Yanditswe na Albert Mushabizi
Ubu bugeni Prezida KAGAME yononnye, mu igisa n’imbwirwaruhame y’urukozasoni, ahakavugiwe imisango; bwari ubwa TETA na MARVIN, bari bambikanye impeta yo kuzabana akaramata, kuri uyu wa Gatandatu, taliki ya 06 Ugushyingo 2021! TETA uyu akaba ari umukobwa w’uburiza wa Nyakwigendera General Fred GISA RWIGEMA.
Imbwirwaruhame y’umukuru w’igihugu [ahakavugiwe gusa imisango y’ubugeni] uzonzwe n’umujagararo [stress], itateguwe nk’uko byakagombye; ibyari birori by’imfura bigahinduka gutanga imikoro idashoboka, no kwandarika igihugu gituranyi!
Niba abatabarutse bakurikiranira hafi ibyo abakiri ku isi tubamo, nk’uko abantu benshi babitekereza; nta shiti ko Nyakwigendera Generali RWIGEMA yumijwe n’amagambo adakwiye yavugiwe mu bugeni bw’umukobwa we, n’umugabo w’umusangirangendo wakagombye kuba yamubereye mu kigwi, abera umugeni umubyeyi. Icyakora koko ibijujurwa na benshi mu abatangiye urugamba rw’iya mbere Ukwakira, barimo nka ba Major Michael MUPENDE n’abandi, byashoboka ko ari ukuri kwamye, nk’uko imyitwarire ya Prezida KAGAME muri buriya bugeni yabishimangiye. Byumvikane ko ari abatabarutse n’abitabiriye buriya bugeni imbonankubone, cyangwa se iyakure (online); bababajwe ariko ntibatungurwe n’ibyabaye, n’ubwo rwose ari urukozasoni.
Prezida KAGAME yahawe ikaze mu ijambo na Madamu Jeannette RWIGEMA ubwe. Nyuma yo gushima Imana, umukwe n’umugeni ndetse n’umuryango wa KAMANZI [Bamwana we], yanashimye KAGAME ko yabaye hafi akanafasha urugo rwa RWIGEMA; mu buryo bumwe n’ubwo umubyeyi wa Kalisa MUPENDE yashimyemo umukuru w’igihugu na none, mu birori byo gusezera bwa nyuma, kuri uwo muhungu we wari wahitanwe n’Ingoma iyoboye igihugu, ku mabwiriza y’umukuru w’igihugu ubwe. Impamvu aya mashimwe yombi yahwanishwa, n’ubwo rwose ari ibirori bihabanye; ni uko muri ya migirire isanzwe iranga imfura, zitateshuka ku “ugushinjagira zishira”, nk’umwe mu migenzo mu iy’ibanze.
Mu byicaro bye, aho yari yicaranye na madamu we, Jeannette KAGAME, mu ntera hagati y’uwo muryango n’uwa RWIGEMA -intera nayo itarabuze kwibazwaho n’abakurikiranye ibirori-; maze imfura ziteraniye aho zitega yombi, uwo Jeannette RWIGEMA yari ahaye kuvuga, nk’umunywanyi ubimburira abandi w’umubyeyi watabarutse w’umugeni !
KAGAME yanzitse imbwirwaruhame ye, avuga ko ashimishijwe no kuba mu bukwe bwa Teta ku mpamvu z’uko ari umwe muri bo, kandi bikaba bifite n’amateka maremare. Yibukije ko Teta ari nk’umwana we, nk’uko afite abandi; kubw’uko ari umwana wa Jeannette na Gisa (RWIGEMA), ndetse akaba umwuzukuru wa KIMONYO. Yerekanye ko igihango hagati ye na Gisa mu miryango ya bombi ari icy’amateka ya kera na kare. Batahuriye gutyo mu buhungiro cyangwa mu ngamba zitandukanye batabaranyeho; ahamya ko na mama wa RWIGEMA wari aho atashidikanya ko ibirori by’umunsi, ari umusaruro mwiza w’intsinzi yo guhura kw’imiryango yahoze itataniye mu buhunzi, ikaba yarongeye kugira igihugu.
