Kuri iki cyumweru, tariki ya 11 Gashyantare 2024, mu Rwanda habaye umukino ukomeye wa shampiyona aho ikipe ya Rayon Sport yatsinze Police FC ku manota 2-1. Uyu mukino wabereye i Kigali, ku munsi wa 20 wa shampiyona, wagaragaje ubuhanga n’ishyaka ry’abakinnyi ku mpande zombi.
Ku munota wa 53, Rayon Sports yabonye amahirwe yo gufungura amazamu binyuze kuri coup franc yatewe na Hertier Luvumbu Nzinga, umukinnyi ukomoka muri Repubulika Iharanira Demokarasi ya Congo (RDC). Igitego cye cyateje impaka zikomeye mu Rwanda no ku mbuga nkoranyambaga, bitewe n’uburyo yishimiye igitego, bikaba byarafashwe cyane cyane n’abashyigikiye Leta y’u Rwanda iyobowe na FPR nka politiki ishingiye ku bibazo biri hagati y’u Rwanda na RDC.
Ku mbuga nkoranyambaga hari abari gusaba ko ikipe ya @rayon_sports yitandukanya n’umukinnyi wayo umunyekongo Luvumbu Nzinga, wishimiye igitego mu buryo abategetsi b’igihugu akomokamo bakoresha bashinja u #Rwanda uruhare mu bibazo biri mu burasirazuba bwa #RDCongo pic.twitter.com/wHXkTuFl5M
— Flash Radio & TV (@flashfmrw) February 12, 2024
Luvumbu yagaragaje ikimenyetso gikomeje gukoreshwa mu kwerekana ubutumwa bujyanye n’ibibazo bya politiki na sosiyete muri RDC, aho bashinja u Rwanda guhungabanya umutekano muri icyo gihugu. Iki kimenyetso kirimo gushyira intoki ebyiri ku gahanga, bisobanura nk’umuntu utunzwe imbunda naho ikindi kiganza gishyirwa ku munwa, bishatse kuvuga gucecekesha cyangwa kurenganya.
Nyuma y’ibyo, bamwe mu bashyigikiye leta y’u Rwanda basabye ko Rayon Sports yitandukanya na Hertier Nzinga Luvumbu, bavuga ko igikorwa cye ari icyo gushinja u Rwanda mu bibazo bya RDC. Abandi bafana basanga politiki itakagombye kuvangwa na siporo, bavuga ko siporo ikwiye kuba umuyoboro wo guhuza abantu.
Mu kiganiro cyatambutse kuri Radio 1 Rwanda, Kakooza Nkuliza Charles (KNC), umuyobozi wa Radio 1 Rwanda na TV1 Rwanda, yavuze ko ibyakozwe na Luvumbu ari ibyo kwamaganwa kandi ko bigomba gufatirwa ingamba. Yabigereranyije n’ibikorwa bya politiki birwanya u Rwanda, avuga ko Luvumbu atakiri umukinnyi gusa ahubwo ari umunyapolitiki.
Ndabona KNC yavanze liquor n’urumogi. pic.twitter.com/3YAPe57BuA
— فتى مجهول (@rodg051) February 12, 2024
N’ubwo ibi bivugwa, Rayon Sport n’abayobozi bayo ntibaragira icyo batangaza ku mugaragaro kijyanye n’iki kibazo. Ubuyobozi bw’iyi kipe bwatangaje ko bari mu nama yo kwiga ku myitwarire ya Luvumbu nyuma y’umukino.
FERWAFA na Minisiteri ya Siporo mu Rwanda nabo ntacyo baratangaza ku myitwarire ya Luvumbu. Ibi birerekana ko iki kibazo gishobora kugira ingaruka ziremereye ku mibanire ya siporo na politiki mu Rwanda no mu karere.
