Ubutegetsi bwa rubanda ni ububahumuriza, si ububatsemba: Guverinoma y’u Rwanda ikorera mu buhungiro iyobowe na President wayo Nyakubahwa Padiri Thomas Nahimana, niyo ikwiye kuyobora abanyarwanda kuko ibahumuriza kubera ubugome bagiriwe na Kagame afatanyije na FPR ye.
Tariki ya 10 Kanama 2017, Guverinoma y’u Rwanda ikorera mu buhungiro, iyobowe na Nyakubahwa Padiri Thomas Nahimana, yasohoye inyandiko yise: “Amatora: Guverinoma y’u Rwanda ikorera mu buhungiro irahumuriza abanyarwanda”. Muri iyo nyandiko, harimo impamvu zitandukanye Guverinoma y’u Rwanda ikorera mu buhungiro yagendeyeho ihumuriza abanyarwanda, ubwo Kagame yavugururaga itegeko nshinga mu buryo butemewe n’amategeko, maze akanabeshya ko yatsinze iyo kinamico ry’amatora yo muri Kanama 2017 ku majwi arenga 98%. Muri aya matora kandi, Kagame yayahejemo Nyakubahwa Padiri Thomas Nahimana, wangiwe inshuro 2 zose kwinjira mu Rwanda ngo yiyamamaze ku mpamvu z’uko Kagame yabonaga ko Padiri Thomas yamutsinda. Uku guhumuriza abanyarwanda, kukaba kwarabaye nyuma y’uko abanyarwanda babujijwe amahwemo n’ubutegetsi bwa Kagame, kuva bwajyaho mu mwaka w’1994 kugeza ubu.
Guhumuriza abanyarwanda, ni igikorwa cy’ubutwari bukomeye kandi cyari gikenewe, bitewe n’uko abanyarwanda bahahamuwe n’iriya ngoma ngome ya Kagame n’agatsiko ke, kuva yajya ku butegetsi mu Rwanda.
Muri iyi nyandiko, tugiye kurebera hamwe zimwe mu mpamvu zatumye Guverinoma y’u Rwanda ikorera mu buhungiro ifata icyemezo cyo guhumuriza abanyarwanda, ndetse tunarebe niba koko iriya Guverinoma ishobora kugera kuri iyo ntego nziza yihaye, kubera ibyo tutayobewe bijyana n’agasuzuguro gashingiye ku kwica abanyarwanda ubutegetsi bwa Kagame bwashyize ku banyarwanda, kuva bwajyaho kugeza uyu munsi. Izo mpamu ni: ukuba Guverinoma y’u Rwanda ikorera mu buhungiro yaramenyesheje abanyarwanda ko Kagame atakiri President w’u Rwanda; kuba yarahumurije abanyarwanda ibaha ipica nyayo y’igisa na Guverinoma Kagame ayoboye; kuba yarahumurije abanyarwanda ibamenyesha ko itagikeneye kuganira na Kagame n’agatsiko ke; kumenyesha abanyarwanda ko igiye guhanga inzira yo kugamburuza Kagame n’agatsiko ke; kuba yarashimiye amahanga yiteguye gufasha abanyarwanda kwishyiriraho ubutegetsi bushingiye kuri “democracy”; ndetse no kuba yarasabye amahanga gufatira Kagame n’agatsiko ke ibihano bitandukanye.
Yahumurije abanyarwanda ibamenyesha ko Kagame atakiri President w’u Rwanda.
Kumenyesha abanyarwanda ko Kagame atakiri President w’u Rwanda byonyine ubwabyo, ni inkuru nziza cyane ku banyarwanda! Ukurikije ukuntu ingoma ya Kagame yazaniye abanyarwanda ubwicanyi butandukanye, kandi bukamara imyaka irenga 20, kumenyesha abanyarwanda ko Kagame atakiri President ni ikintu gikomeye, bitewe n’uko abanyarwanda bari bamaze icyo gihe cyose baramuhaze, bibaza igihe ingoma ye yazarangirira, maze bagahumeka. None kuba Guverinoma y’u Rwanda ikorera mu buhungiro iyobowe na Nyakubahwa Padiri Thomas Nahimana yarafashe iyambere mu kumenyesha abanyarwanda ko Kagame atakiri President w’u Rwanda, byaruhuye imitima ya benshi, kuko bahise bumva ko ihirima ry’ubwo butegetsi riri hafi.