Yibukije mama wa RWIGEMA n’abandi bari aho ko umuryango we wakunze kubana n’uwa KIMONYO (se wa RWIGEMA), mu gihe KAGAME na RWIGEMA bo bari bato cyane, ndetse ko uko yagendaga yimuka mu nkambi zitandukanye za Uganda itatanaga, yagenderaga hamwe kubw’umubano mwiza… Yibukije iby’imiryango yabo ya kera, abaza niba bamwe bo muriyo baba bari aho… Yibukije uko we na RWIGEMA, bakundaga kujya kumva inkuru z’ibitero by’inyenzi kwa “Mariko” wari warazirwanyemo, anaca amarenga ko ariho baba barakuye umurage, wo kuzatabarira igihugu mu Inkotanyi…
KAGAME wari umaze kuvuga amateka y’ubwana bwe na RWIGEMA, wumva ari ibintu bitagize icyo bitwaye; yamenyesheje ko agiye gusubikira aho, amateka y’imiryango, maze akinjira mu mateka ya politiki y’igihugu! Ubanza ku abazi neza icyo ubugeni busobanuye mu muco nyarwanda, bacyumva ko KAGAME agiye kuvuga imisango ya politiki, batabuze gucurwa n’ibicuro bibi; ko yaba agiye kubatobera, akonona igitaramo cy’imfura, zakoranijwe no gushengerera ubugeni! Nyakibi ntirara bushyitsi!
KAGAME acyanzura igice cya kabiri cy’umusango we wa politiki, yonona nkana ubugeni bw’umwana afata nk’uwe bwite; yazinze umunya ahindurira ijwi rye mu rya Afande w’inyeshyamba utonganya ba kadogo! Abibasirwaga ubwo nk’uko yabanje yabarondora, bakaba umugeni Teta, mama we Jeannette na Nyirakuru ubyara se! Bibasirwaga bazira iki? Ukutaboneka mu bukwe kw’umuhungu w’imfura ya RWIGEMA. KAGAME ugira ibinyoma nk’ibya SEMUHANUKA, imitego y’ibyo yari yanzikiyeho abeshya ko ari mu kigwi cy’umubyeyi imbere ya TETA; yari itangiye gushibuka akihibereye! Agatsinda amahano nk’aya ntiyigeze ayatinyuka mu bugeni bw’umukobwa we bwite, Ange KAGAME, bwatashye umwaka ushize! Nguko uko yasubukuriye mu ruhame, intambara atigeze ahaho agahenge umuryango wa RWIGEMA. Ibya vuba byasashwe muri rubanda, bikaba urupfu rw’amayobera n’itabarizwa rya JOY mushiki wa RWIGEMA, umwaka ushize; byagaragayemo imigambi y’ubugome ndengakamere, yatunganyirijwe kukwibutsa umuryango wa RWIGEMA, ko uretse no kuwutoteza, no kubakuramo bamwe bagacurwa inkumbi, KAGAME atabigirira inkomanga ku mutima!
KAGAME wumvaga ntahandi azabonera umuryango wa RWIGEMA, yamaze kwicaho awihaho intera ihagije, akaba ahora awicira ku rwara nk’inda, byamwanze mu nda asanga aho mu bugeni, ariho ho kwaturira umujinya n’inzika nshya awufitiye; ngo aha nibatabyitwararika bakabona ibyago bishya bibagwa hejuru, ntibazamubeshyere ko atababuriye ubugeni buhangaje! Nuko aba arakomeje ati: “ndabatumye ngo umuhungu wa RWIGEMA yakagombye kuba ari mu gihugu, igihugu se natwe twese twaraharaniye!” Udushyi duke twa bamwe mu mbaga yari iguye mu gihirahiro ngo kaci kaci!! Ngizo za politiki z’urwiyerurutso zisigaye zitaha ubugeni mu rwa Gasabo! KAGAME asa n’ugabanyije umunya mu ijwi ati: “ibi sindibubitindeho ariko ndabatumye -barya batatu yarondoye- …. Umuhungu wa Fred ntiyashoboye gutaha ubu bukwe.. Mumumbwirire ngo… ko yagakwiye kuba ari hano… yagakwiye kuba ari mu gihugu… igihugu se n’abandi twese twaharaniye…” Wa musango wa politiki se uzabe ubaye ihumure ra!? Cyangwa izabe inkeke nshya igiye gutunarikwa ku mugeni, umubyeyi n’umukambwe (kazi), bahawe inshingano nshya zo gucyura uwahunze igihugu, azi neza ikimwirukansa!?
