Hari mu kwakira 1990, ubwo Kagame yavaga muri Amerika akigarurira ingabo z’inkotanyi agahindura n’intego y’urugamba amaze kwicisha Rwigema, nk’uko yari yarabigambanye na Amerika. Ku ikubitiro, kagame yahise asiba igitekerezo cyo gucyura impunzi z’abatutsi zari hanze, ndetse yica abakuru b’inkotanyi bose bari bakibitekereza. Kuva icyo gihe hatangiye gushyirwa mu bikorwa ibyo yari yaratumwe na Amerika; intambara ishingiye ku moko. P. Kagame yatangiye kwica abasivili b’abahutu akuzaho, kugira ngo nabo birare mu basivili b’abatutsi, maze intambara ifate iyo sura. Ibi byabaga byose byari byarateguriwe muri Amerika hagati ya Kagame, Bill Clinton ndetse na Tony Brail. Aba ba mpatsibihugu bombi, bemereye kagame kumugira President ku kiguzi icyo ari cyo cyose, nawe akabakorera mu gukuraho Mobutu. Nguko uko amasezerano yari ateye.
Kuri Amerika nta yindi nzira yashobokaga yo gufata no kwigarurira Urwanda, Atari ukwitwaza ikibazo cy’amoko cyari kimaze imyaka myinshi gitegereje impamvu ya politiki y’ubukungu ngo kitabweho, kandi ibi nibyo kagame yagombaga gushyira mu bikorwa kugira ngo ahabwe ubutegetsi. Igihe Kagame yari i Kansas muri Amerika hateguwe uburyo Urwanda rwagombaga kuva mu maboko ya Habyarimana wari warabahakaniye ko ataba inzira yo gutera Kongo. Mu wa 1990, Habyarimana yitabaje Amerika ayimenyesha ko yatewe anayisaba ubufasha nk’igihugu cy’igihangange ku isi.
Bamusubije bamukurira inzira ku murima, bamubwira ko icyo bamufasha cyonyine ari ukumuha ubuhungiro, aramutse yemeye guha kagame ubutegetsi. Uyu yabaye nk’ukubiswe n’inkuba kuko atiyumvishaga neza uburyo Amerika yamusaba ikintu nk’icyo ku kibazo cyo guhungabanya umutekano w’ikindi gihugu. Habyarimana yakomeje kwihagararaho ariko azi neza icyo ibyo byasobanuraga. Yari azi neza ko amerika ari igihugu kigusha ikimasa gishaka urwoya gusa. Nyuma y’imvururu nyinshi n’ubwicanyi bwa hato na hato byakorwaga na Kagame mu gihugu hose, Habyarimana yemeye gusinya amasezerano ya Arusha yari yuzuye amananiza, kugira ngo nibura igihugu kigire amahoro.
Muri Kanama, 1993 Habyarimana yasinye amasezerano ya nyuma yari agamije ahanini gucyura impunzi zose zari hanze no gusaranganya ubutegetsi nk’uko Amerika yabishakaga. Aya masezerano ya nyirarureshwa yari umutego kuri Habyarimana kuko ukurikije uko yari ateye, amerika yabonaga ko nta mutegetsi n’umwe ku isi wayemera ngo ahare inzego zose zihetse izindi mu gihugu. Ibi Habyarimana yarabihaze aharanira amahoro, ndetse yemera no kuvangwa kw’ingabo zari zihanganye. Nyuma y’icyo gikorwa abanyarwanda hafi ya bose babonaga ko intambara irangiye. Icyari gitegerejwe na buri wese kikaba cyari ishyirwaho rya guverinoma y’inzibacyuho, n’itegurwa ry’amatora.
Uko byamera kose, kagame wari udafite n’amasuri 4 yisumbuye, ntiyashoboraga guhagararira uruhande cyangwa ishyaka iryo ari ryo ryose mu yari guhatana mu matora. Ikindi kandi, ni uko guverinoma yari kujyaho iyo ari yo yose, nta masezerano yari yaragiranye na Amerika yo gutera Kongo no gukuraho Mobutu. Impamvu Mobutu yagombaga kuvaho nayo, irasobanutse rwose. 90% bya Coltan yagombaga guhindura ubuzima bw’itumanaho mu kinyejana cya 21 yari yarayikomeyeho, kimwe na cobalt ikoreshwa mu gukora indege. Amahoro ku Rwanda si cyo cyari kigamijwe. Kagame yashakaga ubutegetsi, naho Amerika ikamushakaho ibirombe bya Kongo.
