{"id":42697,"date":"2021-08-12T11:50:34","date_gmt":"2021-08-12T09:50:34","guid":{"rendered":"https:\/\/www.therwandan.com\/ki\/?p=42697"},"modified":"2021-08-12T22:18:20","modified_gmt":"2021-08-12T20:18:20","slug":"emmanuel-abayisenga-ukuri-ni-ukuhe-dufate-iki-tureke-iki","status":"publish","type":"post","link":"https:\/\/www.therwandan.com\/ki\/emmanuel-abayisenga-ukuri-ni-ukuhe-dufate-iki-tureke-iki\/","title":{"rendered":"Emmanuel Abayisenga: ukuri kuri he dufate iki tureke iki?"},"content":{"rendered":"

Yanditswe na Marc Matabaro<\/strong><\/p>\n

Kuri uyu wa kabiri tariki ya 10 Kanama 2021 nibwo inkuru yabaye kimomo ko\u00a0umunyarwanda Emmanuel Abayisenga wari washatse gutwika Katederali yo mu mujyi wa Nantes umwaka ushize, noneho kuri uyu wa mbere tariki ya 9 Kanama 2021 yishe umupadiri Olivier Maire. Uyu yari umuyobozi mukuru w\u2019Abapadiri bo mu muryango w\u2019Aba Monfortains, wari utuye mu mujyi wa Saint-Laurent-sur-S\u00e8vre mu burengerazuba bw\u2019Ubufaransa. Ibinyamakuru bitandukanye byaba ibyo mu bufaransa cyangwa mpuzamahanga\u00a0byatangaje ko Emmanuel Abayisenga ku wa mbere tariki ya 9 Kanama 2021 mu gitondo yagiye ku biro bya polisi byo muri uwo mujyi \u00a0kwirega ko yishe uwo mupadiri. Nabibutsa ko kandi Emmanuel Abayisenga yari amaze iminsi mike avuye mu\u00a0<\/em>bitero by’indwara zo\u00a0mutwe yashyizwemo nyuma yo gutwika Katederali y’i Nantes, dore yari yabivuye ku wa 29 Nyakanga 2021.\u00a0<\/i><\/p>\n

Ibivugwa n’itangazamakuru ryo mu bufaransa na mpuzamahanga\u00a0bimwe bishobora kuba atari ukuri<\/strong><\/p>\n

\n

Ikinyamakuru La Croix cya Kiliziya Gatolika kivuga ko abazi Emmanuel Abayisenga bavuga ko ari umugabo ufite ibibazo mu buzima bwe, kandi byaranze amateka ye. Gikomeza kivuga ko yavukiye mu Rwanda mu 1981, akurira mu muryango w’abakristu gatolika n’abavandimwe 12, nyuma ya jenoside mu 1994 we n’abo mu muryango we barahunze berekeza mu cyahoze ari Za\u00efre (DR Congo ubu). Nyuma yo gutahuka, La Croix ivuga ko mu Rwanda se yishwe mu buryo butazwi neza, nyuma y’uko yari yarahamijwe n’inkiko Gacaca uruhare muri jenoside.<\/p>\n

Ibiro ntaramakuru AFP bivuga ko Abayisenga yageze mu Bufaransa mu 2012, akaba yari umupolisi mu Rwanda, akahasaba ubuhungiro mu kwa kabiri 2013. Ubuhungiro yarabwimwe, mu 2015 byemezwa ko atagomba kubijuririra. Yakomeje kuba umuntu wo muri Kiliziya Gatolika ndetse mu 2016 yagiye i Vatican abasha kuramukanya na Papa Francis, nk’uko umunyamakuru Arnaud B\u00e9dat abivuga. Yageze aho ategekwa kuva ku butaka bw’Ubufaransa inshuro 4, ariko buhoro buhoro yiyegereza abihaye Imana muri Kiliziya Gatolika. Mu 2018 Abayisenga yinjiye mu bikorwa by’ineza muri Croix-Rouge, Secours Catholique, n’ahandi, aza no kubona umwanya mu bukarani bwa Katederali ya Nantes. Mu 2019 ahabwa icumbi mu muryango w’abihayimana b’aba Montfortains wo muri komine ya Saint-Laurent-sur-S\u00e8vre mu burengerazuba bw’Ubufaransa.<\/p>\n

