Urwego rwasigariyeho kurangiza imanza zasizwe n\u2019inkiko mpuzamahanga mpanabyaha kuri uyu wa gatatu rwasubukuye iburanisha mu rubanza ubushinjacyaha buregamo umunyemari Kabuga Felisiyani ibyaha bya jenoside.<\/p>\n
Iburanisha rya none ryibanze kuri raporo impuguke z\u2019abaganga zakoze ku byerekeranye n\u2019ubuzima bwa Kabuga harebwa niba ashoboye gukomeza gukurikirana urubanza rwe.<\/p>\n
Hashingiwe kuri iyo raporo ubwunganizi bwa Kabuga bwasabye ko uyu yarekurwa.<\/p>\n
Mu gihe byari biteganijwe ko hakomeza kumvwa umutangabuhamya KAB 041 w\u2019ubushinjacyaha, si ko byagenze. Ahubwo iburanisha ryibanze ku kujya impaka kuri raporo y\u2019isuzumabuzima ryakorewe Kabuga, ndetse n\u2019ingaruka z\u2019ibiyikubiyemo ku migendekere y\u2019urubanza.<\/p>\n
Muri make, iyi raporo y\u2019impuguke z\u2019abaganga zigenga yo mu kwezi gushize kwa Kabiri, ivuga ko ibibazo by\u2019ubuzima bya Kabuga byagiye byiyongera, ku buryo ubu atagifite ubushobozi mu by\u2019imitekerereze bwo kugira uruhare rufatika mu miburanishirize y\u2019urubanza rwe.<\/p>\n
Umucamanza Iain Bonomy ukuriye inteko iburanisha yahaye umwanya munini impande zombi ngo bagire icyo bavuga banatange ibyifuzo byabo.<\/p>\n
Umushinjacyaha Rupert Elderkin yavuze ko iyi raporo y\u2019amapaji atatu idatanga ibisobanuro mu magambo arambuye, kandi itanagaragaza neza ibyashingiweho ku buryo urugereko rwabishingiraho rwemeza ku buryo buhamye ko Kabuga atazigera yongera kugira ubushobozi bwo kuba yaburanishwa.<\/p>\n
Uyu mushinjacyaha akavuga ko gushobora kuburanishwa kwe ari ikintu gishobora guhinduka umunsi ku wundi bitewe n\u2019uko ubuzima bwe buhagaze.<\/p>\n
Bityo Bwana Elderkin agasanga bishoboka ko abaganga baba barasuzumye Kabuga mu gihe ubushobozi bwe bwari bwagabanutse kubera uburwayi asanganywe, ariko bitavuze ko ari ko ahora cyangwa azahora.<\/p>\n
Umucamanza Iain Bonomy ariko yabwiye uyu mushinjacyaha ko akazi impuguke z\u2019abaganga zakoze kajyanye n\u2019ibyo zari zasabwe n\u2019urwego. Kandi ko zo ubwazo zemeje ko ikibazo cy\u2019ubuzima cya Kabuga kizahoraho.<\/p>\n
Umushinjacyaha Elderkin yasabye ko hazabaho irindi suzumabuzima mu gihe Kabuga yaba yatangiye kwijajara, igihe iryo ryabera nacyo kikagenwa na raporo za muganga wa gereza zigaragaza uko ubuzima bwe buhagaze.<\/p>\n
Umushinjacyaha Elderkin akanasaba ko hagati aho urubanza rushobora gusubikwa by\u2019igihe gito hategerejwe ko Kabuga yoroherwa. Kandi hagakorwa n\u2019irindi suzuma rigaragaza niba uku gutakaza ubushobozi mu by\u2019intekerezo kwa Kabuga ari iby\u2019igihe gito cyangwa se bizamara igihe kinini.<\/p>\n
Ubushinjacyaha kandi bwasabye ko harebwa niba nta bundi buryo bushoboka bwo gukomeza urubanza, mu gihe uregwa atagishoboye kurugiramo uruhare.<\/p>\n
Icyakora bukanasaba ko mu gihe urukiko rwaba rwanzuye ko urubanza rutagishoboye gukomeza kubera uburwayi bwa Kabuga, mu kumurekura by\u2019agateganyo rwamwohereza mu Rwanda.<\/p>\n
Umunyamategeko Emmanuel Altit wunganira Kabuga ahawe umwanya ngo agire icyo avuga kuri iyi raporo, ndetse n\u2019ibyasabwe n\u2019ubushinjacyaha, yavuze ko iyi raporo ishimangira ibyo ubwunganizi bwa Kabuga bumaze amezi menshi bubwira urukiko.<\/p>\n
Uyu muyamategeko avuga ko raporo ubwayo igaragaza mu buryo butomoye ko Kabuga nta bushobozi afite. Bityo urukiko rugomba kwakira uko kuri uko kumeze.<\/p>\n
Maitre Altit avuga ko impuguke z\u2019abaganga muri raporo yazo zigaragaza ko Kabuga atagishoboye gushyira ibitekerezo ku murongo, ntashobore kwibuka ibyo yabwiwe, haba vuba cyangwa cyera. Ubu burwayi kandi bukaba bwaragiye bwiyongera uko iminsi ishira.<\/p>\n
Kubw\u2019uyu munyamategeko, gutakaza ubushobozi mu by\u2019imikorere y\u2019ubwonko si ikintu kizagenda gikira, ahubwo biriyongera. Agahera aho asaba urukiko gutegeka ko urubanza ruhagarara Kabuga akarekurwa.<\/p>\n
Umunyamategeko Altit yongeyeho ko ikindi cyakorwa kitari ibyo cyaba kinyuranyije n\u2019amategeko, kuko uburenganzira bw\u2019uregwa butaba bwubahirijwe.<\/p>\n
Ku byasabwe n\u2019ubushinjacyaha byo kureba niba urubanza rushobora gukomeza kuburanishwa hatitawe ku bushobozi bw\u2019uregwa, Maitre Altit, mu magambo ye yavuze ko \u201curwo rutaba ari urubanza, byaba ari nk\u2019ikinamico.\u201d<\/p>\n
Umucamanza yabajije Matre Altit igihugu Kabuga yajyamo mu gihe yaba arekuwe, uyu munyamategeko asubiza ko yajya aho ashaka, bijyanye n\u2019ibihugu umuryango we uherereyemo.<\/p>\n
Umucamanza Iain Bonomy ukuriye inteko iburanisha yavuze ko none urukiko rutahita rwanzura ku kijyanye no kuba Kabuga adafite ubushobozi bwo kuburana. Gusa yongeraho ko rugiye kubyigaho.<\/p>\n
Ku kijyanye no kuba ubuhamya bwasigaye bwa KAB 041 bwakumvwa n\u2019urukiko naho, uyu mucamanza yavuze ko ibyo bizatangwaho icyemezo kuri uyu wa kane.<\/p>\n
VOA<\/strong><\/p>\n