Mu gihe leta ya FPR iyobowe na Kagame yashyizeho itegeko ryo kujya ikurikirana abayandika n\u2019abasoma inyandiko ziyivuga nabi abaturage nabo ihohoterwa rirakomeje ku buryo rigenda rikaza umurego bikaba ari zo mpamvu zituma FPR idashaka ko iryo hohoterwa rijya ahagaragara ngo rimenyekane kuko yari isanzwe ibeshya isi yose ko abanyarwanda bose bayikunda ariko ukuri kumaze kumenyekana iyi leta yize amayeri yo kwivuna abagaragaza uko kuri. Urubuga Rwanda in Liberation Process mu nshingano zacu hakaba harimo cyane cyane kugaragaza uburyo abaturage mu mpande zose z\u2019igihugu bagenda bahohoterwa n\u2019abategetsi banyuranye.<\/p>\n
Muri iri hohoterwa aho twashoboye kubonana n\u2019abaturage ni mu Karere ka Ngoma intara y\u2019Uburasirazuba aho abaturage bo mu murenge wa Remera badutangarije uburyo bakomeje guhohoterwa n\u2019abitwa abayobozi. Mubyo batubwiye bishobora kuba ubu bibabereye umuzigo ni ifumbire bagurijwe na leta yo guhinga ibigori. Aba baturage badutangarije ko bahawe ifumbire ihwanye n\u2019ibihumbi makumyabiri na kimwe y\u2019u Rwanda (21 000 Frw) ngo bahinge ibigori ariko byanga kumera. Bukeye barongeye bahabwa indi nabwo ngo basaruye mu gipfunsi kuko iyi politiki y\u2019ubuhinzi bahatiwe gukurikiza isa n\u2019iyabananiye ariko bagakomeza guhatiriza ngo barebe ko bamara kabiri dore ko udahinze ibigori yitwa umwanzi akajyanwa mu buroko.<\/p>\n
Aba baturage ngo bamaze kurumbya maze leta ibadukamo itangira kubishyuza amafumbire y\u2019ibigori batigeze basarura ku buryo ababuze icyo bishyura nako bigura bahigwa ngo bafungwe. Urugero baduhaye ni umuturage wo mu kagali ka Kinunga umurenge wa Remera akarere ka Ngoma intara y\u2019Uburasirazuba witwa Alphonse Munyentwari uherutse guterwa iwe n\u2019umuyobozi w\u2019akagali ka Kinunga witwa Kanuma ushinzwe imibereho y\u2019abaturage mu kagali. Ngo yamusanze iwe mu ma saa sita z\u2019amanywa arimo afata ifunguro rya saa sita maze ahagarara mu muryango amusaba kwishyura amafumbire nyamara ari umwe mu batarigeze basarura mu bihembwe bibiri by\u2019ihinga bishize.\u00a0Uwo muturage ngo yavuze ko ntacyo kwishyura afite kuko nyine atigeze yeza maze abwirwa ko agiye gufungirwa ku murenge wa Remera. Yamubajije urupapuro rwa polisi rumufunga maze uwo muyobozi (cyangwa ingirwamuyobozi) ahita ahamagara polisi. Umuturage yabibonye atyo ngo amaguru ayabangira ingata maze uwo muyobozi amwirukaho abaturage barumirwa. Byaje kumuviramo guhunga urugo rwe atinya ko yafungwa azize gahunda yahatiwe zo guhinga ibigori bikarumba.<\/p>\n
Iki kibazo kandi ngo gifitwe n\u2019abaturage bose batuye muri ako gace dore ko ngo haba hari n\u2019abafungiwe ku murenge. Bikaba bibabaje kubona abaturage bahatirwa guhinga ibigori byarumba bakishyuzwa amafumbire bahawe nabwo ku ngufu kuko baba batinya kwitwa abanzi b\u2019igihugu ngo bakaba bagirirwa nabi.<\/p>\n
