{"id":40453,"date":"2021-03-26T08:53:56","date_gmt":"2021-03-26T06:53:56","guid":{"rendered":"https:\/\/www.therwandan.com\/ki\/?p=40453"},"modified":"2021-03-26T08:53:57","modified_gmt":"2021-03-26T06:53:57","slug":"sisi-evariste-azabara-iyihe-nkuru-ku-rwanda-asize-inyuma","status":"publish","type":"post","link":"https:\/\/www.therwandan.com\/ki\/sisi-evariste-azabara-iyihe-nkuru-ku-rwanda-asize-inyuma\/","title":{"rendered":"Sisi Evariste azabara iyihe nkuru ku Rwanda asize inyuma ?"},"content":{"rendered":"\n

Ku myaka 81 y\u2019amavuko yaragezeho Sisi Evarisiti ni umwe mu banyarwanda batabwirwaga amateka y\u2019u Rwanda nk\u2019inkuru zo mu bitabo kuko we ubwe ni igihamya cy\u2019ibivugwa muri ayo mateka. Ni byo tugiye kureba muri iyi nyandiko twateguye tugamije kubabwira iby\u2019ingenzi byaranze uyu mubyeyi kuri bamwe, iyi nshuti ku bandi, uyu musangirangendo kubo dusangiye ubuhunzi, watabarutse tariki ya 23 werurwe 2021.<\/p>\n\n\n\n

\"\"<\/figure>\n\n\n\n

Umunyamakuru w\u2019Ikondera wamusanze mu Buholandi aho yaramaze imyaka 18 yibera mu buhungiro yaramubajije ati : iwanyu kavukire ni hehe ? Undi abanza gusa n\u2019uhibagiwe gato ariko arahibuka. Ati ni mu Ruhengeri, muri komini yitwaga Nyamutera. Ni hafi y\u2019ikibaya cyari cyubatsemo kaminuza y\u2019i Nyakinama. Ubu habaye ikigo kigisha ibya gisilikare.<\/p>\n\n\n\n

Sisi Evariste ni mwene Magwigwi Claudien, akaba umunyiginya w\u2019umusharangabo. Ni ukuvuga ko akomoka kuri Sharangabo, mwene Rwabugiri. Ririya zina rya Sisi rikomoka ku mwamikazi wabaye muri Autriche mu kinyejana cya 19 ariko yaje kuba ikirangirire mu mateka ya vuba kubera filime yamukozweho nka kuriya bakoze filime kuri Rusesabagina. Filime yitwa Sissi imp\u00e9ratrice yakinwe n\u2019umugore mwiza witwaga Romy Schneider ikaba yarasohotse mu w\u20191956. Icyo gihe Sisi Evarisiti yarafite imyaka 16 y\u2019amavuko kuko yavutse tariki ya 17 werurwe 1940. Umubyeyi we yarajijutse, azi amazina y\u2019abami n\u2019ibikomangoma, atoranyamo iryo yita umwana we. Byari nko guca amarenga ko uwo mwana avuka mu muryango w\u2019abami n\u2019ibikomangoma. Byongeye kandi uriya mwamikazi Sissi yishwe mu w\u20191898. Icyo gihe mu Rwanda abanyiginya begereye ingoma barimo guhigwa bukware, bakorerwa itsembatsemba, nyuma y\u2019uko umwami Rutarindwa atwikirwa mu nzu agasimburwa na Musinga mu mpera z\u2019umwaka w\u20191896.<\/p>\n\n\n\n

