Kuri uyu wa mbere ni bwo ubutegetsi bwafatiye icyemezo cyo guhanisha amande y\u2019ibihumbi 500 by\u2019amafaranga buri umwe mu bacuruzi b\u2019ibirayi bubaziza kubigurisha mu buryo buhabanye n\u2019amategeko. Buravuga ko bagombye kubanza kubinyuza mu isoko rya Nzove hateganyijwe ngo babahe icyangombwa .<\/p>\n
Abacuruzi bo baravuga ko bari bamenyereye kubinyuza ku Giti cy\u2019inyoni mu mujyi wa Kigali. Umwali Clementine Icyitegetse yabwiye Ijwi ry\u2019Amerika ko amabwiriza ubutegetsi bubashinja kwica batayamenyeshejwe.<\/p>\n
Abacuruza ibirayi barabikura mu majyaruguru no mu burengerazuba bw\u2019u Rwanda babyerekeza mu bindi bice by\u2019igihugu cyane mujyi wa Kigali. Kuri uyu wa Mbere ni bwo igipolisi cyahagaritse imodoka 15 z\u2019ibirayi kugeza n\u2019ubu ziracyafungiwe kuri stasiyo polisi I Nyarugenge. Ni ikibazo cyahuruje inzego z\u2019ubutegetsi n\u2019izishinzwe umutekano cyakunze kurangwamo n\u2019inama zabereye mu muhezo.<\/p>\n
Nyuma y\u2019izo nama, minisiteri y\u2019inganda n\u2019ubucuruzi yafashe umwanzuro wo guhanisha buri mucuruzi ibihumbi 500 by\u2019amafaranga ibashinja kwigomeka ku byemezo bya leta. Abaciwe ibyo bihano ariko bo barasanga bikabije bati ni iyicarubozo.<\/p>\n
Aba bacuruzi bararira ayo kwarika kubera icyo bita amananiza batazi icyo ashingiyeho mu gihe n\u2019umuhinzi w\u2019ibirayi muri rusange amarira ari yose. Umuhinzi w\u2019ibirayi mu turere twa Musanze na Burera mu cyumweru gishize ikiro cy\u2019ibirayi cyaranguraga amafaranga 75 kandi ni ihame ko agomba kubigurishiriza mu makoperative y\u2019abahinzi.<\/p>\n
Koperative z\u2019abahinzi na zo zishyiraho ibiciro ziranguza abacuruzi ku buryo ubu ibirayi mu mujyi wa Kigali biri kuri 250. Kugeza ubu umuhinzi we akomeza gutakamba ko asa n\u2019ukorera abacuruzi. Arafatira ku mvune ahura na zo kugira ahinga ibirayi, imbuto y\u2019ibirayi ikiro kitajya munsi y\u2019amafaranga 400, amafumbire ashyiramo na bwo abanje kwaka inguzanyo mu bigo by\u2019imari n\u2019ibindi. Hari impungenge ko amabanki ashobora kuzateza utwabo mu cyamunara nibananirwa kwishyura.<\/p>\n
Umunyamakuru w’Ijwi ry’Amerika Eric Bagiruwubusa ni we wakurikiranye iyi nkuru.<\/p>\n