Kuba Guverinoma y’u Rwanda ikorera mu buhungiro yarasobanuriye abanyarwanda ko Kagame atakiri President w’u Rwanda, ishingira ku bintu bikurikira: Ishingira ku kuba Kagame yarahinduye itegeko nshinga, kugirango yemererwe gutegeka mandat ya 3, iryo tegeko nshinga n’ubundi ritateganyaga, byose ari ukugirango ategeke kugeza muri 2034. Aha rero, niho Guverinoma y’u Rwanda ikorera mu buhungiro ihera, yerekana ko Kagame atakiri President w’u Rwanda, kuko yahinduye itegeko nshinga atabyemerewe. Impamvu yabyo ni uko kuva bigenze kuriya, Kagame yahise aba (illegitimate President), bivuga ko yabaye President utemewe n’amategeko, ikaba ari nayo mpamvu Kagame muvuga nk’umuntu usanzwe, sinkimwita president kuko atakiri president wemewe n’amategeko. Icyo abantu bakwiye kumenya, ni uko mu gukora ibintu biteye isoni kuriya ahindura itegeko nshinga, Kagame yahaye inzira yemewe n’amategeko umunyarwanda uwo ariwe wese muri rusange ndetse na Guverinoma y’u Rwanda ikorera mu buhungiro by’umwihariko kumurwanya yivuye inyuma.
Yahumurije abanyarwanda ibaha ipica nyayo y’igisa na guverinoma Kagame ayoboye.
Guha abanyarwanda ipica nyayo y’igisa na Guverinoma Paul Kagame yashyizeho ejo bundi, nabyo ni ikintu gikomeye Guverinoma y’u Rwanda ikorera mu buhungiro yakoze, mu guhumuriza abanyarwanda. Ibi ndabivuga mpereye ku kuba abanyarwanda bararushijeho kubona neza ipica y’iriya ngirwa guverinoma ya Kagame, kuko nk’uko byasobanuwe na Guverinoma y’u Rwanda ikorera mu buhungiro iyobowe na Nyakubahwa Padiri Thomas Nahimana abanyarwanda basobanukiwe ko ingirwa guverinoma ya Kagame, ari “agatsiko k’abagizi ba nabi bitwaje imbunda, kagambiriye guheza abanyarwanda mu iterabwoba no mu bucakara hagamijwe gusa gukomeza kubarya imitsi”. Ibi bikaba bimaze guhumuriza abanyarwanda benshi, kuko barimo kurushaho kubona ko ubutegetsi bwamaze kugaragara nk’ubw’abagizi ba nabi buba buri hafi yo kuvaho, bityo abanyarwanda tukabona twaruhuka.
Yahumurije abanyarwanda ibamenyesha ko itagikeneye kuganira na Kagame n’agatsiko ke kahisemo gukanda no gusuzugura abanyarwanda.
Kumenyesha abanyarwanda bidasubirwaho ko udakeneye kuganira na Kagame n’ubutegetsi bwe, ni inkuru nziza cyane kandi ikomeye. Ibi byahise byumvisha abanyarwanda ko Guverinoma y’u Rwanda ikorera mu buhungiro ifite impamvu zo kwitwara kuriya! Izo mpamvu zikaba zishingiye ku kwiyizera, no kuba ishyigikiwe n’abanyarwanda ndetse n’amahanga. Kuba Guverinoma y’u Rwanda ikorera mu buhungiro yarageze aho ifata iki cyemezo, byeretse abanyarwanda ko ubutegetsi bubi bwa Kagane atari kamara. Iki kikaba ari nacyo abantu bifuzaga kwumva kuva na mbere hose, kuko birushaho kubumvisha ko burya hari abanyarwanda bashobora kuvana mu nzira buriya butegetsi bwigize akarahakajyahe!
