Ku itariki ya 19 Gashyantare 2024, Ubumwe bw’u Burayi hamwe n’u Rwanda byasinyanye amasezerano y’ubufatanye mu bucukuzi bw’amabuye y’agaciro, ibi bibaye mu gihe hari kunengwa umuco wo guceceka kw’ibihugu byo mu burengerazuba ku bijyanye n’ibikorwa by’u Rwanda muri Repubulika Iharanira Demokarasi ya Congo.
Bernard Ntaganda, uyobora ishyaka rya Politiki mu Rwanda rizwi nka Parti Social Imberakuri, mu kiganiro yagiranye na Deutsche Welle, yagaragaje iki gihe atari icyo gusinya aya masezerano. Yavuze ku mibanire itari myiza hagati ya Kigali na Kinshasa, aho Kinshasa ishinja Kigali gushyigikira umutwe w’inyeshyamba za M23 ukorera mu burasirazuba bwa Congo, ibi bikaba bituma u Rwanda rushinjwa kwinjira mu bucukuzi bw’amabuye y’agaciro mu ntara ya Kivu y’amajyaruguru.
Bernard Ntaganda yanenze bikomeye Ubumwe bw’u Burayi agira ati, “Ubumwe bw’u Burayi buhora butangaza ko buhangayikishijwe n’ihonyorwa rikomeye ry’uburenganzira bwa muntu hano mu Rwanda. Ubu bumwe nyamara bugakomeza gusinyana amasezerano n’ubuyobozi bw’u Rwanda. Ibi biraduha ishusho y’uburyarya bwuzuye bw’Ubumwe bw’u Burayi.”
Yakomeje ashimangira ko u Rwanda rutari mu bihugu byubahiriza amategeko agenga uburenganzira bwa muntu, yagize ati, “Dufite igihugu kinyuranya n’ihame ry’uburenganzira bw’ibanze bwa muntu, n’uburenganzira bw’ikiremwamuntu muri rusange. Leta y’u Rwanda irenga ku mahame ya demokarasi (…). Mu Rwanda, dufite abatavuga rumwe na leta bafunze, abanyamakuru bafunze… Hari n’abatakaje ubuzima bwabo bazira kuba barakoze umwuga wabo mu Rwanda. Birazwi ko u Rwanda ari nka gereza idasakaye”
Uyu mwanzuro w’ubufatanye hagati y’Ubumwe bw’u Burayi n’u Rwanda mu bucukuzi bw’amabuye y’agaciro ugaragaza ihurizo rikomeye mu bijyanye n’uburenganzira bwa muntu n’ubutabera. Ni ngombwa ko ibihugu byombi bibasha kugera ku myanzuro ihuriweho n’impande zose mu guharanira iterambere rirambye n’uburenganzira bwa muntu byombi bikajyanirana.
