Nsabimana Callixte uzwi nka Sankara wahoze ari umuvugizi w’umutwe wa FLN urwanya ubutegetsi bw’u Rwanda akaza gufatwa, uyu munsi yashyikirijwe urukiko yemera ibyaha yarezwe.<\/p>\n\n\n\n
Yagejejwe mu rukiko ahagana saa tatu z’igitondo ari kumwe n’umwunganizi we Mo\u00efse Nkundabarashi. Yagaragaye ashishikajwe no kuganira na we ndetse akananyuzamo akamwenyura.<\/p>\n\n\n\n
Umutekano wari urinzwe bikomeye. Muri buri nguni y’icyumba cy’urukiko ndetse no hanze hari abapolisi bafite imbunda. <\/p>\n\n\n\n
Ubushinjacyaha bwavuze ko Callixte Nsabimana ‘Sankara’ aregwa ibyaha 16.<\/p>\n\n\n\n
Ni ibyaha bifitanye isano n’iterabwoba, birimo kurema umutwe w’ingabo utemewe, ubujura bwitwaje intwaro ndetse no kugirana umubano n’igihugu cy’amahanga hagamijwe intambara.<\/p>\n\n\n\n
Ibyaha yarezwe bishingiye ku byo yagiye atangaza nk’umuvugizi wa FLN ku bitero byibasiye uturere tw’amajyepfo ashyira uburengerazuba bw’u Rwanda guhera mu mwaka ushize.<\/p>\n\n\n\n
Ubushinjacyaha bwavuze ko leta y’u Burundi yahaye umutwe wa FLN – ‘Sankara’ yari abereye umuvugizi – aho ushinga ibirindiro naho leta ya Uganda ikawuha ibikoresho. <\/p>\n\n\n\n
Ahawe umwanya, yavuze ko “nta byinshi afite byo kwisobanuza kuko ibyo atakoze ubwe bishobora kuba byarakozwe n’inyeshyamba za FLN yari abereye umuvugizi”.<\/p>\n\n\n\n
Yavuze ko abasirikare ba FLN bamutengushye bakagambanira igitekerezo cyiza yari afite bakica abasivili mu bitero bakoraga bavuye mu ishyamba rya Nyungwe.<\/p>\n\n\n\n
Yagize ati: “Kubera iyo mpamvu nsabye imbabazi mbikuye ku mutima ababuze ababo, Abanyarwanda bose n’umukuru w’igihugu”.<\/p>\n\n\n\n
Yavuze ko yitandukanyije na FLN ku mugaragaro ku bikorwa byose n’ibindi yakora nyuma.<\/p>\n\n\n\n
‘Sankara’ mu magambo ye yagiye ashinja inzego za gisirikare z’ibihugu by’u Burundi na Uganda gukorana no guhura n’abo mu mutwe wa FLN.<\/p>\n\n\n\n
Amagambo ye asa n’ibirego ubutegetsi bw’u Rwanda bwagiye bushinja ubutegetsi bwa Uganda n’ubw’u Burundi ko bufasha abashaka guhungabanya umutekano w’u Rwanda – ibirego ubutegetsi bw’ibihugu byombi bwakomeje guhakana.<\/p>\n\n\n\n
Umwunganizi we mu mategeko, Mo\u00efse Nkundabarashi, arasaba ko umukiliya we yarekurwa akaburana ari hanze kuko yagaragaje ubushake bwo gufasha ubucamanza. <\/p>\n\n\n\n
Nsabimana yavuze ko “atagiye kuburana urwa ndanze” ngo kuko nk’umuntu wize amategeko azi “icyo kutagora ubutabera bisobanuye”. Yagize ati: “Niyo nabihakana n’inyoni zo muri Nyungwe zabinshinja”.<\/p>\n\n\n\n
Abacamanza bavuze ko isomwa ry’urubanza rwe ku ifunga cyangwa ifungurwa ry’agateganyo rizaba ku wa kabiri ku itariki ya 28 y’uku kwezi kwa gatanu.\u00a0<\/p>\n\n\n\n