{"id":35526,"date":"2020-04-02T11:38:25","date_gmt":"2020-04-02T09:38:25","guid":{"rendered":"http:\/\/www.therwandan.com\/ki\/?p=35526"},"modified":"2020-04-02T11:38:48","modified_gmt":"2020-04-02T09:38:48","slug":"rwanda-kubera-coronavirus-benshi-batangiye-guhagarikwa-byagateganyo-mu-kazi","status":"publish","type":"post","link":"https:\/\/www.therwandan.com\/ki\/rwanda-kubera-coronavirus-benshi-batangiye-guhagarikwa-byagateganyo-mu-kazi\/","title":{"rendered":"Rwanda: kubera Coronavirus benshi batangiye guhagarikwa by’agateganyo mu kazi"},"content":{"rendered":"\n
\"Kigali\"\/
Mu mujyi wa Kigali, mu gihe cy’amabwiriza yo guhagarika ibikorwa byose mu kwirinda coronavirus<\/figcaption><\/figure>\n\n\n\n

Zimwe mu nzego z’abikorera zitanga serivisi zitandukanye mu Rwanda zatangiye guhagarika by’agateganyo amasezerano n’abakozi bayo kuko zitari gukora, iyi ni imwe mu ngaruka z’icyorezo cya coronavirus.<\/p>\n\n\n\n

Bimwe mu bigo by’amashuri yigenga, kompanyi zo gutwara abantu, hoteli n’ibindi bigo bitanga serivisi zinyuranye biri kumenyesha abakozi babyo isubikwa ry’amasezerano, ku basanzwe bayafite.<\/p>\n\n\n\n

Ingamba za leta y’u Rwanda – zimaze gufatwa no mu bindi bihugu bimwe ku isi – zo guhagarika ibikorwa byose mu gihugu, uretse ibya ngombwa cyane, zagize ingaruka ku bukungu bw’ibi bigo.<\/p>\n\n\n\n

Abakozi babarirwa mu bihumbi bakora mu bigo byigenga bitanga serivisi zinyuranye ubu ntibari gukora.<\/p>\n\n\n\n

Bigaragara ko mu kwirinda gukomeza kubahemba bitinjije amafaranga, ibi bigo biri guhagarika by’agateganyo amasezerano ya bamwe mu babikorera.<\/p>\n\n\n\n

Umwalimu ku kigo k’ishuri ryigenga riri mu majyaruguru y’u Rwanda utifuje gutangazwa, yabwiye BBC ko kuwa mbere yohererejwe ibaruwa imumenyesha ko amasezerano ye asubitswe.<\/p>\n\n\n\n

Ati: “Ni inkuru mbi cyane nakiriye muri ibi bihe bigoye turimo. Nubwo numvise ko bazaduhemba ukwezi kwa gatatu ariko sinzi uko imbere bizamera kuko ntawuzi igihe ibi nabyo bizarangirira”.<\/p>\n\n\n\n

Mu mabaruwa ahagarika abakozi by’agateganyo BBC yabonye, abakoresha barashingira ku itegeko ry’umurimo mu Rwanda rivuga ko amasezerano y’akazi ashobora gusubikwa kubera impamvu z’ubukungu.<\/p>\n\n\n\n

\"Coronavirus\"\/<\/figure>\n\n\n\n

Kompanyi itwara abagenzi ya Kigali Bus Service yahagaritse abashoferi bayo bose mu gihe cy’iminsi 90 ku mpamvu nk’izi.<\/p>\n\n\n\n

Umwe mu bashoferi bayo utifuje gutangazwa amazina yabwiye BBC ko aba mbere babahagaritse tariki 20 z’uku kwezi ariko ubu abashoferi bose barenga 60 bamaze guhagarikwa.<\/p>\n\n\n\n

Ati: “Baduhaye amabaruwa bitunguranye kuri za WhatsApp, umenya hari n’abatarabimenya.<\/p>\n\n\n\n

“Batubwiye ko ari uko nta mafaranga kompanyi iri gukorera. Gusa numvise ko bazaduhemba ukwezi kwa gatatu nubwo ntayo turabona”.<\/p>\n\n\n\n

Umuryago w’Abibumbye (UN) waraye usohoye icyegeranyo kivuga ku ngaruka zizaterwa n’iki cyorezo ku bukungu n’imibereho rusange by’abantu.<\/p>\n\n\n\n

UN ivuga ko iteganya ko imirimo igera kuri miliyoni 25 izabura ku isi, naho ishoramari rikagabanuka ku gipimo cya 40%.<\/p>\n\n\n\n

Ntibarabona imperekeza<\/h2>\n\n\n\n

Itegeko ry’umurimo mu Rwanda rivuga ko iyo habaye gusubika amaserano ku mpamvu z’ubukungu umukozi umaze nibura amezi 12 akora ahabwa imperekeza.<\/p>\n\n\n\n

Izo mperekeza zihera ku inshuro ebyiri z’umushahara mpuzandengo w’ukwezi ku mukozi ufite uburambe buri munsi y’imyaka itanu mu kigo kimwe, zikagenda zizamuka bitewe n’uburambe.<\/p>\n\n\n\n

Kwishyurwa imperekeza bigomba gukorwa mu gihe kitarenze iminsi irindwi y’akazi umukozi asezerewe nk’uko iri tegeko ribivuga.<\/p>\n\n\n\n

\"b\"\/<\/figure>\n\n\n\n