Nta bundi buryo ibi byashobokaga ubutegetsi budasahuriwe mu nduru (intambara). Intambara, ariko se hagati yande nande? Intambara hagati ya leta ya Habyarimana n’inkotanyi, kagame ntiyashoboraga kuyitsinda rwose, kuko yari yaratakaje igisobanuro cyayo akimara kwica Rwigema. Byabaye ngombwa ko kagame na Amerika iyo ntambara bayigira iy’abahutu n’abatutsi mu gihugu hose, kugira ngo mu gihe leta yabuze ayo icira n’ayo imira, bifatire igihugu mu buryo bworoshye. Nyuma y’uko abasirikare b’inkotanyi bacumbikirwa muri CND, Kagame na Amerika iby’amahoro ntibyabarebaga. Kubera ko ingabo z’inkotanyi zari muri CND zashoboraga kunanirwa ku ikubitiro, Kagame yagombaga gukora ibishoboka byose mu kwica abatutsi, kugira ngo haboneke impamvu yihutirwa ituma ingabo za Amerika zari zoherejwe na Bill Clinton i Mombasa mu cyiswe operation support hope zihite zinjira nta kuzuyaza. Ikindi gikomeye cyari mu nyungu za kagame mu gufata ubutegetsi, ni Diversion (kuyobya uburari). Iyicwa ry’abatutsi mu gihugu hose byitirirwa abahutu, cyari igikorwa ingabo za leta zagombaga guhugiraho byanga bikunze, haba mu guhagarika ubwicanyi, cyangwa kubwijandikamo. Ibi bikaba byaragombaga gutuma kagame n’ingabo ze nta rugamba na rumwe bahura na rwo mu gihe bigarurira imisozi nka za Rebero, Mont Kigali, n’iyindi.
Byatumye igice kimwe cy’abakomando ba kagame gikina role y’interahamwe mu gukaza ubwicanyi hagati y’abasivili b’abahutu n’abatutsi mbere na nyuma y’ihanurwa ry’indege ya Habyarimana. Ibi kandi bishobora gutuma hibazwa impamvu zimwe mu nterahamwe zikomeye ndetse zaryozwa byinshi mu iyicwa ry’abatutsi, zari abatutsi ubwabo. Ingero ni nyinshi ariko urwa hafi ni urwa Kajuga Robert, wari umututsi akaba n’umukuru w’interahamwe mu gihugu. Iyi gihamya yashimangirwa kandi n’imikorere ya kagame itarigeze ihinduka yo kwica ubwoko runaka akoresheje bene wabo nk’uko ateganya kwica abahutu akoresheje intore ze za Bamporiki n’abandi ngo nyuma hazabure uwo bishinjwa. n’ubwo bamwe mu bahutu badashishoza bishe abatutsi bibwira ko bahorera Habyarimana, uwo mushinga wari warizwe neza na Paul Kagame na ba sebuja.
Mu mpera za werurwe 1994, ibisasu byo mu bwoko bwa misile zihanura indege byavanywe muri CND bijyanwa ku musozi wa Masaka hakoreshejwe imodoka za MINUAR ku mabwiriza ya Clinton ubwe. Mu ntangiriro za Mata 1994, Amerika yateguye Inama i Dar-Es-Salaam itari ifite ikindi igamije Atari ugutikiza abakuru b’ibihugu byombi, b’abahutu (Habyarimana na Ntaryamira). Ibi abakozi ba CIA mu karere babikoranye ubuhanga buhanitse ku buryo nta kosa na rimwe ryagombaga gukorwa. Hakozwe ibishoboka byose kugira ngo aba bombi baze guhurira mu ndege imwe yagombaga kuberekeza ku mushibuka umwe i Kanombe uko byagenda kose. Imirongo yose ya telephone hagati ya Clinton n’abakozi ba CIA mu karere yari ifunguye ku buryo Indege falcon 50 yagombaga gukurikiranwa isegonda ku rindi.
