Kuwa 26 Werurwe 2024, i Kigali, Me Ntaganda Bernard, Prezida Fondateri w’Ishyaka PS Imberakuri, yatangaje ko yatanze ikirego mu Rukiko Rukuru asaba guhanagurwaho ubusembwa. Iki kirego cyatanzwe nyuma y’uko mu 2019 yari yarandikiye urukiko agasaba ko urubanza rwabaye mu 2012, rwamukatiye igifungo cy’imyaka ine azira ibyaha birimo guhungabanya umutekano w’igihugu, rwongera gusuzumwa, ariko ntibamusubize.
Me Ntaganda yafatiwe mu 2010 mu gihe yiyamamazaga ku mwanya wa Prezida wa Repubulika, ariko akaza guhamwa n’ibyaha byo guhungabanya umudendezo w’igihugu, kubiba amacakubiri, no gukoresha imyigaragambyo itemewe. Ibi byose byabaye mbere y’amatora y’umukuru w’igihugu yagombaga kuba muri uwo mwaka, aho yashakaga guhatana na Prezida Paul Kagame.
Abakurikiranira hafi politiki y’u Rwanda bavuga ko ifungwa rya Me Ntaganda ryari rigamije gukumira abatavuga rumwe na leta ya Kigali, by’umwihariko mbere y’amatora, mu rwego rwo gutera ubwoba no gukumira abakandida bashobora kuba bahangana na Prezida Kagame.
Ntaganda, ubu wiyemeje kuzahatana na Prezida Kagame mu matora ya Prezida wa Repubulika yo mu 2024, yagaragaje ko, nubwo yahuye n’inzitizi zikomeye, ntiyigeze acika intege mu guharanira ibyo yemera. Yasabye Urukiko Rukuru gukuraho ibirego byose byamubuza uburenganzira bwe bwo kwiyamamaza mu matora ataha.
Iki kirego gishya gitanzwe na Me Ntaganda kije nk’ikimenyetso cy’umuhate we mu guharanira ubutabera no kwishyira ukizana mu Rwanda, aho asaba ko amateka ye ya politiki asubirwamo kandi agahabwa amahirwe angana n’abandi mu guhatanira umwanya w’ubuyobozi bw’igihugu.