Kuba Guverinoma y’u Rwanda ikorera mu buhungiro iyobowe na Nyakubahwa Padiri Thomas Nahimana yarageze aho itangaza ko itagikeneye kuganira n’ubutegetsi bw’igitugu bwa Kagame Paul, ni ikintu gikwiye, ukurikije n’aho ibintu bigeze. Nawe se, Guverinoma y’u Rwanda ikorera mu buhungiro yakoze ibishoboka byose, isaba imishyikirano Kagame n’abo bafatanyije gutsikamira abanyarwanda, ariko kubera agasuzuguro karenze urugero ubutegetsi bwa Kagame bwashyize ku banyarwanda kuva cyera, ndetse n’agasuzuguro bagiriye abanyarwanda banga gufungura urubuga rwa politiki (Political space) nyuma y’imyaka myinshi, buriya butegetsi bwakomeje kuvunira ibiti mu matwi. Ni byiza rero, kuba igihe cyarageze, maze Guverinoma y’u Rwanda ikorera mu buhungiro ikamenyesha Kagame n’agatsiko ke ko itagikeneye kuganira nabo, nyuma yo kubaha igihe gihagije maze bakanga kwumva. Kagame yajyaga acyeka ko iriya Guverinoma idashobora kugera kuri iyo ntambwe, ariko yasanze yaribeshye cyane! Erega “na nyina w’undi abyara umuhungu”!
Uru ni urugero rwiza cyane n’abanyarwanda twese muri rusange twagombye gukurikiza, maze tukitandukanya na Kagame n’agatsiko ke, dushyigikira byimazeyo Guverinoma y’u Rwanda ikorera mu buhungiro, kuko imaze kugaragaza ko ihangayikishijwe n’ubugome Kagame n’agatsiko ke bakomeje gushyira ku banyarwanda babakorera genocide idashira n’ubu bagikomeza! Uburyo bwiza bwo gukurikiza runo rugero rwa Guverinoma ikorera mu buhungiro bukaba nko kwanga kwitabira gahunda zose Kagame n’agatsiko ke babeshya abanyarwanda ko babakorera, maze ndetse bakanga no kujya ku kazi (Civil disobedience). Maze mukareba ukuntu nyuma y’iminsi 4 kariya gatsiko gafata inzira kagahunga abanyarwanda ku manywa y’ihangu izuba riva, nta no kureba inyuma! Ikindi mu bijyanye no kuyishyigikira, ni byiza ko buri wese atanga inkunga y’amafranga uko yifite, kugirango ibikorwa byayo birusheho kugenda neza kandi vuba, kugirango idukize umwanzi w’abanyarwanda ariwe Paul Kagame n’agatsiko ke.
Ikindi cyagaragariye abanyarwanda ubwo Guverinoma y’u Rwanda ikorera mu buhungiro yatangazaga ko itagikeneye kuganira na Kagame n’agatsiko ke, ni uko byagaragarije abanyarwanda ko Guverinoma y’u Rwanda ikorera mu buhungiro idatinya na gato Kagame n’agatsiko ke. Ikindi byerekanye, ni uko nta cyubahiro na gito Guverinoma ikorera mu buhungiro iha ingirwa guverinoma ya Kagame, kuko itagikwiye. Inkoramaraso ntizikwiye kubahwa, ahubwo ziba zigomba gusuzugurwa. Iki kikaba ari ikintu cyo kwishimira cyane! Ibi birumvikana rwose kuko byavuye ku kuba nta kindi Kagame n’agatsiko ke bamariye abanyarwanda, uretse kubica, kubakenesha, kubicisha inzara, ndetse no kubakamamo imisoro itagira ingano.
Yahumurije abanyarwanda ibamenyesha ko igiye gukora ibishoboka byose kugirango ihange inzira yo kugamburuza Kagame n’agatsiko ke.
Kuba Guverinoma y’u Rwanda ikorera mu buhungiro yaratangaje ko igiye guhanga inzira yo kugamburuza Kagame n’agatsiko ke, byatumye abanyarwanda biruhutsa, bumvise hari undi ushobora guhangara Kagame n’agatsiko ke! Iki, ni ikintu gikwiye kandi cyarangije kuzuza ibisabwa byose kugirango gishoboke, ukurikije aho Kagame ageze akandagira abanyarwanda.
