Umucamanza mu rukiko rukuru mu Rwanda yatangiye kumva ubwiregure bwa Bwana Jean Baptiste Mugimba ku byaha bya Jenoside aburana n’ubushinjacyaha. Uyu wahoze ari umunyamanaga mukuru w’ishyaka CDR mbere ya Jenoside yakorewe abatutsi yabwire urukiko ko ibyaha aburana byacuzwe n’agatsiko k’abantu kagambiriye kumutwarira imitungo<\/p>\n
Atangira kwiregura ku byaha bya jenoside ubutabera bw\u2019u Rwanda bumukurikiranyeho, bwana Mugimba ni we wafashe umwanya munini mu iburanisha rya none.<\/p>\n
Ubutabera buramurega ibyaha bya jenoside bine. Icyaha cya jenoside, icyaha cyo gucura umugambi wa Jenoside, ubufatanyacyaha mu gukora jenoside n\u2019icyaha cyo gushishikariza abandi gukora jenoside.<\/p>\n
Yasobanuye ko icyaha cya jenoside, gucura umugambi wa jenoside n\u2019ubufatanyacyaha mu gukora jenoside byose bigizwe n\u2019ibikorwa bimwe kandi bishingiye ku batangabuhamya bamwe bagenda bagaruka.<\/p>\n
Ibyo bikorwa birimo inama yo ku itariki 08\/04\/94 aregwa ko yasabiyemo imbunda zo guha interahamwe zikica abatutsi, gushyiraho amabariyeri yicirwagaho abatutsi akanayagenzura, gukora amalisiti y\u2019abatutsi bagombaga kwicwa, kujya mu bitero byicaga abatutsi, gutera inkunga Radio Televiziyo Libre des Mille Collines RTLM mu mpine yafashwe nka radiyo rutwitsi n\u2019ibindi.<\/p>\n
Mugimba ntiyiyumvisha uburyo ibi bikorwa byagenda bigaruka kuri buri cyaha. Yahisemo kwibanda kuruta ku cyaha cya kane cyo gushishikariza abahutu gukora jenoside.<\/p>\n
Yavuze ko ubushinjacyaha bwemeza ko bufite umutangabuhamya umwe kuri iki cyaha kandi ko uregwa n\u2019abamwunganira bagenzuye basanga uwo ufatwa nk\u2019umutangabuhamya yarakatiwe igihano cya burundu y\u2019umwihariko ku byaha bya jenoside.<\/p>\n
Yavuze ko amategeko atemera abari kuri urwo rwego gutanga ubuhamya. Yavuze ko anabaye umutangamakuru, amakuru ye nta gaciro yagira igihe cyose nta buhamya bw\u2019abandi buyashyigikira.<\/p>\n
Bwana Mugimba yabwiye urukiko ko mbere y\u2019uko u Rwanda rusaba ko Ubuholande bumwohereza kuza kuburanira aho bikekwa ko yakoreye ibyaha rwemeye amasezerano ko rutazamurega icyaha cyo kurema umutwe w\u2019abagizi ba nabi. Gusa ngo iyo we n\u2019abunganizi basesenguye basanga uretse guhindura inyito naho ubundi ibikorwa bigize icyaha cyo kurema umutwe w\u2019abagizi ba nabi ngo ubushinjacyaha bwabyimuriye ku cyaha cyo gushishikariza abandi gukora jenoside.<\/p>\n
Aravuga ko hari umutangabuhamya w\u2019ubushinjacyaha yirinze kuvuga imyirondoro ye kubw\u2019umutekano we wari interahamwe I Nyakabandi mu mujyi wa Kigali wanabihaniwe agasaba imbabazi akemera ibyaha. Uwo wari interahamwe arashinja uregwa ko yagiye gutoreza interahamwe mu kigo cya Gisirikare I Gabiro.<\/p>\n
