshe ahakwiye n\u2019ahadakwiye, ahubwo bagahitirwamo i Bugaragara aho abaturage batinya kugera kereka igihe baje gushyingura.<\/p>\n

Perezida wa Komisiyo y\u2019amatora Kalisa Mbanda wari witezweho kwihaniza abayobozi bakora amakosa nk\u2019ayo, ahubwo yabashyigikiye avuga ko ikosa ari iry\u2019abakandida ngo baba batarumvikanye neza n\u2019abayobozi b\u2019aho bajya kwiyamamariza, bigatuma kwiyamamaza kwa bamwe bizitirwa.<\/p>\n

Ni ku nshuro ya kabiri Frank Habineza atabashije kwiyamamaza, kuko no mu Karere ka Kamonyi ubwo yateganyaga kujyayo yabwiwe ko hari hamaze guhabwa ishyaka FPR ngo rihamamarize umukandida waryo.<\/p>\n

I Nyagatare kandi uretse no kutahiyamamariza, yahahuriye n\u2019abamotari benshi baje bamusakuriza, bavuza amahoni banikoreye imiba y\u2019ibyatsi n\u2019ibigunda byo kwiyitirira ibidukukije, bagiye bamwitambika ubundi bakazamura ibirango bya FPR, bikagaragara nk\u2019igikorwa cyari cyapanzwe gityo ngo bamuburizemo.<\/p>\n