Goma, 15 Gashyantare 2024- Abasirikare babiri b’ingabo z’Afurika y’Epfo (SANDF) batakaje ubuzima abandi batatu barakomereka bitewe n’igisasu cyarashwe kuri kimwe mu birindiro byabo. Ibi byatangajwe n’igisirikare cya Afurika y’Epfo ku itariki ya 14 Gashyantare. Ingabo za Afurika y’Epfo ziri mu butumwa bw’Umuryango w’Ibihugu byo mu Majyepfo ya Afurika (SADC) bugamije kugarura amahoro muri Repubulika Iharanira Demokarasi ya Congo (RDC),
Ubutumwa bwahawe izina rya SAMIDRC, bwatangiye gukorwa n’ingabo ziturutse mu bihugu bya SADC, harimo n’iza Afurika y’Epfo, Malawi, Tanzania, hamwe n’ingabo za Congo (FARDC), bigamije kugarura amahoro, umutekano, n’ituze mu karere. Perezida Cyril Ramaphosa yategetse ko abasirikare 2900 ba SANDF bajya muri SAMIDRC kuva ku ya 15 Ukuboza 2023 kugeza ku ya 15 Ukuboza 2024, ku giciro cya miliyari 2 z’amafaranga y’Afurika y’Epfo.
Ubu butumwa buri mu gikorwa cyo guhangana n’inyeshyamba za M23 zifashijwe n’ingabo z’u Rwanda zirimo gusatira umurwa mukuru wa Kivu y’Amajyaruguru, Goma, cyane cyane mu gihe ingabo za Loni ziri mu butumwa bwa MONUSCO ziri kuhava.
Impuguke mu by’indege, Dean Wingrin, yaburiye ko kohereza SANDF muri SAMIDRC bishobora kugira ingaruka zibabaje kubera kutagira kajugujugu z’indwanyi zo mu bwoko bwa Rooivalk zitanga ubufasha mu kirere n’indege zitwara abantu n’ibintu zo mu bwoko bwa Oryx zidahagije. Wingrin yavuze ko Afurika y’Epfo ifite ingengo y’imari ntoya igenerwa igisirikare, kandi ko ibi bishyira mu kaga ubuzima bw’abasirikare b’Afurika y’Epfo.
Ku rundi ruhande, ibibazo biri muri RDC birushaho gukomera kubera ko imitwe y’inyeshyamba irushaho kubona intwaro zigezweho, nk’uko byatangajwe na Loni, harimo na za misile zirasa indege. Bivugwa ko izi misile zoherejwe n’u Rwanda mu gushyigikira umutwe wa M23.