Mu gitondo cyo ku ya 06/04/1994 intasi za Amerika zagiye mu Kagera ziyise abakerarugendo zigiye gukurikirana neza igihe indege iri buhanyurire igaruka zigahita zitanga amakuru yihuse. Kagame nawe aho yari ari ku Murindi mu ndaki yari ategereje kumva ko indege imaze guhanurwa maze agatangira urugendo rwo kwigarurira imisozi nta nkomyi. ku ya 06 Mata,1994 ahagana mu ma saa mbili z’ijoro, indege falcon 50 ya Habyarimana, iraswa n’abakomando bari bariteguye bihagije, ndetse babasha kuva aho bakoresheje imodoka za MINUAR basubira muri CND ntawe ubaciye iryera. Kuva iryo joro, Kagame atangira urugendo rwo kwigarurira imisozi, naho abakomando be b’Interahamwe bakomeza guhuza ingabo za leta binyuriye ku kwica abatutsi, kugeza kagame afashe igihugu.
Kuva taliki 07 Mata 1994 kugera mu mpera z’ukwa 7/1994 ubwo kagame yafataga Kigali, nta hantu na hamwe yigeze atanga amabwiriza yo kujya gutabara abatutsi babaga bari kwicwa.
Niba hari uhazi yazahatubwira. Ikindi kandi, ni uko mu nkundura yo gufata Kigali, nta hantu na hamwe kagame yigeze ahurira mu rugamba rukomeye n’ingabo za FAR, uretse mu mizo ya nyuma za mburabuturo, nabwo ari uko FAR ibonye umujyi wenda gufatwa. Mu gihe cyose inkotanyi zari zirimo kwigarurira imisozi, abasirikare ba FAR bo bari bahugiye mu bikorwa byo kugarura umutekano mu mujyi, n’ubwo bamwe muri bo bari bijanditse mu bikorwa byo kwica abatutsi. nyuma y’urupfu rwa Habyarimana, abantu batekerezaga ko ibintu biri busubire mu buryo, ndetse bikaba ari byo byatumye igisirikare cya FAR gishyira ingufu mu kugarura umutekano no kubuza abantu gusahura, kurusha guhurira na kagame ku rugamba. Abatutsi barishwe, maze aho bashiriye kagame aba yarangije gufata umujyi, n’igihugu muri rusange. Yica abashumba ba Kiliziya gaturika bose bari i Gakurazo, hamwe na Sheja umwana muto wari kumwe nabo. Taliki ya 17 Nyakanga 1994, abahutu na leta yabo bava mu gihugu, abarenga miliyoni 2 bambuka bajya Kongo (Zaire y’icyo gihe).
Kagame afata igihugu aba byose hejuru ya byose, atanga impozamarira yo kwica no gufunga abahutu bose bari mu gihugu ku batutsi bari barokotse ubwicanyi yateguye. Arimbura ibihumbi birenga 200 by’impunzi z’abahutu bari I Kibeho isi yose ibireba irenzaho. Nyuma y’imyaka 2 akomereza urugendo rw’abamutumye muri Kongo, muri Kanama 1996 ajya gufata amabwiriza muri Amerika abonana n’abategetsi bakomeye harimo na John Perry icyo gihe wari minister w’ingabo, abumvisha ko atagera mu birombe atabanje gusenya inkambi z’abahutu zari muri Kivu y’epfo n’iya ruguru. Bamubwira ko kugira ngo intambara yumvikane neza ari uko ashaka udukingirizo tw’abahoze barwanya Mobutu akaba ari bo ashyira imbere. Amezi abiri yakurikiye, kagame yatumyeho muzehe L Desire Kabila na Bugera i Kigali kugira ngo abasobanurire uko gahunda iteye. Ibitwaro bya rutura ndetse n’amato mato y’intambara byoherejwe na Amerika bisukwa i Kanombe buri joro.