Uwo wari interahamwe ngo aravuga ko Mugimba yagiye I Gabiro mu kwa Karindwi muri 92 gutoza urubyiruko rw\u2019ishyaka CDR yari abereye umunyamabanga mukuru. Yavuze ko nyuma y\u2019amezi ane ishyaka ryabo rishinzwe bitashobokaga kuko ryari rikiyubaka. Yavuze ko urubyiruko rw\u2019ishyaka ari rwo mpuzamugambi rutari rwakabayeho kandi ko gutoza interahamwe byatangiye muri 93.<\/p>\n
Mugimba yabwiye urukiko ko uwo wafungiwe ubuterahamwe n\u2019ubwo avuga ko yari umusirikare I Gabiro ku ipeti rya Sergent byamuhaye kubona Mugimba atoza interahamwe ngo bitigeze bibaho.<\/p>\n
Yumvikanye yikoma ubushinjacyaha ko mu kwa Gatatu 2011 bwakiriye abatangabuhamya bamushinja butabanje gushishoza bihagije kuko mu 2010 ngo haremwe agatsiko k\u2019abatangabuhamya bamushinja.<\/p>\n
Yasobanuye ko ari icyo yise agatsiko kamuhimbiye ibyaha kagamije kumutwarira imitungo. Yavuzemo uwitwa Rangira, Bigirumwami n\u2019abandi ngo bahuriye mu kabari Panorama mu mujyi wa Kigali bamucurira ibyaha kugira ngo bazamutwarire imitungo.<\/p>\n
Umwe mu bo avuga ko bari muri ako gatsiko yise \u201cEntreprise Criminelle” mu rurimi rw\u2019igifarangsa ngo ubushinjacyaha bwaje kumutahura afungwa igihe cy\u2019umwaka. Bityo rero ngo iyo buza gushishoza mu 2011 bwagombaga gutahura ako gatsiko ntibukore ikirego kimurega.<\/p>\n
Amagambo agira ati \u201cUmututsi ni umwanzi agomba guhigwa, si umunyarwanda yaturutse muri Etiyopiya aza gutegekesha inka n\u2019ayandi ni yo Mugimba bamurega ko yaba yaravugiye mu kigo cya Gisirikare I Gabiro mu burasirazuba bw\u2019u Rwanda.<\/p>\n
Umucamanza bwana Antoine Muhima yamubajije niba ntacyo ayaziho.<\/p>\n
Uregwa yasubije ko amagambo nk\u2019ayo adashobora gusohoka mu kanwa ke. Yagize ati \u201c Uretse n\u2019ibyo no kugeza ngana uku mumbona sinigeze ngera aho I Gabiro simpazi.\u201d<\/p>\n
Icyakora umucamanza agasigarana kwibaza niba abo avuga ko bamuhimbiye ibyaha ari na bo bakomeje gukurikirana bakazaba abatangabuhamya b\u2019ubushinjacyaha muri uru rubanza.<\/p>\n
Mugimba yavuze ko abandi batangabuhamya baje bashimangira ibyo yise ibinyoma byari byarakorewe mu nkiko gacaca za Nyarugunga.<\/p>\n
Ikindi ashingiraho aravuga ko yari afite urupapuro rw\u2019inzira ruzwi nka Passport yari yarahawe rwo gutembera nk\u2019abandi banyarwanda bose. Akavuga ko iyo aza kuba hari ibyaha bamukekaho atashoboraga kwemererwa iyo pasiporo.<\/p>\n
Bwana Mugimba yahoze ari umukozi muri banki nkuru y\u2019igihugu icyarimwe n\u2019umunyamabanga mukuru w\u2019ishyaka CDR. Araregwa ibyaha bine bikomeye kandi bidasaza bya jenoside. Ibyaha byose araburana abihakana akavuga ko byacuzwe mu mugambi wo kumutwarira imitungo irimo amazu mu mujyi wa Kigali.<\/p>\n
Iburanisha rizakomeza ku itariki ya 31 z\u2019uku kwezi kwa Gatanu. Umunyamakuru w’Ijwi ry’Amerika mu Rwanda Eric Bagiruwubusa ni we wakurikiranye iyi nkuru.<\/p>\n