Byonyine kuba Kagame agira atya, akavugururua itegeko nshinga mu buryo bw’amanyanga kugirango abone mandat ya 3 iryo tegeko nshinga ritamwemerera, hiyongereyeho no kuba yaraniyamamaje n’igitugu cyinshi, yangira abandi banyarwanda kwiyamamaza ! Yarangiza, akabeshya ko yatsinze ingirwamatora ya President wa Republika kandi nta munyarwanda umushaka, ibyo byonyine birahagije kugirango uwashaka kumurwanya uwo ariwe wese, abe abifitiye uburenganzira bwemewe n’amategeko. Muri iki gihe, Kagame yiyita President w’u Rwanda kandi atakiri we! Mandat ye ya 2 ari nayo ya nyuma yararangiye. Ubungubu, Kagame ni “illegitimate president” (president utemewe n’amategeko). Ibi rero, ntibizashoboka, kandi nawe arabizi. Muzarebe ubwoba yari afite ubwo yarahizaga icyo we abeshya ko ngo ari Guverinoma!!! Nawe ubwe, azi ko yatanze inzira yumvikana yo kumuvana ku butegetsi. Buriya niyo mpamvu mwabonye afite ubwoba burenze kamere! Aha, umunyarwanda wese yashimira Guverinoma y’u Rwanda ikorera mu buhungiro, kuko ifashe iya mbere mu kwiyemeza guhanga inzira yo kugamburuza Kagame n’agatsiko ke! N’ubwo nta wamenya uko iriya Guverinoma ikorera mu buhungiro yaba iteganya kubigenza, ikigaragara, ni uko ubu inzira zose zo kuvanaho buriya butegetsi zishoboka, ndetse harimo n’iyi ntambara.
Amategeko rero, yemera neza ko ubutegetsi bw’igitugu nka buriya bwa Kagame, buba bushobora kuvanwaho hakoreshejwe intambara. Ibyo bigaragarira muri Chapter 7 ya UN Charter, aho bavuga ko ubutegetsi bwica abenegihugu aho kubarinda, ubutegetsi bubuza abenegihugu uburenganzira bwabo bwibanze (fundamental rights) burimo n’uburenganzira bwo kubaho (right to life), abenegihugu baba bafite uburenganzira bwemewe n’amategeko bwo kubuvanaho. Inzira Guverinoma y’u Rwanda ikorera mu buhungiro igiye guhanga ntawamenya iyo ari yo, ariko ikigaragara ni uko iramutse inahanze inzira ijyanye n’urugamba rw’amasasu ntabwo cyaba ari ikizira rwose.
Burya rero koko, ngo “Iso ntakwanga akwita nabi”, Kagame aranze aragamye, arashaka kuyobora u Rwanda ubuzira herezo, nk’aho u Rwanda nta bandi bana rwabyaye bashobora kuruyobora, kandi bakanaruyobora neza kurusha uko Kagame na FPR ye babigenje. Kagame na FPR, bakoresheje intambara, babeshya ko bagiye kubohoza abanyarwanda, ariko ibyo bakoze byaruswe kure n’uko ibintu byari byifashe mbere ya 1994, n’ubwo bitari shyashya. Kuba Kagame rero yanga kuva ku butegetsi ku neza, ni agasuzuguro karengeje ukwemera, abanyarwanda badashobora kwemera. Ngaho nimurebe ibintu Kagame n’agatsiko ke bamaze iminsi bakorera Diane Rwigara n’umuryango we! Gufunga Diane, umubyeyi we n’abavandimwe be, bazira gusa ko Diane yashatse kwiyamamariza kuba President w’u Rwanda, kandi abifitiye uburenganzira ahabwa n’amategeko, ibyo byonyine ni agahomamunwa! Iyi nayo ni impamvu yatuma n’uwakoresha intambara kugirango abohore uriya muryango ndetse n’abanyarwanda muri rusange baboshywe n’iriya ngoma ngome bazira akamama, ntawamuveba. Uretse ko mu kiganiro President wa Guverinoma y’u Rwanda ikorera mu buhungiro Nyakubahwa Padiri Thomas na Ministre w’intebe muri iyo Guverinoma Madame Immaculée Kansime baherutse kugirana n’umunyamakuru Bwana Jean Claude Murindahabi, basa n’aberuye, bemeza ko mu nzira zisigaye bagiye gukoresha mu kuvana Kagame ku butegetsi, harimo n’iyintambara.
