Abagize inteko ishinga amategeko umutwe w\u2019abadepite mu Rwanda batoye ku bwiganze umushinga w\u2019itegeko ryemeza amasezerano hagati y\u2019u Rwanda n\u2019Ubwongereza agamije kwakira abimukira n\u2019abasaba ubuhunzi bashobora kuva mu Bwongereza.<\/p>\n
Mu gihe cyo gutora uyu mushinga, abadepite babiri bawanze, abandi babiri barifata, 58 barawemeza. Ni nyuma yo kumva isobanura mpamvu y\u2019uyu mushinga bagejejweho na Bwana Emmanuel Ugirashebuja minisitiri w\u2019ubutabera w\u2019u Rwanda icyarimwe n\u2019intumwa nkuru ya leta.<\/p>\n
Mu badepite 12 bagize icyo bavuga kuri uyu mushinga w\u2019itegeko, babiri gusa ni bo bagaragaje icyo bafata nk\u2019impungenge bibaza impamvu Ubwongereza bwanze kwakira ababugannye babuhungiraho bugahitamo kubohereza mu Rwanda. Depite Frank Habineza yabimburiye abandi abaza bibazo minisitiri w\u2019ubutabera wari uhagarariye leta y\u2019u Rwanda kuri uyu mushinga. Minisitiri yavuze ko bimwe muri byo nta bisubizo abifiteho.<\/p>\n
Bitandukanye na Depite Germaine Mukabalisa, Depite Odette Uwamariya n\u2019abandi bagenzi babo bavuze ko nta mpungenge na nkeya bagaragaza kuri iyi gahunda. Hari n\u2019abagaragaje ko ahubwo kuri byo byabatindiye.<\/p>\n
Undi mudepite wa kabiri utanyuzwe n\u2019aya masezerano yo kohereza impunzi n\u2019abimukira mu Rwanda, mu bisobanuro yasabye minisitiri w\u2019ubutabera n\u2019intumwa nkuru ya leta ni Jean Claude Ntezimana.<\/p>\n
Uyu mushinga w\u2019itegeko numara kwemezwa burundu, biteganyijwe ko u Rwandsa ruzakira impunzi n\u2019abimukira bagera ku 10.000 mu gihe cy\u2019imyaka itanu. Mu mezi ane ya mbere rukazabanza kwakira abagera mu 2.000. Ni umushinga Ubwongereza bumaze gushoramo akayabo ka miliyoni zibarirwa muri 240 z\u2019amapawundi. Ni ukuvuga abarirwa muri miliyari 300 z\u2019amafaranga y\u2019amanyarwanda.<\/p>\n
U Rwanda rutangaza ko ku bufatanye n\u2019Ubwongereza hahuguwe abagera 151 bazaba bashinzwe imirimo yo kwita ku bimukira n\u2019impunzi zizaturuka mu Bwongereza. U Rwanda runavuga ko kugeza ubu rwateganyije zimwe mu nyubako bazabamo zirimo amahoteli, bitari ihame ko bazatura ahasa nk\u2019inkambi, bazaba bari mu bice bitandukanye.<\/p>\n
Ni gahunda yatangiye mu mwaka wa 2022 ariko inkiko z\u2019Ubwongereza zikagenda ziyikoma mu nkokora zivuga ko kohereza aba bimukira n\u2019impunzi bihabanye n\u2019amategeko. Abaharanira iyubahirizwa ry\u2019uburenganzira bwa muntu, ibitangazamakuru bitandukanye, imiryango itegamiye kuri leta bakomeje kugaragaza ko u Rwanda atari igihugu gitekanye cyo koherezamo aba bimukira n\u2019impunzi.<\/p>\n
Kanda hasi wumve ibindi kuri ino nkuru ya Eric Bagiruwubusa, umunyamakuru wa Radio Ijwi ry’Amerika i Kigali<\/p>\n