Sisi Evaristi yari umusore w\u2019imyaka 19 ubwo mu Rwanda habaye icyo mu mateka bise \u00ab Revolisiyo \u00bb yo muri 1959. Icyo gihe abatutsi bari mu gihugu hafi ya bose bahuye n\u2019uruva gusenya, bamwe baricwa, abandi barahunga, naho abasigaye mu gihugu babaho mu bwoba bwinshi, kandi ni mu gihe kuko igihe cyose habaga ibitero by\u2019inyenzi (ni ukuvuga inyeshyamba zikomoka ku bahunze babaga barimo kugerageza kugaruka ku ngufu, bashaka no guhirika ubutegetsi bwashyizweho na revolisiyo), byagiraga ingaruka kuri abo basigaye mu gihugu, bamwe bakicwa cyangwa bagafungwa, bavuga ko ari ibyitso. Sisi Evarisiti yatangaje ko ibibazo byariho icyo gihe byatumye ahagarika ibyo yarimo byo kwitegura kuba umupadiri, cyokora aza kugira amahirwe, abifashijwemo n\u2019umupadiri witwa Matiyasi Nturo, abona akazi gakomeye muri leta kuko yagizwe umugenzuzi w\u2019imisoro muri minisiteri y\u2019imari. Ako kazi ntabwo yagatinzeho kuko hagati aho inyenzi zarateye (mu w\u20191966) ahita afatwa mu byitso ajya gufungirwa mu Bugesera. Nyuma y\u2019igihe gito yarafunguwe ariko yirukanwa mu bakozi ba leta. Guhera ubwo yatangiye kumenya kwirwanaho, yikorera ku giti cye, abifatanya no kwiga comptabilit\u00e9. Mu mvururu zo mu w\u20191973 zasaga n\u2019izitegura kudeta yabaye muri uwo mwaka nabwo Sisi Evarisiti yongeye gufatwa, noneho afungirwa muri gereza yiswe 1930. Ku bw\u2019amahirwe ngo yaje gufungurwa nyuma y\u2019igihe gito, ndetse bigiye kuba byiza ubutegetsi bwa Habyarimana bwagiyeho tariki ya 5 nyakanga 1973 butanga ihumure ku batutsi.<\/p>\n\n\n\n

\"\"<\/figure>\n\n\n\n

Mu myaka 17 iryo humure ryamaze Sisi Evarisiti yaracuruje arunguka, ashinga icapiro ryamenyekanye cyane ku izina rya Etablissements SIEVA. Ni nacyo gihe abandi bacuruzi bakomeye b\u2019abatutsi nka Rwigara Assinapol, Kajeguhakwa Valens, Sakumi Anselme, Rubangura V\u00e9daste,n\u2019abandi, bagize imari nyinshi babikesha umwete wabo n\u2019ubuhanga mu gucuruza ariko no mu buryo bwa politiki bashyigikiwe n\u2019ubutegetsi bwa Habyarimana. Ihumure ryaje kurangira tariki ya mbere ukuboza 1990 kubera intambara yatangijwe na FPR Inkotanyi. Tariki ya 2 ukuboza Sisi Evarisiti <\/p>\n\n\n\n

yongeye gufatwa noneho ajyanwa muri gereza ya Ruhengeri. Kuri radiyo Rwanda no mu binyamakuru by\u2019icyo gihe yasaga n\u2019aho ariwe mukuru mu byitso bya FPR byari mu gihugu. Havugwaga ko mu icapiro rye hakozwe indangamuntu zitwa mod\u00e8le 4, ngo zagombaga guhabwa inyeshyamba za FPR zikinjira mu gihugu zigaragara nk\u2019abaturage basanzwe, ubundi zikazafata igihugu bitazigoye. Ni amagambo yavugwaga nta kimenyetso na kimwe kibihamya. Ndetse n\u2019izo ndangamuntu za mod\u00e8le 4 nta muntu n\u2019umwe wigeze azifatanwa. Cyokora birumvikana ko amagambo nk\u2019ayo uwariwe wese yavugwaho bitabura kumuhungabanya cyangwa kumuhungeta. Inkubiri yo guhiga ibyitso yaje gucogora ndetse ibyitso byose birafungurwa biturutse ahanini ku ruhare rw\u2019ibihugu by\u2019amahanga n\u2019imiryango y\u2019uburenganzira bw\u2019ikiremwamuntu.<\/p>\n\n\n\n

