Nyakubahwa Perezida w\u2019Ishyirahamwe ry\u2019Umupira w\u2019amaguru mu Rwanda, FERWAFA, nejejwe no kubandikira ngirango mbashimire cyane, kuko n\u2019ubwo benshi babanenga njye nitonze ngashishoza ngasanga hari ibintu byinshi nkwiye kubashimira.<\/p>\n
Muri rusange ibintu mbashimira, bishingiye ku butwari n\u2019impano mufite mu bijyanye no kwihangana cyane kandi mugaragarizwa kenshi ko nta musaruro ufatika mwagejeje ku mupira w\u2019amaguru mu Rwanda, mukerekwa n\u2019abakunzi b\u2019umupira w\u2019amaguru ko batishimiye imiyoborere yanyu ariko mugakomeza kwihangana mukabima amatwi.<\/p>\n
Muribuka neza nyakubahwa Perezida wa FERWAFA, ko kuva mwajyaho mwagiye munengwa cyane ndetse n\u2019abayobozi bakuru b\u2019igihugu bakaba baravuze ko ishyirahamwe muyobora ririmo umwanda wa ruswa, ikoreshwa ry\u2019amarozi mu mupira w\u2019amaguru n\u2019ibindi bibi, ariko mbashimiye kwihangana mugira mukanga kuva ku izima, kuko ari nkanjye Joriji Baneti naba narabonye ko byanze nkegura.<\/p>\n
Ubu ikipe y\u2019u Rwanda Amavubi igenda isubira inyuma bikabije, umutoza uyitoza nawe mbashimiye ko mwagiye mugaragaza kenshi ko ari umutoza ushoboye, ibyo ni byiza ko ibintu byose mubibona mu ruhande rwiza, kabone n\u2019iyo umuntu yakora ibihombya igihugu n\u2019abagituye mwe mukibonera ari byiza, rwose mukomereze aho. Ubuse nabura kubashimira ko mwihangana mukagenda mu muhanda nta pfunwe kandi rubanda baba babagaya kubera imiyoborere isubiza inyuma umupira w\u2019amaguru?<\/p>\n
Mpise nibuka ariko n\u2019ukuntu mwigirira icyizere, rwose nabyo ndabibashimiye. Umwaka ushize mwabonye ko mushoboye mwiyamamariza kuyobora ishyirahamwe ry\u2019Umupira w\u2019amaguru mu karere ka Afurika y\u2019Uburasirazuba (CECAFA), gusa ubanza abatoye nabo baramenye ko uretse no mu karere, n\u2019iwacu mu Rwanda byazambye, bikaba ari yo mpamvu mwabonye ijwi rimwe gusa. Aha ariko naho ndabashimira, kuba mwarabonye ijwi rimwe mukabyakira mukumva ko ntako mutagize, mukomereze aho rwose kwigirira icyizere no kudacika intege ntako bisa, amaherezo na FIFA mushobora kuzayiyobora.<\/p>\n
Nyuma yo kubashimira ariko, ndabamenyesha ko muramutse mwiyemeje kwegura kuri uwo mwanya bigaragara ko benshi batifuza ko mwagumaho, bwo nazabashimira birenzeho, mbese ibyanjye byose ni ugushima.<\/p>\n