{"id":43531,"date":"2021-10-08T22:34:06","date_gmt":"2021-10-08T20:34:06","guid":{"rendered":"https:\/\/www.therwandan.com\/ki\/?p=43531"},"modified":"2021-10-09T13:28:20","modified_gmt":"2021-10-09T11:28:20","slug":"felicien-kabuga-yanze-kunganirwa-na-me-emmanuel-altit","status":"publish","type":"post","link":"https:\/\/www.therwandan.com\/ki\/felicien-kabuga-yanze-kunganirwa-na-me-emmanuel-altit\/","title":{"rendered":"Kuki Kabuga ahatirwa gukomeza kunganirwa na Me Emmanuel Altit ?"},"content":{"rendered":"

Yanditswe na Nkurunziza Gad<\/strong><\/p>\n

Urukiko rw\u2019urwego rwa ONU\/UN (UNIRMCT) rwasigaye ruca imanza zitarangijwe n\u2019Urukiko rwa Arusha rwavuniye ibiti mu matwi rwanga ubusabe bwa Kabuga n\u2019umuryango we ndetse n\u2019ubwa Me Emmanuel Altit bwo kuva muri uru rubanza.<\/em><\/p>\n

Mu nama ntegura rubanza yabaye tariki ya 08\/10\/2021 \u00a0i La Haye mu Buholandi ku ishami ry\u2019urukiko mpuzamahaga rwa Arusha, Umucamanza Iain Bonomy, yatangiye abaza Kabuga\u00a0<\/strong>F\u00e9licien\u00a0<\/strong>w\u2019imyaka 88 ibibazo bitandukanye undi ntagire icyo amusubiza, ubundi akanyuzamo agasubiza mu ijwi rifite intege nke.<\/p>\n

Nyuma yo kumubaza ibibazo bitandukanye undi akaryumaho, Umucamanza yabajije Kabuga amazina ye, aramusubiza ati \u201cAmazina yanjye ni Kabuga Felesiyani.\u201d<\/em> Perezida ati \u201cUrakoze nshimishijwe n\u2019uko uhari ukurikiranye iri buranisha, icyo ngusaba ni ugusubiza ibibazo byose mu gihe mbikubajije.\u201d<\/em><\/p>\n

\u201cSinshaka ko Altit akomeza kunyunganira\u201d<\/strong><\/p>\n

Umucamanza Iain Bonomy yabajije Kabuga ati \u201cNdagirango umbwire niba hari ibibazo ufite ushaka kugeza kuri uru rugereko uyu munsi, niba hari ibibazo by\u2019uburyo ufunzemo, uburyo bakuvuza cyangwa ibibazo ibyo aribyo byose wifuza kugeza kuri uru rugereko.\u201d<\/em><\/p>\n

Kabuga mu ijwi rituje kandi mu magambo macye ati \u201cSinshaka ko Altit akomeza kunyunganira.\u201d<\/em><\/p>\n

Umucamanza yahise amusubiza ko ku bijyanye na gahunda y\u2019uwo munsi Altit akomeza akazi ke. Ati \u2018Niwe washyizweho kandi nkurikije\u00a0uko urugereko rubibona akunganira neza.\u201d<\/em><\/p>\n

Me Emmanuel Altit ahawe ijambo ngo agire icyo avuga ko kubyo umukiliya we yavuze, yaravuze ati \u201cNyakubahwa perezida ntabwo iriya ngingo yoroshye kugirango ngire icyo nyivugaho, ariko nk\u2019uko mubizi twasabye kuva muri uru rubanza kandi ni ibintu twavuze ku mugaragaro.\u201d<\/em><\/p>\n

Yongeyeho ati:\u00a0\u201cUbwunganizi bukora uko bushoboye kugirango bwunganire Kabuga neza turitanga dukoresha imbaraga nyinshi, ikipe y\u2019ubwunganizi ikora ibishoboka byose kandi ikora kinyamwuga.\u201d<\/em><\/p>\n

Ibi byahise bishimangirwa n\u2019umucamanza\u00a0Iain Bonomy, asaba bwana Kabuga gukorana neza n\u2019umwunganizi we kandi akamworohereza mu kazi.<\/p>\n

Inteko yahise ijya mu muhezo, igarutse, umucamanza abwira Kabuga ko ubwo bari mu muhezo, umwunganizi we yabijeje ko azakomeza gukora ibishoboka byose kugirango amuhe inyandiko azaba ateganya gushyikiriza abacamanza.<\/p>\n

Kandi ko nta mpamvu babonye ifatika yatuma ahindura ikipe y\u2019abamwunganira bamusaba gukomeza gukorana nayo mu bwumvikane kuko biri mu nyungu ze.<\/p>\n

Umuryango wa Kabuga wasabye ko ahabwa umwunganizi yizeye<\/strong><\/p>\n

Mu kwezi kwa kane uyu mwaka, mu itangazo rigenewe abanyamakuru ryasohowe mu izina ry\u2019umuryango n\u2019umuhungu wa Kabuga Donatien Nshimyumuremyi, basabye urukiko ko Bwana Altit akurwaho kubera ko yanze kubaha amakuru ajyanye na Kabuga n’uburyo ateganya gukoresha mu kumwunganira.<\/p>\n

Icyo gihe, Altit yavuze ko Kabuga wenyine ari we wamuha amabwiriza, kandi gusangira amakuru n\u2019abo mu muryango we “binyuranyije n\u2019amabwiriza y\u2019ibanga”<\/em> ry’umwuga, nk’uko bivugwa n’inyandiko y’urukiko.<\/p>\n

Hagati aho ariko, Bwana Altit yandikiye urukiko asaba kwishyurwa akava muri uru rubanza kubera kutumvikana n\u2019uwo yunganira n\u2019umuryango we, nk\u2019uko biri mu nyandiko ya UNIRMCT.<\/p>\n

Urukiko rwabaye ibamba maze Inteko y\u2019abacamanza batatu – Iain Bonomy, Graciela Santana na Elizabeth Ibanda-Nahamya, baburanisha uru rubanza, yasaba Altit gukora ibishoboka hakagaruka icyizere hagati ye n\u2019umukiriya we maze agakomeza akazi.<\/p>\n