Umwanzuro ku bujurire bw’urubanza ruregwamo Col Tom Byabagamba na Frank Rusagara wari utegerejwe uyu munsi wasubitswe ku nshuro ya gatatu.
Col Tom Byabagamba wahoze akuriye abarinda Perezida Paul Kagame w’u Rwanda na Frank Rusagara, wahoze mu ngabo ku ipeti rya Brigadier General, bafunze kuva mu 2014.
Bashinjwa “guteza imvururu muri rubanda” no “gukwiza ibihuha bangisha abaturage ubutegetsi”, kuri Col Byabagamba hakiyongeraho “guhisha ibimenyetso” no “gusuzugura ibendera ry’igihugu”.
Col Byabagamba na Bwana Rusagara kuva bafatwa bombi bakomeje guhakana ibyaha baregwa.
Mu 2016, urukiko rukuru rwa gisirikare rwakatiye Col Byabagamba gufungwa imyaka 21 naho Frank Rusagara akatirwa gufungwa imyaka 20. Bajuririye uyu mwanzuro mu rw’ubujurire.
Uru rubanza mu rukiko rw’ubujurire rwatangiye kuburanishwa mu kwezi kwa gatanu uyu mwaka.
Mu kwezi kwa cyenda rwarapfundikiwe bavuga ko umwanzuro uzasomwa tariki 15/11/2019, kuri iyi tariki ntirwasomwe rwimuriwe tariki 29/11/2019, uwo munsi nabwo ntirwasomwa rwimurirwa 13/12/2019.
Isomwa ry’uyu mwanzuro ryari ritegerejwe uyu munsi ku wa gatanu ryasubitswe bwa gatatu.
Mu bwanditsi bw’urukiko rw’ubujurire i Kigali batangarije BBC ko isomwa ry’umwanzuro uyu munsi ryasubitswe kuko urubanza rutararangira kwandikwa.
Bavuze ko umwanzuro kuri uru rubanza wimuriwe tariki 27 z’uku kwezi.
Inkuru dukesha BBC Ghauza-Miryango