Muri cya kiganiro yagiranye n\u2019Ikondera Sisi Evarisite avuga ukuntu yavuye muri gereza hagati mu w\u20191991 agasanga icapiro rye rigikora, bityo agakomeza imirimo ye. Ndetse ngo yaje no kujya mu imurikagurisha yerekana ibikorwa bye aza gusurwa na Perezida Habyarimana wahise amubwira ati nyereka mod\u00e8le 4. Sisi yaramubajije ati ahubwo Nyakubahwa ni mwebwe mwari mukwiye kuyinyereka kuko jyewe ntayo nzi. Birumvikana ko na Habyarimana ntayo yarafite yo kumwereka. Nyuma y\u2019igihe gito Mugenzi Yusitini nawe wari umucuruzi yashatse gushinga ishyaka PL ajya kureba Sisi Evarisiti babiganiraho bavuga ko ari ishyaka rigomba kurengera inyungu z\u2019abacuruzi n\u2019abikorera ku giti cyabo. Iryo shyaka ryaje kugira abayoboke hafi ya bose b\u2019abatutsi bitewe n\u2019ariya mateka ya Sisi Evarisiti, hiyongereyeho uruhare rukomeye rw\u2019undi mucuruzi witwaga Ndasingwa Landoald ndetse n\u2019urw\u2019umunyamakuru witwaga Andereya Kameya wagaragaye nk\u2019umuvugizi w\u2019abatutsi mu kinyamakuru cye cyitwaga Rwanda Rushya. Ishyaka PL ryaje kuba rimwe mu mashyaka yarafite abayoboke benshi ku buryo mu myigaragambyo yo guhangana n\u2019ubutegetsi bwa Habyarimana ryari rihagaze neza. Umuyobozi waryo, Mugenzi Yusitini, nawe yari umunyapolitiki uzwiho kugira ijambo rityaye. Mu w\u20191993, Sisi Evarisiti yaje kubwirwa ko hashobora kuba hari umugambi wo kumwivugana (ni muri uwo mwaka Emmanuel Gapyisi wo muri MDR yishwe) noneho afata icyemezo cyo guhungira i Burundi. Jenoside yakurikiye iraswa ry\u2019indege ya Habyarimana yabaye adahari, nguko uko yayirokotse. Cyokora umugore we n\u2019abakobwa be babiri biciwe i Nyamirambo aho bari batuye. Ubwo ntituvuze n\u2019abandi benshi bo mu muryango we cyangwa inshuti, ndetse n\u2019abayoboke ba PL bamwibonagamo.<\/p>\n\n\n\n