Mu Gushyingo 1996, bayobowe na Kabarebe, ndetse na L Kabila mu mirongo y’imbere, abasirikare ba kagame mu mazi no kubutaka, binjira muri Kongo bica ndetse barimbura igihumeka cyose mu nkambi z’abahutu muri kivu zombi. Twabibutsa kandi ko ari muri uwo mwaka ku kagambane ka Amerika, muri Tanzania hari habanje kumenwa amafaranga menshi kugira ngo impunzi zaho z’abahutu zibanze zicyurwe. Kugira ngo zitabangamira ibitero byari bigiye kugabwa muri Kongo, cyangwa zigafata Urwanda mu gihe kagame ahugiye Hakurya. Paul Kagame arimbura impunzi z’abahutu isi yose ireba, iraruca irarumira. Afata kongo ku ya 17 Gicurasi 1997, ashyira L Desire Kabila ku butegetsi, ndetse Kabarebe amugira Umukuru w’ingabo z’amabandi ziswe iza Kongo. Aya mabandi ntiyazuyaje, atangira gusahura ikitwa ibuye ry’agaciro ryose ryabarizwaga muri icyo gihugu yohereza i Kigali hanyuma Kagame nawe akuriza indege yohereza muri Amerika.
Ibyo bikorwa byo gusakura Kongo, Kagame yakomeje kubifatanya no gucura inkumbi mu Rwanda hose ategura ndetse ashyira mu bikorwa jenoside yakorewe abahutu mu wa 1997-1998 muri Gisenyi na Ruhengeri. Mu turere twa Nkuli, Mukingo, Kinigi, Kanama, Kayove, Karago, Nyakinama, Nyamutera, n’ahandi henshi. Mu myaka 2 gusa yakurikiye, Kagame yatangiye kwibasira ibikorwa remezo rusange mu mujyi wa Kigali arabyararika abisimbuza inyubako ze bwite. Aha twavuga nk’ahahoze gare yo mu mujyi yasenywe ku manywa y’ihangu Rubanda ibeshywa ko igiye gusimbuzwa indi igezweho, maze aho kugenda gutyo Kagame akahiterekera city tower. Ntibyatinze ahimbira President Pasteur Bizimungu ibirego, amuhirika ku butegetsi amujugunya muri Gereza. Muri 2001, L Kabila abaturage bakomeje kumugaragariza ko barambiwe gukubitwa inkoni ku nda, n’ingabo ziyobowe na Kabarebe, asaba ko inkotanyi zimuvira ku butaka, ariko yirengagiza ko ziri no mubamurinze. Nta kuzuyaza, kagame yahise ategeka ko L. Kabila yicwa, ndetse anumvisha ba sebuja ko yari abangamiye inyungu zabo.
Ni muri icyo gihe kandi, kagame yashinze ikiswe inkiko Gacaca zari zigamije gufunga abahutu bose bitwa ko ari bakuru, nyuma yo kubacira urwa Pilato. Abacamanza bari abatutsi, n’abarega ari abatutsi naho uregwa akaba nyakamwe w’umuhutu. Nta kintu na kimwe cyashoboraga kurengera abahutu mu gihugu hose cyangwa ngo kibakize uru rugomo. Benshi batanze ibyo batunze byose ngo birengere ariko biba iby’ubusa babamarira mu munyururu. Bakatirwa imyaka myinshi y’igifungo igeretseho n’imirimo y’uburetwa butazibagirana bwiswe TIG. Bake mu bahutu barokotse uru rugomo bahunga igihugu abasigaye baba abaja, n’inkomamashyi z’ubutegetsi. Abana b’abahutu bari mu mashuri, kagame abashyiriraho inota rihanitse ryo gutsindiraho, abatutsi bacitse ku icumu bashyirirwaho inota ryo hasi cyane ryo gutsindiraho. Naho abatutsi bavuye hanze bakoroherezwa gukomeza amashuri binyuriye mu miryango yabo iri mu butegetsi.
Si ibyo gusa, Kagame yanakuye muri gahunda y’indimi, ururimi rw’igifaransa abahutu n’abasa nabo bigaga kandi bakanakoramo. Ibyo byose hagamijwe kubaburizamo burundu. Si ibyo gusa, Kagame yanategetse ko imitungo yose y’abahutu igurishwa binyuriye muri Gacaca, maze abana babo bagatorongera bakagwa ku gasi.