Umubyeyi wa Diane ariwe Madame Adeline Rwigara yanze rwose kuripfana, maze abwira abanyarwanda uko abona ubutegetsi bwa Kagame! Yavuze ko Kagame na FPR ye, ari “interahamwe z’urundi rwego”!!! Bivuga ko yashakaga kuvuga inkotanyi zirusha ubugome interahamwe, inshuro nyinshi, akurikije ibyo bari bamaze kumukorera ! Ngaho namwe nimunyumvire! Nimutekereze namwe bwa bugome interahamwe zicanye abantu, hanyuma noneho mutekereze ko ngo burya abadutegeka ubu ngo bazirusha ubugome, noneho bikaba binemezwa n’uwarokotse icumu ry’interahamwe muri genocide yakorewe abatutsi muri 1994!!! Uyu mubyeyi akwiye gushimirwa, kuko ashubije ikibazo benshi bajyaga bibaza, mu gihe Kagame n’agatsiko ke batasibaga kubeshya abanyarwanda n’amahanga ko ari abatagatifu! Ariko Rwanda waragowe koko; ukwiye gutabarwa. Guverinoma y’u Rwanda ikorera mu buhungiro rwose nitabare, kandi ubwo ibishaka izabishobora, kuko nk’uko babivuga mu rurimi rw’igifaransa “Qui veut peut”. (Bisobanura ko gushaka ariko gushobora). Nidushyigikire rero iriya Guverinoma ikorera mu buhungiro nk’abanyarwanda twese, maze mwirebere ukuntu ibintu bigiye guhinduka mu kanya nk’ako guhumbya, maze tugakira bariya bicanyi burundu, twibanira mu mahoro.
Yahumurije abanyarwanda ishimira amahanga yiteguye gufasha rubanda kwishyiriraho ubutegetsi bushingiye kuri “democracy”.
Kuba Guverinoma y’u Rwanda ikorera mu buhungiro igeze ku rwego rwo gushimira ibihugu byiteguye gufasha abanyarwanda kwishyiririraho ubutegetsi bushingiye kuri “democracy”, nacyo ni igikorwa gikomeye cyane, iriya Guverinoma yakoze! Ibi byerekana ko iriya Guverinoma ikataje mu kugirana imishyikirano n’ibihugu bitandukanye birimo n’ibituranye n’icyacu (diplomacy), mu rwego rwo gushaka inzira yo kuvanaho buriya butegetsi burenze kuba bubi, kandi nibyo bikenewe.
Kuba bigeze kuri ruriya rwego, birerekana ko iriya Guverinoma ikora neza kandi ikaba yarumviswe n’amahanga kuko ifite impamvu ifite ishingiro (just cause) yo kuvanaho buriya butegetsi. Ibi bikaba bisobanura ko nta kindi gisigaye, uretse kuba abanyarwanda twese tugiye guhaguruka tukirwanaho, turangajwe imbere n’iriya Guverinoma y’u Rwanda ikorera mu buhungiro tugasezerera buriya butegetsi bwa Kagame, maze tukishyiriraho ubundi butunogeye kandi turabishoboye. Iyo urebye ukuntu iriya Guverinoma ihuriwemo n’abahutu n’abatutsi kandi bavuga rumwe ku bibazo by’igihugu cyacu, warangiza ukanareba ukuntu ihuriwemo n’amashyaka atandukanye, ndetse ikaba initeguye kwakira n’abandi banyarwanda bifuza kuyijyamo, usanga ari igitego cyiza cyane abanyarwanda dutsinze Kagame! Ibyo byonyine niyo ntwaro igiye gutuma iriya Guverinoma itsinda ruriya rugamba. Mwibuke ko Kagame yagiye avuga ko umunsi abahutu n’abatutsi bafatanyije, ngo atazigera aruhanya, kuko ngo azahita we ubwe ahunga agasubira mu ndacye, iyo yaje aturuka. Ibi ku rundi ruhande bivuga ko Kagame yaharaniye gutandukanya abanyarwanda, aho kubunga nk’uko akunze kubibeshya. None se ko Guverinoma iyobowe na Nyakubahwa Padiri Thomas Nahimana ndetse na Nyakubahwa Ministre w’intebe Madame Immaculée Kansime Uwizeye yamaze kwunga abahutu n’abatutsi, Kagame aracyabeshya iki, yavuye mu nzira inzira zikigendwa, maze akareka abanyarwanda tukibanira mu mahoro? Ibya Kagame rero byarangiye, iriya Guverinoma igiye kumufata mpiri, imubaze ibyo yakoreye abanyarwanda, cyane ko yanashyizeho urukiko rwa Rubanda ndetse na Procureur general warwo, bitehuye gukorera rubanda yarenganyijwe na Kagame n’agatsiko ke.