\"\"<\/figure>\n\n\n\n

Muri gicurasi 1994, inkotanyi zari zarafashe igice kinini cy\u2019u Rwanda, cyane cyane perefegitura ya Byumba na Kibungo, igice kinini cya Kigali ngari, igice cya Ruhengeri ndetse n\u2019igice cya Gitarama. Icyo gihe zimwe mu mpunzi z\u2019abatutsi zari i Burundi zatangiye gutaha zinyuze iyo mu Bugesera. Sisi Evarisite avuga ko Paul Kagame bitaga icyo gihe Afandi PC yabakiriye aho mu Bugesera, bakaganira. Nk\u2019umuntu wumvaga afite ijambo ryakumvikana urebye amateka ye n\u2019ibibazo igihugu cyarimo yaratinyutse abwira Kagame ati buriya ni wowe ugomba gufata iya mbere ugaha ihumure abatsinzwe. Arongera aramubwira ati ibyo mudusaba byo gufata amasambu n\u2019imitungo y\u2019abahunze bizatera ibindi bibazo kuko binyuranye n\u2019amategeko. Ibyo byose ni Sisi Evarisiti wabibwiye umunyamakuru w\u2019Ikondera wari wamusanze mu Buholandi agiye kumubaza ku birebana n\u2019urupfu rwa Assinapol Rwigara. Muri icyo kiganiro kiri kuri You Tube Sisi Evarisiti yabaye nk\u2019usobanura ko amarorerway\u2019ubutegetsi bwa FPR aboneka ubu ngubu atarimo kumutangaza kuko imiterere yabwo yayibonye rugikubita kandi agerageza gutanga umuganda we uko yarashoboye. Nyuma y\u2019insinzi ya FPR yasubukuye imirimo ye y\u2019ubucuruzi yongeraho n\u2019ubudepite mu nteko ishinga amategeko aho yayoboye bagenzi be bari bahagarariye ishyaka PL. Ntabwo byatinze yaje kunaniranwa na FPR ndetse amenya ko yari mu bashoroga kwicwa ahitamo gukiza amagara ye. Yavuye mu Rwanda tariki ya 2 gashyantare 2000 yerekeza iya Bugande, ageze i Kampala atumaho umuryango we umusangayo. Ubutegetsi bw\u2019i Kigali aho kugira buti uriya muntu yanyuze mu mateka akomeye azira kuba ari umututsi, reka tumwegere tumugushe neza agaruke kuko byadufasha no kunga umuryango nyarwanda, buhitamo kumushyira ku rutonde rw\u2019abo bwita \u00ab inyangarwanda \u00bb. Nguko uko Sisi Evarisiti nawe yabibonye atyo aho gushaka uko yasubira mu rwamubyaye ahubwo ashaka uko aruhungira kure. HCR yabimufashijemo imujyana mu Buholandi aho yageze tariki ya 12 gashyantare 2003.<\/p>\n\n\n\n

Ngayo amateka ya Sisi Evarisiti. Ntabwo ari ay\u2019umuntu gusa kuko urebye ni ay\u2019igihugu cyacu. Ni amateka ahindura umuntu icyitso, agafungwa, yafungurwa akongera agafungwa, nk\u2019urugi. Ni amateka yo kuzira umuryango uvukamo, ukazira isura yawe, ukazira indeshyo yawe, ukazira abo muvugana n\u2019abo musangira, ukazira umutungo wawe. Ni amateka y\u2019igitugu gisimburwa n\u2019ikindi, wahonyorwa n\u2019uwa mbere uwa kabiri akaza aguhuhura. Ni amateka y\u2019abatutsi bibeshye ko FPR izababohora ahubwo ikabicisha, abandi ikabiyicira, ababishoboye bagakizwa no kuyihungira kure. Ni amateka y\u2019ubutegetsi bw\u2019abahutu butahumurije abatutsi uko bikwiye, n\u2019ugerageje gutanga ihumure akagamburuzwa n\u2019intambara yibeshya ko arimo guca intege abamuteye. Ayo niyo makuru ashyushye Sisi Evarisiti azabwira Andereya Kameya na Landuald Ndasingwa aho azabasanga mu ijuru. Azababwira ko inkotanyi yabonye atari izo bari bategereje. Azababwira ko igitugu cya bamwe ari kimwe n\u2019igitugu cy\u2019abandi. Azabwira ko abanyarwanda asize inyuma banyotewe cyane n\u2019indi mpinduka.<\/p>\n\n\n\n

\"\"<\/figure>\n\n\n\n

Reka dusoze dufata mu mugongo umuryango wa Nyakwigendera, cyane cyane umugore we, Mukashema Esp\u00e9rance bashakanye nyuma ya jenoside yakorewe abatutsi. Uyu mudamu azwiho nawe ubutwari bukomeye mu kuba yarahagurukiye kurwanya ingoma y\u2019igitugu yamwiciye umwana ari nako yahekuraga abandi banyarwanda. Abafaransa baravuga ngo inyuma y\u2019umugabo w\u2019igihangange haba hari umugore nawe w\u2019igihangange. No kwa Sisi Evarisiti niko byari byifashe.<\/p>\n\n\n\n

Abifuza gutera inkunga umuryango wa Nyakwigendera Sisi Evariste mu gikorwa cyo kumushyingura bakoresha uyu mushumi: <\/p>\n\n\n\n

<\/div>