Perezida w\u2019u Rwanda Paul Kagame arashinja umuryango mpuzamahanga kunanirwa gukemura ibibazo by\u2019umutekano muke n\u2019intambara zo mu burasirazuba bwa Kongo.<\/p>\n
Ibi perezida w\u2019u Rwanda yabigarutseho mu kiganiro yaraye agiranye n\u2019abahagarariye ibihugu byabo mu Rwanda ku mugoroba w\u2019uyu wa gatatu.<\/p>\n
Muri iki kiganiro ngarukamwaka kiba kigamije kwifuriza abahagarariye ibihugu byabo mu Rwanda umwaka mushya, Perezida Kagame yibanze ahanini ku ntambara n\u2019amakimbirane yo mu burasirazuba bwa Kongo.<\/p>\n
By\u2019umwihariko ku ntambara y\u2019umutwe wa M23 u Rwanda yateje umwuka mubi hagati y\u2019igihugu ayoboye na Kongo, umukuru w\u2019u Rwanda yavuze ko iki ari ikibazo gikomeza kugenda kigaruka, ariko ntihashakwe igisubizo nyacyo. Yagize ati:<\/p>\n
\u201cIkibazo kiri hagati yacu u Rwanda na Kongo n\u2019ibibera mu burasirazuba bwa Kongo tukimazemo imyaka irenga 20. Kandi ibintu bikomeza kuba nk\u2019ibyo dufite uyu munsi, bisa nk\u2019aho byongera bigaruka nka nyuma ya buri myaka itanu, kandi bikaza bisa nk\u2019ibyabaye mbere. Nk\u2019ikibazo gihari none, cyari cyabaye mu myaka 10 ishize muw\u20192012. Kikitabwaho mu buryo bunyuranye, ariko byose birasa.\u201d<\/p>\n
Perezida Kagame yanenze umusaruro w\u2019ubutumwa bwa LONI muri iki gihugu gituranyi, yavuze ko butwara amamiliyari y\u2019amadolari ariko nta gifatika bugeraho.<\/p>\n
\u201cNibwiraga ko buriya butumwa bwashyizweho ngo bugerageze gukemura bimwe mu bibazo biri muri kiriya gihugu; bigakorwa ku nyungu za kiriya gihugu, ariko no ku nyungu z\u2019ibihugu bituranyi bigiraho ingaruka. Ariko ibyo ntabiba. Nk\u2019uko nababwiye, ibyabaye muw\u20192012 byongeye kwisubiramo muw\u20192022. Kandi turacyakomeje! None, ni ikihe kibazo turimo gukemura mu by\u2019ukuri nk\u2019umuryango mpuzamahanga, u Rwanda rubereye agace gatoya cyane mu biwugize? Ni iki tugamije kugeraho?\u201d<\/p>\n
Mu gihe byinshi mu bihugu bikomeye byagiye bihamagarira u Rwanda guhagarika inkunga rushinjwa gutera inyeshyamba za M23 mu ntambara zihanganyemo n\u2019igisirikare cya leta ya Kongo, umukuru w\u2019u Rwanda yashinje ibyo bihugu kwirengagiza ukuri nkana kubera inyungu byaba bikurikiranye muri Kongo.<\/p>\n
Perezida Kagame akavuga ko gusohora amatangazo yamagana u Rwanda bisa n\u2019ibyambura leta ya Kongo inshingano zo gushaka umuti w\u2019ibibazo bikazihirikira ku gihugu cye.<\/p>\n
Aha kandi akaba yashinje mugenzi we Felix Tshisekedi wa Kongo guhindura imvugo no kwisubiraho ku masezerano agirana n\u2019abandi bategetsi bagenzi be. Yagize ati:<\/p>\n
\u201cUyu muntu yagiye yanga kubahiriza amasezerano menshi yagiranye n\u2019abantu; none wowe wibwira ko hari icyo azubahiriza ku byo mwavuganye? Harimo yewe n\u2019ubushize ubwo twari i Bujumbura, twaraganiriye, yari ahari hamwe n\u2019aba hafi ye; ari mu biganiro atanga ibitekerezo, twandika itangazo, tumenyesha abantu ibyo twaganiriye, n\u2019igikurikiraho. Itangazo ryarasomwe, ariko ku munsi wakurikiyeho, itangazo ririvuguruza risomerwa i Kinshasa!\u201d<\/p>\n
Ku itangazo ryasohotse nyuma y\u2019inama y\u2019abakuru b\u2019ibihugu byo mu karere iheruka kubera i Bujumbura mu Burundi, leta ya Kongo ivuga ko ibirikubiyemo itabyemera kandi n\u2019umukuru wayo atarisinye. Yo ivuga ko amasezerano yemera ari aya Luanda.<\/p>\n
Ku birego by\u2019uko u Rwanda rwaba rufite abasirikare cyangwa hari ibyo rukora mu gihugu gituranyi cya Kongo naho, Perezida Kagame ati:<\/p>\n
\u201cMbwira abantu ngo na mbere y\u2019uko ubona igisubizo cyanjye ku cyo twaba dukora muri Kongo, niba tunahari cyangwa tudahari, wakabaye unsubiza kubera iki iki kibazo gihari! Kubera iki uwo ari we wese yarasa amabombe akayambutsa umupaka akatwicira abaturage? Kubera iki FDLR mu kwa 11 kwa 2019 yambutse umupaka ikatwicira abaturage mu Kinigi n\u2019ahandi? Wakabaye unsubiza impamvu y\u2019ibyo! Sindimo no kugusaba kuza ngo umfashe gukemura icyo kibazo; niba bambutse umupaka turabyikemurira. Ariko se kubera iki tutakemurira icyo kibazo aho giturika? Bisa nk\u2019aho iyo ikibazo cya FDLR kijemo, iyo bambajije nkazamura ikibazo cya FDLR basa nk\u2019abashatse guhunga icyo kibazo!\u201d<\/em><\/p>\n Ibihugu by\u2019u Rwanda na Kongo bikomeza gushinjanya gushyigikira inyeshyamba zihungabanya umutekano wa buri ruhande, u Rwanda rushinjwa gushyigikira M23, narwo rugashinja Kongo gushyigikira FDLR. Ni ibirego impande zombi zihakana.<\/p>\n