NCANA, NCANA NTE ?

Yanditswe Jean-Jacques Bigwabishinze

Nabyukiye mu ntonganya,

Intore z’intozo

Zakwije isahaha

Ngo sinkunda Kagame

Kandi yarakoze ibitangaza

N’amahanga akamutangarira !

Ngo nince inkoni izamba

Amazi ntararenga inkombe,

Simvume iritararenga;

Ngo Kagame azareka akarengane,

Umunyarwanda ahabwe agahenge,

Gereza zahindutse amabagiro

Zizafunga imiryango !

Erega banshyira ku nkeke,

Bansaba gushugurikana,

Nkajya gushaka ibishyito

Byo gucanisha ikòòme

Ryo gususurutsa Kagame 

N’ingoma ye y’igitugu !

Nti «ese ncana, ncana nte ?»

Ncanire Bihehe umuriro,

Nimara gususuruka

Isubire guhùùma mu Muhima,

Ihitane umuhisi n’umugenzi ?

Nigabe mu nganzo,

Mpimbe imivugo urwunge,

Mbe umucyeza w’ingoma

Yanze kunamura icumu,

Igicucuma rubanda ?

Nsingize ingoma mpotozi,

Ngo izakomeze kuramba

No kugarika ingogo,

Ngambanire ingòòngo

Zampaye ubuhanga

Mu bugeni bw’amagambo ?

Sinzamucanira ikòòme,

Ngo mwicire n’akanyota,

Namara gukira isari

Asubire gusambura igihugu

No gusogota bene Kanyarwanda !

Sinzamutekerera itabi,

Ngo namara kuritumagura

No gutora agatege,

Ajye gutesha umutwe umuturage,

Amutwarire imitungo,

Amusenyere îngôombe,

Amurandurire imyaka,

Amwicishe «Nzaramba» !

Ese ncanire Gacabintu,

Uwo mutegetsi mutindi 

Watujemo ari gatumwa,

Mutere ingabo mu bitugu,

Mutize umurindi,

Nâatèèra u Burundi 

Mugire mu birindiro ?

Oya, sinzambika amasimbi

Ibibwana by’ingurube 

Byivuruguta mu maraso;

Sinzakarabya umurozi !

Simwifuriza umuriro 

Wo mu magereza y’u Rwanda

Yotesha Shima Rwigara

N’umubyeyi umubyara,

N’imbaga y’inzirakarengane !

Simwifuriza gukarangwa

Ku rutare rwa Ngarama

No gusasa imigeri 

Ku rutare rwa Kamegeri,

Hirya iyo za Kigoma !

Simwifuriza umuriro utazima

W’ikuzimu kwa Nyamuzinda,

Aho roho z’abanyabyaha

Zikongokera ubuziraherezo !

Sinamuciriye akobo:

Namuciriye akanzu,

Ubwo namugiraga inama

Yo kutabuza igihugu amahwemo

No kunamura icumu,

Agatanga ihumure,

Abantu bagahumeka.

Abanzi kuva nkivuka

Bazi ko ndi inkwakuzi;

Nta ko ntagize,

Ngo nguyaguye Kagame,

Biba gucurangira abahetsi

No kugosorera mu rucaca;

Ndacana umuriro 

Ukanga kwaka.