Nk\u2019uko byatangajwe mu minsi ishize, Perezida w\u2019u Rwanda, Paul Kagame azaba ari i Buruseli mu Bubiligi, kuya 2 n\u2019iya 3 Mata 2014, yitabiriye inama ihuza buri myaka ine, Umuryango w\u2019ibihugu by\u2019i Burayi (Union Europ\u00e9enne) n\u2019ibihugu bigize Ubumwe bw\u2019Afurika (Union Africaine) ku nsanganyamatsiko yiswe \u201cIshoramari mu baturage, Iterambere, Amahoro\u201d.<\/p>\n
Nk\u2019uko mubizi, Perezida Paul Kagame akekwaho ibyaha byinshi birimo guhanura indege ya Perezida Juvenali Habyarimana n\u2019abo bari kumwe barimo Perezida w\u2019u Burundi Cyprien Ntaryamira kuya gatandatu Mata 1994, agakekwaho kuba yaragize uruhare rutaziguye mu iyicwa ry\u2019impunzi z\u2019Abanyarwanda bari barahungiye muri Kongo hagati ya 1996-97 nk\u2019uko bitangazwa na Raporo Mapping y\u2019Umuryango w\u2019abibumbye yo kuwa mbere w\u2019Ukwakira 2010, ndetse akaba anashinjwa kuba ahora ahungabanya umutekano mu burasirazuba bwa Kongo aho ahora ashyigikira inyeshyamba zirwanya Leta ya Kongo nk\u2019iza M23.<\/p>\n
Mu Rwanda, ubutegetsi bwa Perezida Kagame burangwa n\u2019igitugu, guhutaza abatavuga rumwe n\u2019ubutegetsi, kubafunga, kubica cg kubamenesha mu gihugu, kwiharira no gusesagura, we n\u2019agatsiko ke umutungo w\u2019igihugu mu gihe abenshi mu banyarwanda bicwa n\u2019inzara n\u2019indwara.<\/p>\n
Mu rwego rw\u2019ubwiyunge ikinyoma cyahawe intebe aho igice kimwe cy\u2019abanyarwanda cyagizwe ruvumwa gisabwa guhora gisaba imbabazi z\u2019ibyaha kitakoze ngo kuko byakozwe n\u2019abo bahuje ubwoko; ubucamanza burabogamye ku buryo abanyrwanda bahora bacirwa imanza zirebana n\u2019ibyaha byibasiye inyoko muntu ndetse n\u2019ibya jenoside ari abo mu bwoko bumwe gusa bw\u2019Abahutu.<\/p>\n
Kubera izo mpamvu zose n\u2019izindi tutiriwe turondora, Perezida Paul Kagame ntakwiye guserukira u Rwanda mu ruhando rw\u2019amahanga, ntanakwiye no gutumirwa n\u2019umuryango wiyubashye nk\u2019 umuryango uhuje ibihugu by\u2019i Burayi.<\/p>\n
Niyo mpamvu duhamagariye abarwanashyaka bacu, abakunzi b\u2019u Rwanda n\u2019abakunzi b\u2019amahoro n\u2019ubutabera, kuzitabira imyigaragambyo yahamagajwe n\u2019Ikigo gishinzwe kurwanya akarengane no kudahana mu Rwanda (CLIIR) gifatanije n\u2019Umuryango udaharanira inyungu Jambo ASBL n\u2019amashyaka ya politiki.<\/p>\n