Ibindi bibazo batubwiye bahura nabyo ni icibwa ry\u2019amafaranga ya hato na hato ku buryo ubu ba local defense, inkeragutabara na polisi birirwa ku mihanda (cyane cyane kuwa gatatu no kuwa gatandatu) bafata abaturage. Icyo bafatirwa ngo ni ukwerekana kitansi bishyuriyeho amafaranga 3 000 y\u2019u Rwanda ngo y\u2019inyubako (amashuri) n\u2019ay\u2019ubwisungane mu kwivuza (mutuelle de sant\u00e9). Banabwiwe kandi ko ngo buri rugo rwo mu murenge wa Remera ruzatanga 3 000 Frw ngo azajya mu isanduku ya leta ariko ngo atagira izina. Bakaba bemeza ko ari azajya kuri konti leta yafunguye ngo abanyarwanda bazashyiremo amafaranga yo kuyifasha guhangana n\u2019ikibazo cyo guhagarikirwa imfashanyo n\u2019amahanga kubera gushinjwa gufasha inyeshyamba za M23 zirwanira mu burasirazuba bwa Repubulika iharanira Demokarasi ya Kongo.<\/p>\n
Ibindi abaturage ba Ngoma kimwe n\u2019aba\u2019ahandi binubira ni uburetwa bugiye kujya bukoreshwa abana babo barangije amashuri yisumbuye. Bagira bati kuki abo bategetsi batohereza abana babo muri ubwo buretwa bakoherezayo abacu? Bongeyeho ko mu gihe abana ba ba nyakubahwa barangiza boherezwa mu mahanga gukomerezayo amashuri ababo bon go bazajya bakoreshwa imirimo y\u2019agahato. Iki gikorwa gishobora no kuzakurura amakimbirane hagati ya leta n\u2019abaturage ugereranyije n\u2019uburyo batacyishimiye. Ngo banabangamiwe kandi n\u2019ibyemezo bya leta byo kumviriza amaterefoni yabo. Bagira bati abadepite ntibahagarariye rubanda ahubwo bahagarariye ubutegetsi kuko ntibakagombye gutora bene ariya mategeko abangamiye rubanda ngo babeshye ko ari intumwa zabo.<\/p>\n
Hanavugwa kandi ikibazo cy\u2019imiturire aho abaturage batuye akarere ka Ngoma badutangarije ko mu gihe mu karere baturanye ka Kayonza bo bemererwa kubakisha amatafari ya rukarakara bo batabyemererwa kandi ngo nta bushobozi bwo kubakisha za bloc ciment bafite kandi ngo ikibazo cyo kubona aho kuba kikaba kikiri ingorabahizi kuri abo baturage. Batubwiye ariko ko atari bose bafite icyo kibazo kuko ngo iyo uhaye uwitwa MUDENGE icya cumi urubaka nta nkomyi. Nyamara ngo utamupfumbatishije inzu ye ntirenga umutaru idashenywe. Twababajije aho uwo Mudenge akomora imbaraga zituma mu murenge wa Remera aba icyamamare kugeza aho utamunyuzeho atubaka maze batubwira ko ubu bubasha yaba abukomora kuri mukuru we Musoni James, igikomerezwa muri leta ya Kagame. Ibi ngo bimuha ububasha bwo kwica agakiza muri uriya murenge uwamunyuzeho akubaka n\u2019ubwo byaba bidakurikije amategeko naho uwubatse atamurebye agasenyerwa nta nteguza.<\/p>\n
Ngibyo iby\u2019abaturage b\u2019akarere ka Ngoma n\u2019ubutegetsi bwa FPR. Turashimira abakomeje kuduha amakuru n\u2019ubwo leta yahagurukiye kurwanya ko akarengane ikorera abaturage kajya kumugaragaro ariko ntibizabace integer natwe tuzakomeza gushyira ahagaragara ako karengane kabone n\u2019ubwo leta yakoresha igitugu ariko ikwiye kumenya no kubahiriza ihame ndakuka rivuga ko ubutegetsi ari ubw\u2019abaturage, bushyirwaho n\u2019abaturage, bugakorera abaturage ndetse umuntu akaba yanongera ko buvanwaho n\u2019abaturage.<\/p>\n
Muhawe A.<\/p>\n
Ngoma\/Muburasirazuba<\/p>\n