Repubulika ya Demokarasi ya Congo (RDC) iratabariza amahanga ngo afashe mu gukemura ikibazo cy’umutekano muke mu burasirazuba bw’igihugu, aho ishinja u Rwanda gufasha umutwe w’inyeshyamba za M23.
Mu kiganiro na BBC Newsday, umuvugizi wa leta ya Congo, Patrick Muyaya, yagaragaje ko igihugu cye kidashobora kuganira na M23, umutwe uvuga ko witeguye kwitabira ibiganiro by’amahoro. Muyaya yashimangiye ko Congo idashyigikiye ibiganiro na M23, yita umutwe w’iterabwoba, ahubwo isaba amahanga gukoresha ibihano bikomeye ku Rwanda ngo bihagarike ubufasha buhabwa M23.
Mu byumweru bishize, imirwano ikomeye hagati ya FARDC n’inyeshyamba za M23, ifatanyije n’ingabo z’umuryango wa SADC, yibasiye cyane cyane inkengero za Sake, hafi ya Goma, ibintu byateje umutekano muke muri aka karere. U Rwanda, rushinjwa na RDC gufasha M23, ruhakana ibyo birego, rukavuga ko na Congo ifatanya n’umutwe wa FDLR urwanya leta y’u Rwanda, ibirego Congo na yo ihakana.
Ku rundi ruhande, Amerika, kimwe mu bihugu byakurikiranye hafi iki kibazo, yafatiye ibihano bamwe mu bayobozi b’ingabo z’u Rwanda, nk’uko byatangajwe na Muyaya ishingiye ku makuru y’ubutasi na raporo z’Umuryango w’Abibumbye. ikiganiro na Muyaya cyagarutse ku ngaruka z’imirwano, aho yavuze ko mu myaka 30 ishize, RDC yatakaje abaturage barenga miliyoni 8, naho ubu abarenga miliyoni bamaze guhunga ingo zabo hafi ya Goma, babaho mu buzima bubi.
Patrick Muyaya yagaragaje ko gushakira umuti ikibazo hifashishijwe ibiganiro na M23 bidashoboka, ahubwo ashyigikira amasezerano ya Luanda nk’inzira yonyine y’amahoro muri aka gace. Yaboneyeho gushimangira ko RDC itazigera igirana ibiganiro na M23, afata nk’igikoresho cy’u Rwanda, yemeza ko iki gihugu gikoresha ibisasu bikomeye mu bice bituwe n’abaturage.
Intambara hagati ya M23 na FARDC yongeye gufata intera kuva mu mpera y’umwaka wa 2021, ibintu byongereye umutekano muke mu karere. Ibi bibazo by’umutekano muke birasaba ubufatanye bw’amahanga n’ingamba zikomeye kugira ngo haboneke umuti urambye w’iki kibazo gikomeje gutera impungenge mu karere k’ibiyaga bigari.