Iyi gahunda yo kurimbura abahutu ku buryo burambye, yatumye kugeza kuri uno munota rubanda nyamwinshi rw’abahutu mu Rwanda, ntaho wabatandukanyiriza n’abapfuye. Kagame amaze kwica abahutu abarangije ntiyashizwe, abona ko n’abatutsi byanze bikunze bazamuhagama. Inda nini igira itya itangira kudusohoreza ubuhanuzi bwa Rwabujindiri rurya ntiruhage. mu myaka ya za 2008 atangira kwiyenza kuri ba rusagara abanyaga inzuri zabo ziri mu karere ka Kayonza, yirengagiza ko we yikubiye Muhazi yose, ngaho ba Musenyeri Birindabagabo i Gahini, abashinja gukorana n’umwami, ba Rujugiro atangira kubarega imisoro, reka sinakubwira ubucuruzi bwose mu gihugu abugira ubwe, ngizo za tagisi arazica azisimbuza coasters mu gihugu hose, ngizo FAIR, HORIZON, COTRACO, Inyange, ibigo by’itumanaho amaduka, ndetse n’ubundi bucogocogo bwose yigwizaho.
Uyu Rwabujindiri ntiyahaga, anyaga imitungo ya Rujugiro yose, ashaka inzu ya Rwigara, ayimwimye aramwica arangije arayisenya. Uduce twinshi muri Kigali atwimuramo abaturage aradusenya nyuma yo kutugurisha abashoramari. Bityo ba nyiraho bagenderaho, nyamara we yarishyuwe ingurane. Agura indege yiyishyura ingendo zazo mu mafaranga y’igihugu nabwo ntiyanyurwa. Arica buri munsi, yica Gasakure, yica Mucyo, yica Karegeya, yica Toy Nzamwita, yica Asiel Kabera, yica Rwabukamba, yica Mutagatifu Kizito M. n’abandi benshi cyane ntavuze muri iyi serie y’abatutsi. Niba Kagame yarashoboye kwica ikitwaga rubanda nyamwinshi y’abahutu, akaba agerereye n’abatutsi, murumva Urwanda rusigaje iki?
Ni ukwibeshya gukomeye cyane ku Munyarwanda wese wibwira ko agafuni ka Kagame kamuri kure. Baca umugani mu Kinyarwanda ngo “umukunzi wa Kagame niwe arya mbere.” Iyimbaga yose tumaze uvuga haruguru yahitanye hamwe n’abandi benshi yarunze mu munyururu azica ejo cyagwa ejobundi, nta wabarushije kuba hafi ye. Igihango wowe waba wibwira ko ufitanye nawe, ntiwaba warakibarushije. Birakwiye ko abanyarwanda bose aho bava bakagera Abahutu, Abatutsi, ndetse n’Abatwa basobanukirwa ko Kagame nta n’umwe ari we muri bo. Paul Kagame ni Ibandi Ryibisha intwaro, ryashyizwe mu bushorishori na Amerika nyuma yo kuyifasha kujya kwiba Kongo. Muzi neza ko kuba hafi y’ibandi akenshi biba ari ugushyira mu kaga ubuzima bwawe, cyane ko iyo ribona ko ushobora kutemera ibyo rigutegetse cyangwa ntubikore uko ribishaka igisubizo aba ari ugupfa. Kuba hafi ya Kagame rero uri kurya akaribwa n’akataribwa muri ibi bihe, murumva icyo bisobanuye. Kuba Ibandi rero bikubiyemo no kwiba ubutegetsi bwa rubanda no gushaka gusahura igihugu ubuzima bwe bwose.
Mu wa 2003 yibye ku ngufu ubutegetsi, nyuma y’imyaka7 muri 2010 arongera arabwiba, nyuma y’indi myaka7 mu wa 2017 arongera abigenza atyo. Kuba abanyarwanda twakomeza kurebera aya mahano byaduha umwanya wa mbere w’ubugwari ku isi. Igihe cyo guceceka cyararangiye. Abanyarwanda twese uko tungana aho turi hose ku isi tugomba guhitamo kugwa mu mfuruka itagira ubwinyagamburiro cyangwa guhaguruka tukarwana n’agatsiko gashaka kuyidutsindamo.
