Madamu Adeline Rwagara Mukangemanyi yitabye RIB

Yanditswe na Arnold Gakuba

Amakuru dukesha Radiyo “Ijwi ry’Amerika” kuri uyu wa 23 Mata 2021 aravuga ko ejo ku wa 22 Mata 2021 Madamu Adeline Rwigara Mukangemanyi, aherekejwe n’umwunganira mu mategeko, yitabye ihamagarwa rya gatatu urwego rw’igihugu rushinzwe ubugenzacyaha (RIB), aho yahaswe ibibazo bitandukanye byamaze hari amasaha atandatu. 

Guhamagarwa na RIB kwa madamu Adeline Rwigara ngo byaba bifitanye isano n’umuhango wo kwibuka umutware we Asinapolo Rwigara, wabaye ku wa 27 Werurwe 2021 wabaye hifashishijwe ikoranabuhanga rya Zoom. Nk’uko byemezwa n’umuvugizi wa polisi Thierry Murangira, ngo Madamu Adeline Rwigara araregwa ibyaha bikurikira hashingiwe ku ngingo ya 39 y’Itegeko ryo kurwanya ibyaha bikorerwa ku ikoranabuhanga :

1. Gukwirakwiza ibihuha,

2. Kuyobya rubanda (guhamagarira abaturage kwanga y’Ubutegetsi),

3. Kubiba amacakubiri.

Madamu Adeline Rwigara we  yavuze ko mu byaha aregwa harimo no guhakana jenoside yakorewe abatutsi. Ku bijyanye no kwangisha abaturage ubuyobozi, yabwiwe ko ibyaha aregwa bigaragarira kubyo yanyujije kuri Quick TV ku tariki ya 4 Mata 2021. Uregwa ibyaha byose yabihakanye abwira RIB ko nta kinyamakuru yatumiye muri gahunda yo kwibuka umutware we ko nta n’uwo yatumye kugira icyo atangaza. 

N’agahinda kenshi, Madamu Adeline Rwigara aribaza niba kwibuka umutware we nacyo cyaba ari icyaha. Abajijwe niba nta bwoba afite bwo gufungwa, Madamu Adeline Rwigara yasubije ko nta bwoba na buke afite, gusa avuga ko ababajwe cyane no kubona aregwa gukahana jenoside, kimwe mu byaha yahanaguweho. Madamu Adeline Rwigara abajijwe niba ntacyo yongera kubyo yabwiye umunyamakuru, yasubije ko ababajwe n’ihohoterwa arimo gukorerwa ryo gushyirwaho ibyaha atigeze akora.

Ubuyobozi bwa RIB bubajijwe impamvu Madamu Adeline Rwigara yemerewe gusubira iwe bwavuze ko bwasanze nta mpamvu afite yatuma adasubira iwe. 

Madamu Adeline Rwigara akaba azongera kwitaba RIB ku wa kane utaha tariki ya 29 Mata 2021.