{"id":43380,"date":"2021-09-25T12:59:27","date_gmt":"2021-09-25T10:59:27","guid":{"rendered":"https:\/\/www.therwandan.com\/ki\/?p=43380"},"modified":"2021-09-25T12:59:27","modified_gmt":"2021-09-25T10:59:27","slug":"cyamunara-yumutungo-wa-rwigara-irapfubye-ese-bizarangira-bite","status":"publish","type":"post","link":"https:\/\/www.therwandan.com\/ki\/cyamunara-yumutungo-wa-rwigara-irapfubye-ese-bizarangira-bite\/","title":{"rendered":"Cyamunara y\u2019umutungo wa Rwigara irapfubye. Ese bizarangira bite?"},"content":{"rendered":"

Yanditswe Frank Steven Ruta<\/strong><\/p>\n

Kuri uyu wa Gatanu habaye icyamunara y\u2019i Hotel ibarirwa mu mutungo w\u2019umuryango wa Rwigara, ihotel ibarirwa agaciro k\u2019amafaranga miliyari imwe na miliyoni mirongo inani n\u2019imwe. Iyi cyamunara ariko ntiyageze ku ntego, kuko habuze umuguzi, bituma isubikwa.<\/p>\n

Gusubikwa kw\u2019iyi cyamunara ntibivuze ko ihagaze, cyakora biratanga amahirwe ku muryango wa Rwigara utegereje urubanza rw\u2019ubujurire butambamira iyi cyamunara, rutegerejwe kuwa Mbere tariki ya 27 Nzeli 2021.<\/p>\n

Kuri uyu wa gatanu tariki 24\/09\/2021 i saa tanu y\u2019amanywa, nibwo hashojwe igikorwa cyo gutanga ibiciro hakoreshejwe inzira y\u2019ikoranabuhanga, hakaba hari gukurikiraho gutangaza uwegukanye Hotel y\u2019umuryango wa Rwigara yashyizwe mu cyamunara.<\/p>\n

Byari biteganyijwe ko Umuhesha w\u2019inkiko Me Hitiyaremye Michel akora raporo igaragaza uwatsindiye iyi nyubako n\u2019ikiguzi yayitsindiyeho, akanagaragazamo uko umuryango wa Rwigara wabyakiriye, kuko uyu muryango wari wahawe umunsi wose (amasaha 24) yo kumenyekanisha niba agaciro inyubako yashyizweho babona gakwiye cyangwa niba batakishimira.<\/p>\n

N’ubwo uwagennye cyamunara yashyize iyi nyubako ku gaciro ka 1.081.938.000 Frw, ikibazo cyayo gifite imizi ku mwenda wa miliyoni 500 COGEBANQUE ivuga ko uyu muryango wafashe mu izina ry\u2019Uruganda rwawo Premier Tobacco Company. Ariko Mme Adeline Rwigara Mukangemanyi akavuga ko uyu mwenda utariho, ko umuryango ufite gihamya zose zigaragaza ko nta mwenda na muto bafitiye COGEBANQUE, Leta, cyangwa undi uwo ari we wese.<\/p>\n

Mu makuru yatangajwe avuga ko habuze umuguzi, umuhesha w\u2019inkiko ushinzwe kugurisha iyi nyubako ntiyavuze niba ikibazo ari uko nta muntu n\u2019umwe wagaragaje ubushake bwo kugura, cyangwa se niba ahubwo haba habayeho ikibazo cyo kuba abatanze ibiciro baba wenda bagiye munsi y\u2019ikiguzi fatizo cyifuzwa, cyangwa se ingano y\u2019umwenda wishyurwa (500.000.000 Frw ).<\/p>\n

Kuwa Kane nibwo Madamu Rwigara yari yahamagaye Umuhesha w\u2019Inkiko amumenyesha ko hari urubanza mu bujurire butambamira igurishwa ry\u2019umutungo wabo muri cyamunara, ariko Me Hitiyaremye akaba yaramubwiye ko ikintu cyonyine cyatuma ahagarika iyi cyamunara ari icyemezo cy\u2019urukiko cyangwa se cy\u2019uwamusabye kuyikoresha.<\/p>\n

Urubanza rutambamira cyamunara rugeze mu bujurire nyuma y\u2019aho umuryango wa Rwigara utanze ikirego mu Rukiko rw\u2019Ubucuruzi, umucamanza akanzura mu cyumweru gishize ko ikirego kidafite ishingiro kuko ngo cyatanzwe mu nzira zirengagije amategeko.<\/p>\n

Kugeza uyu munsi, uwategetse ko habaho iyi cyamunara ntaratangazwa, niba ari COGEBANQUE cyangwa se urundi rwego rw\u2019ubutegetsi.<\/p>\n

Kurikira ido n\u2019ido, uko byose byatangiye, n\u2019aho bigeze ubu:<\/p>\n