Ikigaragara kandi gishimishije, ni uko biboneka ko Guverinoma y’u Rwanda ikorera mu buhungiro imaze kwemerwa n’amahanga yatangiye kugira umusaruro, kuko yatangiye kuvugana n’amahanga yaba aya hafi ndetse n’aya kure. Ibi rero bikaba binatanga n’icyizere, cyane cyane umuntu ashingiye byonyine no k’ukuntu ibihugu byo mu karere bitacyumvikana na Kagame n’ubutegetsi bwe kuko byamaze gusobanukirwa n’uwo Kagame ari we. Ingero zirahari: u Burundi, Tanzaniya na Republika iharanira demokarasi ya Congo, ntibicyumvikana n’ubutegetsi bwa Kagame, ibyo si ibanga! Mwibuke noneho ko n’abashyize Kagame ku butegetsi batakimwemera! Urugero ni ibyabereye ejo bundi i New York ku cyicaro cy’umuryango w’abibumbye (United Nations), ubwo President wa Leta zunze ubumwe za Amerika Bwana Trump, yaramutsaga abandi bakuru b’ibihugu byose bari aho, maze agatambuka kuri Kagame, atanamuhereje umukono kandi amureba! Ibi byonyine byagombye kwumvisha Kagame n’ubutegetsi bwe ko ntacyo bakiri cyo, maze bagakinguruka abanyarwanda bagahumeka. Iri ni isomo rikomeye cyane Kagame atazibagirwa, rinatuma arushaho guhangayikishwa n’ejo hazaza he kubera ibibi yakoreye abanyarwanda!!! Ibi binavuga koko ko u Rwanda nta President rugifite, nk’uko twabimenyeshejwe na Guverinoma y’u Rwanda ikorera mu buhungiro! None se, Kagame utacyemerwa n’amahanga, ni President nyabaki???!!! Rwose birashimishije cyane kubona Kagame yajya yabona aho bigeze!
Yahumurije abanyarwanda isaba umuryango mpuzamahanga gufatira Kagame n’agatsiko ke ibihano mu nzego zitandukanye.
Gufatira ubutegetsi bwa kagame ibihano mu nzego zitandukanye, nayo ni inkuru nziza abanyarwanda twishimiye, ubwo Guverinoma y’u Rwanda ikorera mu buhungiro yatangazaga iyo nkuru. Ni byiza ko agatsiko nka kariya ka Kagame gafatirwa ibihano byo nu rwego rwa gisirikare kugirango kabure aho kagura intwaro, kuko n’ubundi izo gafite ari izo kwica abanyarwanda aho kubarinda. Ikindi kandi, gufatira agatsiko nka kariya ibihano byo mu rwego rw’ubukungu, kugirango gacike imbaraga mu gukomeza kwiba amafranga yagombye kugirira akamaro rubanda mu nzego zitandukanye, nabyo ntako bisa! Uretse n’ibyo, Guverinoma y’u Rwanda ikorera mu buhungiro, yanasabye amahanga gufatira Kagame n’agatsiko ke ibihano mu rwego rw’ubutabera mpuzamahanga. Iki nacyo ni ikintu cyiza cyane, biturutse ku kuba Kagame n’abo bafatanyije guhekura abanyarwanda bagomba kubura aho bahungira, bagafatwa n’ubutabera mpuzamahanga, bityo bakabazwa ibibi byose badukoreye, byiganjemo ibyaha by’itsembabwoko (genocide), ibyaha byibasiye inyoko muntu (crimes against humanity), ndetse n’ibyaha by’intambara (war crimes).