Rubyiruko rw’Urwanda namwe banyarwanda mwese, muri kwicirwa n’inzara mu gihugu hose, bitewe n’ibyemezo kirimbuzi byafashwe na Kagame kuri iki cyorezo cya Corona. Mbanje kubihanganisha mbikuye ku mutima, mbamenyesha ko ibyemezo kagame yafashe byo gufungirana abantu burundu bitigeze bifatwa n’igihugu icyo ari cyo cyose mu byo mu karere. Ibi bikaba biri mu nyungu ze bwite, Inyungu ya mbere, ni ugusaba inkunga mutazamenya irengero ryazo yitwaje imimerere yabashyizemo, inyungu ya kabiri ni ugutegura neza uburyo bwo kwiba umutungo w’igihugu muri iki gihe nta muntu n’umwe uri ku kazi, kugira ngo nibirangira azatangaze ko ibihombo byaturutse ku kuba abantu batari ku kazi maze ikigega agaciro gitangire kwambura rubanda mu rwego rwo gusubiza ibintu mu buryo. Impamvu ya gatatu ni ukwicisha abaturage inzara no kugabanya abaturage kugira ngo abone ubutaka bwo kugurisha abashoramari kandi ibyo bikorwa yarabitangiye. Nta kwibeshya na mba, kuri mu kuvuga ko kagame yifuza nibura ko Abanyarwanda bapfa akabona ubutaka. Icyabimufashamo rero cyose aragishyigikiye 100% kuko nta wundi mutungo asigaranye wo kugurisha Atari ubutaka bw’abenegihugu.
Bana b’Urwanda mbaga y’inyabutatu, igihugu cyacu dukunda twese kiri mu maboko y’agatsiko k’abantu batarenze 20, bakoresha akandi gatsiko k’abantu bake cyane batageze kuri 200 bafite imbunda bakoreshwa mu gukomeza kutwica tureba. Bakarasa umwe, uwo bari kumwe agaceceka azi ko ari byo bimukiza, ejo nawe bakaza bakamurasa tugakomeza gushira gutyo. Igihe cyo guhangana n’ibi bishwamwinyo cyararenze turasabwa guhaguruka ubu. Tugasezerera Kagame n’izi ngegera zindi ayoboye. Abanyarwanda, tugomba kwanga gukomeza kuragizwa urushishi nk’injiji zitazi aho ziva n’aho zijya. Ubwoba bushobora kwica kuruta ibifaru, n’indege z’intambara. Abaturage nibange gusenyerwa maze turebe ko kagame abwira ingabo ngo zibarase, urebe ko igihuru kitabyara igihunyira. Ibyo kagame ntiyabitinyuka ni umunyabwoba kubi. Icyo akomeza kutumarisha ni uko atwara umwe umwe. Kandi namwe muzi umugani wa wa musaza washatse kuvuna inkoni zihambiranyije uko yabigenje. Abanyarwanda nimufatanye ku bibazo byose bibareba maze murebe ko hari aho ako gatsiko k’imiguta kazabamenera. Ntibikwiriye na gato ko abanyarwanda dukomeza kurenganywa n’abantu nkatwe bafite inyama n’amaraso. Ngo badusenyere, badukubite, badufunge, bagere n’aho batwica tureba, ni ubutesi bukomeye. Nongere mbisubiremo igihe cyo kwigobotora iyi miguta cyarageze. Nta muntu ugomba kongera kurenganywa afite amaboko. Ibi nibishyirwa mu mutwe na buri wese, izigiraga injangwe zizaba imbeba mu gihe nk’icyo guhumbya, Igisabwa ni ukubyizera gusa. Ndabasaba, kudashotora, ariko na none ndabasaba mbinginga ko umuntu uwo ari we wese icyo yaba yitwaje cyose naramuka aje kuguhohotera ukakimwaka niba kica azabe ari we giheraho, n’undi uje bigende gutyo. Bigomba gusobanuka neza ko aka gatsiko kayobowe na Kagame nta mpuhwe na mba kadufitiye nk’abanyarwanda. Dukwiye kandi kumenya ko intambara yo kugahirika yatangiye. Igisabwa ni ukurasa cyangwa ukaraswa. Basirikare muri hafi ya kagame, gupfa ni ibya twese ariko gupfa cyagwa ugakira umaze kwica kagame, ni umuhigo mugomba guhiga mwese kandi uzawesa wese azaba intwari Urwanda n’abanyarwanda batazigera bibagirwa ibihe bitarondoreka. Kagame agomba kurangirana na 2020, umwaka yasezeranyijemo abanyarwanda ibyiza akawutangira awicira abatagatifu.
IHEREZO RYA KAGAME NI IRI.
MURAKOZE.
Ernest Mugisha
i Kigali.