\n

Ikinyamakuru La Croix kivuga ko mu 2018 yavuzwe mu gikorwa cyo kurwana muri Kiliziya akahavana ibikomere byo ku mubiri. Byaje gutuma adashobora kubona akazi aho ari ho hose. Muri Nyakanga 2020, hashize umwaka acumbikiwe n’abihayimana ari n’umukorerabushake wa Katederali ya Nantes, Abayisenga yemeye ko yatwitse iyo Katederali. Yafunzwe igihe gito, nyuma ashyirwa mu bitaro by’indwara zo mu mutwe aho yabisohotsemo ku wa 29 Nyakanga 2021 ngo akurikiranwe adafunze. Yategetswe kujya yitaba polisi yo muri Mortagne-sur-S\u00e8vre buri minsi 14, mu gihe urubanza rwe yashinjwagwamo gutwika Katederali rwari kuzaba mu 2022, nk’uko La Croix ibivuga. Mu gihe yari ataramara ibyumweru bibiri ari hanze, ku wa mbere yishyikirije polisi y’aho nyine i Mortagne-sur-S\u00e8vre yiyemerera ko ari we wishe Padiri Olivier Maire w’imyaka 60. Impamvu zabimuteye ntiziramenyekana. AFP ivuga ko yabonye amakuru ko Abayisenga ubu yashyizwe mu bitaro kugira ngo akurikiranwe n’abaganga kubera ko ngo ubuzima bwe butari bumeze neza.<\/p>\n

Umuryango wa Emmanuel Abayisenga uravuguruza ibitangazwa n’ibinyamakuru<\/strong><\/p>\n

\n

Joseph Murasampongo uba mu Bubiligi\u00a0uvuga ko ahagarariye umuryango wa Abayisenga akanaba sewabo, mu biganiro yagiranye na Radio Ijwi ry’Amerika ndetse na BBC Gahuza Miryango nyuma yo gusohora itangazo mu izina ry’umuryango kuri uyu wa kabiri tariki ya 10 Kanama 2021, atangira ahakana ibyatangajwe n’ibinyamakuru ko Abayisenga yabaye Kadogo mu ngabo za FPR ahubwo yemeza ko arangije amashuri yisumbuye yakoze ikizamini cyo kwinjira muri Polisi y’u Rwanda, nyuma akaba umupolisi akaza kuva mu gipolisi ahunze kubera kutihanganira imikorere mibi ihutaza ikiremwamuntu yabonaga mu nzego z’umutekano z’u Rwanda.<\/p>\n

\n

Murasampongo avuga\u00a0ko umuryango wa Abayisenga utigeze uhungira muri Za\u00efre ahubwo wagarukiye ku Kibuye i Rubengera, ko kandi mukuru we Aloys Ndabakenga (se wa Abayisenga) yitabye Imana mu 1996 atigeze aburanishwa ngo akatirwe n’inkiko Gacaca, ngo cyangwa akurikiranwe ku ruhare muri jenoside. Mu kiganiro yagiranye na BBC Gahuza Miryango yagize ati: “Ntabwo ari ukuri, nta kintu cya Gacaca yigeze ajyamo, nta ‘dossier’ yigeze agira kugeza igihe yitabiye Imana, abavuga ibyo sinzi aho babivana.”\u00a0<\/em>Ahakana kandi ko nta bandi ba sewabo wa Abayisenge bakatiwe cyangwa bafunze mu Rwanda.<\/p>\n<\/div>\n

Muri iryo itangazo kandi Murasampongo avuga ko umuryango wa Abayisenga ahagarariye wihanganisha umuryango wa Padiri Olivier Maire n’abakristu ba paruwasi ya Nantes. Akavuga ko umuryango wabo ufitiye icyizere ubucamanza bw’Ubufaransa kuri iki kibazo.<\/p>\n

Amafoto atari aya Emmanuel Abayisenga akwirakwiza ku mbuga nkoranyambaga no mu binyamakuru<\/strong><\/p>\n

Nyuma y’aho Emmanuel Abayisenga atwikiye Katederali ya Nantes umwaka ushize hari abantu ku bushake cyangwa batabizi bafashe amafoto bayakwiza ku mbuga nkoranyambaga ndetse n’ibinyamakuru bimwe birayakoresha ariko mu by’ukuri atari ukuri.<\/p>\n

\"\"<\/a><\/p>\n

Iyi foto yakwirakwiye hose kugeza no mu binyamakuru mpuzamahanga yitirirwa Emmanuel Abayisenga, ariko nyamara si iy’ukuri kuko iyi foto ni iy’uwitwa Emmanuel Ntoragurwa, umuhinzi utuye mu murenge wa Nyange, mu karere ka Ngororero. Mu kiganiro yagiranye n’umunyamakuru V\u00e9nuste Nshimiyimana wa Radio Ijwi ry’Amerika asobanura ko nawe yumvise aya makuru bavuga ko yatwitse Kiliziya ndetse akica n’umupadiri mu Bufaransa kandi nyamara yivugira ko atarakandagira hanze y’u Rwanda. Ikigaragara ni uko impamvu ifoto ye yakoreshejwe byaba byaratewe n’uko yari yariyise Emmanuel Abayisenga ku rubuga rwa Facebook bityo abashakishaga kuri internet amafoto ya Emmanuel Abayisenga amaze gutwika Kiliziya bakaba barahise bayisamira hejuru batabanje gukora igenzura.<\/p>\n