ABANTU BENSHI CYANE CYANE ABO MULI OPPOSITION BAKOMEJE KUVUGA NGO LETA ILIHO YANZE IMISHYIKIRANO, BAKEMEZA KO IGIHE IZAYEMERERA ALIHO BYAKEMUKA BYOSE

Prosper Bamara

Jye nakwitegereza nkasanga hari igihe biba ali urwitwazo, no gushaka guhunga ibibareba nabo ubwabo, bagira ngo bereke ababumva ko utuma bizamba ari uriya wicaye ku ntebe wenyine!

Abanyarwanda twakwemeye ko amafuti tuyasangiye n’amateka tukaba tuyasangiye ra!

Nakwitegereza uko ruba rwambikanye mu bagize opposition ubwayo, nkibaza nti uretse na Leta se buliya, aba bo uwabasaba kubanza kwicarana nk’abarwanya ubutegetsi, bakagirana imishyikirano bo ubwabo aho kumvikana byazaborohera? Ndebera Indatsimburwa rurambikanye n’abo mu Rukatsa-FPP nayo ili muli Nouvelle Generation; Reba Boniface na BANYARWANDA contre Nouvelle Generation (ibitutsi ni byose no guhangana); ubu se tuvuge iki kuli RNC na PPR-Imena; Abaharanira ugutsinda kw’abahutu gusa batitaye ku bindi maze bagakora amakosa menshi anadindiza opposition yose; abaharanira ugutsinda kw’abatutsi gusa bazi ngo bazarusha abandi ubwenge; Reba hagati ya za FDU zombi (umuhuza azaba nde?); … Abatuka Twagiramungu na Gasana Anastazi, Mukaru Habyarimana, Rusatira, n’abandi ngo bagurishije … (birebire); … Wareba abaharanira ko abahutu ngo batsinda bagafata ingoma nk’uko byahoze, bakaba babangikanye n’abayishaka ali iy’abatutsi gusa ngo bayigundire nka cyera, ugasanga aba bose nabo bari mu byahise byataye ibara!! … ingero zaba nyinshi cyane.

Ikibazo: Imishyikirao benshi bifuza yaba hagati ya nde na nde? Abarwanya ubutegetsi se ko nabo batororaheranye, ubwo Leta iramutse ari ishyikirana yashyikirana na nde?

Bahurije hamwe bose se maze buli wese akagaragaza ibyo yifuza, abantu bagashakisha uko bahuza inyungu! Imishyikirano “hautement inclusifs” bamwe bavuga ishobora no guhindukakamo akajagari. Kuko hazaba intambara hagati ya buli wese n’undi, no hagati ya buli wese na Leta! Iyo mishyikirano ra!

Nimucyo tube twitonze gato, tuyigenere umurongo.

Niyo mpamvu jye nemera ko icyatabara benshi, ali uko Leta yafata iya mbere ikazana “reformes” zikenewe, ibintu bigatangira kugenda bihinduka itabigizemo uruhare. Naho iby’imishyikirano bishobora kuzagorana, ahubwo hakaba habaho guhita bigana muli rwaserera isa n’intambara! Ndavuga mu gihe Leta yaba inaniwe gufata iya mbere no kuzana “reforms”. Bishobora gutarukira mu gufatana mu ijosi no mu gutakaza abantu benshi cyane n’ibintu byinshi cyane.

Twaganiraga

Prosper Bamara