Ubutegetsi bwa rubanda rero n’ubundi, ni gutya bukora. Ni ububahumuriza, bukabayobora neza, bwubahiriza uburenganzira bwa buri wese kandi bukabateza n’imbere, si ububahahamura, bubica nk’ubwa Kagame. Mwibuke ko guhumuriza abanyarwanda byananiye ubutegetsi bwa Kagame! Bivuga ko rero, ari intambwe ikomeye cyane ku banyarwanda, kuko kuva muri 1994, abanyarwanda bari baramenyereye guhahamurwa n’ubutegetsi bubi bwa Kagame, n’ubwo “akabi katamenyerwa”. Iyi rero, niyo mpamvu ituma abanyarwanda twumva bikwiye ko Guverinoma y’u Rwanda ikorera mu buhungiro iyobowe na Nyakubahwa Padiri Thomas Nahimana, aribwo butegetsi bwiza bubereye abanyarwanda, kuva bwaranatangiye kubavuganira bukiri no hanze y’igihugu, kandi bikaba bimaze kuboneka ko amahanga yamaze kwumva no kwemera iriya Guverinoma.
Mu gusoza, iyi nyandiko yasobanuye impamvu nyamukuru zatumye Guverinoma y’u Rwanda ikorera mu buhungiro ihumuriza abanyarwanda, ari nazo zerekana koko ko, aribwo butegetsi bubereye abanyarwanda. Izo mpamvu ni ukuba Guverinoma y’u Rwanda ikorera mu buhungiro yaramenyesheje abanyarwanda ko Kagame atakiri President w’u Rwanda; kuba yarahumurije abanyarwanda ibaha ipica nyayo y’igisa na Guverinoma Kagame ayoboye; kuba yarahumurije abanyarwanda ibamenyesha ko itagikeneye kuganira na Kagame n’agatsiko ke; kumenyesha abanyarwanda ko igiye guhanga inzira yo kugamburuza Kagame n’agatsiko ke; kuba yarashimiye amahanga yiteguye gufasha abanyarwanda kwishyiriraho ubutegetsi bushingiye kuri democracy; no kuba yarasabye amahanga gufatira Kagame n’agatsiko ke ibihano bitandukanye.
Guverinoma y’u Rwanda ikorera mu buhungiro, niyo ikwiye kuyobora abanyarwanda, kuko ibahumuriza abanyarwanda, ubugome bagiriwe na Kagame afatanyije na FPR ye. Kuba iriya Guverinoma y’u Rwanda ikorera mu buhungiro yarahumurije abanyarwanda, bifite ishingiro kandi iyo witegereje neza, usanga izanashobora no kubigeraho. Kuba iriya Guverinoma ifite ubushake, ikaba yemewe n’abanyarwanda ndetse n’amahanga, kuba ihuriyemo n’abahutu n’abatutsi Kagame yakomeje gutanya kuva yajya ku butegetsi, byonyine ni ibimenyetso byerekana ko iriya izashobora guhumuriza abanyarwanda koko bitari amagambo gusa. Ikindi kandi, biranaboneka ko guhangana na Kagame n’agatsiko ke, bitazanafata n’igihe kinini, ukurikije aho Kagame ageze atacyemerwa n’abanyarwanda ndetse n’amahanga.
Kagame utacyemewe n’amahanga ntacyo azatumarira. Nimureke tumuvaneho amaboko dushyigikira Guverinoma y’u Rwanda ikorera mu buhungiro, maze murebe ko ataribwo tuzaba twiyubakiye amahoro n’amajyambere birambye mu guhugu cyacu.
Niyomugaba Jean de la Paix
Kigali – Rwanda.
