Burundi: Gen Evariste Ndayishimiye yemejwe nk’umukandida ku mwanya wa Perezida mu matora ya 2020.

Evariste Ndayishimiye

Kuri iki cyumweru 26/01/2020 niho Jenerali Majoro Evariste Ndayishimiye yemejwe n’abarwanashyaka b’ishyaka CNDD-FDD ngo azawuhagararire mu matora ateganijwe mu kwa gatanu uyu mwaka wa 2020.

Yatowe mw’ikoraniro kaminuza ridasanzwe ry’iryo shyaka ryabereye i Gitega, umurwa mukuru wa politike w’u Burundi, inyuma y’igikorane cyari kimaze minsi itatu kibera muri iyo ntara.

Iryavuzwe riratashye kuko izina rya Evariste Ndayishimiye ryari rimaze iminsi rizunguruka ku mbuga nkoranyambaga zitandukanye ko ari we afite amahirwe yo guhatanira uwo mwanya kugira ngo asimbure Perezida Petero Nkurunziza.

Evariste Ndayishimiye yinjiye mu rutonde rw’abandi ba candida bamaze kumenyesha ko bemejwe n’amashyaka yabo kugira ngo bayahagararire muri ayo matora ategurwa ko azaba ku wa 20/05/2020. 

Mu mwaka wa 2018, u Burundi bwahinduye itegeko nshinga, ibyanuganurwaga ko yari amayeri ya Perezida Nkurunziza yo gushaka kuguma ku butegetsi, nk’uko abakuru b’ibihugu byinshi by’Afrika basanzwe babigira.

Hagati aho, umunsi arishyiraho umukono yatangaje abatari bake igihe yamenyeshereje ko atazisubiraho ku byo yari yemeye igihe yiyamamazaga mu 2015, ko cyari ikiringo cye cya nyuma. 

Rero, ayo matora abaye mu ishyaka CNDD-FDD akemuye impaka ku bibaza ko Perezida Nkurunziza yari agifite umugambi wo kongera kwiyamamaza ngo akomeze kuyobora igihugu.

Evariste Ndayishimiye yijeje abagumyabanga n’abarundi ko nta gushidikanya yizeye ko mu matora bizagenda neza, ayobore u-Burundi. Yiyemeza gushyira ikirenge mu cya Nkurunziza mu gukora nk’uko yakoraga.

Evariste Ndayishimiye ni nde?

Evariste Ndayishimiye ni umunyamabanga mukuru w’ishyaka riri ku butegetsi CNDD-FDD kuva mu kwezi kwa munani 2016, aho habaye amavugurura muri iryo shyaka , asimbura Pascal Nyabenda wari umukuru waryo.

Yavukiye muri komine Giheta y’intara ya Gitega ubu isigaye ari umurwa mukuru wa politike w’u Burundi kuva mu 2018.

Evariste Ndayishimiye yari asanzwe avugwa cane mu bafise amahirwe
Evariste Ndayishimiye yari asanzwe avugwa cyane mu bafite amahirwe

Jenerali Ndayishimiye azwi ko yarwanye mu ntambara yarose mu Burundi nyuma y’iyicwa rya Perezida Melchior Ndadaye wari umaze amezi atatu ku butegetsi.

Melchior Ndadaye yari yatowe ku wa 01/06/1993, ashikirizwa ubutegetsi ku wa 10/07/1993. Inyuma y’amezi atatu gusa, ni ukuvuga ku wa 21/10/1993, yishwe n’igisirikare cy’icyo gihe, bihita bituma igihugu cyinjira mu ntambara hagati y’Abarundi yamaze imyaka irenga icumi.

Jenerali Ndayishimiye ari mu bacitse kw’icumu mu bwicanyi bwakorewe abanyeshuri b’Abahutu muri kaminuza y’u Burundi mu kwa gatandatu 1995.

Yaciye asanga abandi barwanyi mu ishyamba, icyo gihe bitwaga CNDD ishami ryawo rikitwa rya gisirikare rikitwa FDD, bayobowe na Leonard Nyangoma yawutangije mu 1994.

CNDD-FDD, imaze kwinjira mu masezerano y’amahoro ya Arusha yo mu 2000 ugashyira intwaro hasi mu 2003, Jenerali Ndayishimiye yakoze mu biro bikuru bya gisirikare.

Nyuma y’amatora y’umukuru w’igihugu ya 2005 yatsinzwe na CNDD-FDD, Jenerali Ndayishimiye yagizwe Ministre w’ubutegetsi bw’igihugu mu 2006-2007, imbere y’uko agenwa kuba umujyanama mu biro by’umukuru w’igihugu.

Ku myaka 52 y’amavuko, Evariste Ndayishimiye abarwa mu bategetsi bakomeye b’igihugu.

Itangazo risoza ikoraniro Kaminuza rya Cndd-Fdd aho batoye Evariste Ndayishimiye usanzwe ari umunyamabanga mukuru wayo kugira ngo abe ariwe azayihagararira mu matora mu mwanya w’Umukuru w’Igihugu mu matora yo mu 2020

LEAVE A REPLY

This site uses Akismet to reduce spam. Learn how your comment data is processed.