Urukiko rwisumbuye rwa Rubavu, ku Gisenyi, rwapfundikiye urubanza rw\u2019abagabo 18 baregwa ibyaha by\u2019iyicarubozo bikekwa ko bakoreye muri gereza ya Nyakiriba. Abaregwa barimo abari abayobozi b\u2019amagereza n\u2019abafungwa babafashije gukora ibyaha nk\u2019uko biboneka mu kirego cy\u2019ubushinjacyaha.<\/p>\n
Abo bose baregwa barasaba kugirwa abere. Ni mu gihe ubushinjacyaha bubasabira kuryozwa ibyaha bubarega. Bwana Innocent Kayumba ufatwa nka Kizigenza w\u2019itsinda ry\u2019abagabo 18 baregwa yaje mu bapfundikiye iburanisha rya none.<\/p>\n
Ubushinjacyaha bwamusabiye gufungwa imyaka 20 muri gereza no gutanga ihazabu ya miliyoni 7. Arashinjwa urupfu rw\u2019umufungwa Jean Marie Vianney Nzeyimana mu mwaka wa 2019. Agira icyo avuga ku cyifuzo cy\u2019ubushinjacyaha, Kayumba bamwe mu baregwa bafata nk\u2019umucurabwenge w\u2019ibikorwa by\u2019iyicarubozo mu magereza yakunze kumvikana mu magambo akarishye.<\/p>\n
Yikomye abatangabuhamya bamushinja muri uru rubanza akavuga ko bakatiwe ibihano byo gufungwa ubuzima bwabo bwose kubera ibyaha bya jenoside; bityo ko ubuhamya bwabo butari ubwo kwizerwa.<\/p>\n
Yasabye urukiko kuruha amakuru, avuga ko magingo aya hari abacungagereza bari gufungwa umusubirizo biturutse ku makuru atari ukuru ari guturuka mu mafungwa. Kayumba yavuze ko kuva we n\u2019itsinda ry\u2019abagabo 17 bareganwa ibi byaha by\u2019iyicarubozo bafungwa, hari abandi bacungagereza bamaze gutabwa muri yombi bakurikiranyweho ibyaha bifitanye isano n\u2019ibyo baregwa .<\/p>\n
Ijwi ry\u2019Amerika ntiryabashije kumva icyo urwego rw\u2019ubugenzacyaha mu Rwanda ruvuga kuri iyi ngingo y\u2019abacungagereza Kayumba avuga ko bafunzwe. Gusa hari abakora mu nzego z\u2019umutekano batifuje kumvikana mu itangazamakuru baduhamirije ko ibyo Kayumba yavuze ari ukuri n\u2019ubwo yabifashe nko kuba yamennye amabanga y\u2019akazi.<\/p>\n
Undi urukiko rwumvise mu bari bakomeye mu buyobozi bwa gereza ni Augustin Uwayezu wasabiwe gufungwa burundu. Aregwa imfu za Makdad Abdalatif Lambert na Kayumba Martin.<\/p>\n
Umucamanza azafata icyemezo hagati mu kwezi gutaha.<\/p>\n