Ko umuhungu wa Fred atasuhutse aguye isari se, aho iki si ikimenyetso ndakuka ko amakenga yamwomokeje, yari afite ishingiro!? Umunsi yasubije abamutumweho ko, “inyamaswa y’amakenga make yishwe n’umututizi”; aho aba babyeyi bazishingikiriza ko intumwa iticwa, maze basohoze ubutumwa kwa Nyakubahwa!? Aho umutindi yanitse ntiriva, ababyeyi bari bambariye isango; ibyari ibirori by’ibyishimo byabahindukiyemo umukoro w’injyanamuntu, wa wundi uguhiga ukawuhiguza amagara!
Prezida KAGAME akimara gutanga ihumure ryo gucyura impunzi mu misango; yanashimiye TETA ko we ari intwari, kubera ko nk’igitsina gore, ajya hanze akagaruka, ntabe yakaka ubuhungiro! Ni koko se KAGAME yaba ahangayikishijwe n’ihunga ridasiba ry’abanyagihugu, barimo na muhungu wa Fred RWIGEMA? None kuki aho kwica ba Gitera atica ikibibatera!? Akiva kuri iyi ngingo rero, Prezida KAGAME usigaye ukorera imirimo ye y’umukuru w’igihugu mu misango y’ubukwe; yibutse ko ubwo bugeni bwa Teta na Marvin, yanabwuririraho akisanira umubano n’ibihugu bituranyi, ugenda urushaho kumuzambana! Ni ugusana cyangwa ni ukurushaho kuzambya!?
Abazi gusesengura imvugo y’umwana w’umwega; ubwo yari yamaze kurivumera!
-Iriki!?
-Ijambo!
-Ijambo nyabaki!?
-Igira hino nkongorere, ibihuru by’iki gihugu bisigaye byumva nk’Abantu! Urumva rero, kuva umuhungu wa RWIGEMA asigaye aza kunogereza imigambi mu gihugu… igihugu Nyakubahwa adasiba kwita igihugu cy’umwanzi… Buriya yahaga abo yatumye ubutumwa ko umuhungu wa RWIGEMA nawe yabaye umwanzi…Kandi ubwo abaye umwanzi nabo bizabandurukaho…Buriya kandi yibagiwe kubongereraho interuro abwira abo yakise abanzi be bwite, akabahwanisha nkana n’abanzi b’igihugu, ati: “itsemata-rovu-tayimu [It is a matter of time]!!”
Mu gisa n’impuhwe z’igisagirane, nyamara zitabuze gutera impumu, Prezida KAGAME yakomeje kwifatira ku gahanga igihugu gituranyi kivanga mu buzima bwite bw’Abanyarwanda, bibanze kuri we na Nyakwigendera RWIGEMA! Aha umuntu akaba atabura kwibaza kuri izi mpuhwe nk’iza bihehe, KAGAME yagaragarije Nyakwigendera, amushakashakishiriza abanzi bo gusangira ku ngufu; nk’aho yaba yarabimuhayeho umurage mbere yo gutabaruka! Abari bakoraniye muri ubwo bugeni kandi, wabonaga ku maso, bari bamaze gufatwa n’ihahamuka, bakimara kumva Prezida KAGAME araga urubanza rwananiye Leta ayoboye rwo gucyura impunzi, umugeni, umubyeyi we na nyirakuru! Buri wese wari witabiriye ubugeni, wabonaga ibimenyetso ku mashusho asa n’uwibazaga uko bizagendekera abo bagore, umunsi KAGAME yaje kubishyuza impunzi ye, na cyane ko benshi batahamyaga ko, nyaguhunga azemera kwishora mu menyo ya rubamba, kandi rwaracitse yambutse!
Mu gihunga cyinshi, Prezida KAGAME nk’ufite icyo yishinja, yakikiye ibyo yise “ibivugwa” -ahari ni za nkuru z’uruhare rwe rusesuye mu rupfu rwa RWIGEMA zihwihwiswa-, ko ari intambara bagabwaho n’igihugu gituranyi, kidahwema no kwigamba ko cyabaremeye, kibeshya ko ibyo bagezeho -gufata igihugu- babikesha umusanzu wacyo ntagereranywa! Yiyamye icyo gihugu kigize umuremyi “wacu”, kubyikuramo kubera ko “twaremwe” n’Imana.
Mu buryo bushobora kuba ari inshuro ya mbere, yashinje iki gihugu, kuba aricyo gituma abanyarwanda bahunga igihugu cyabo; anahamya ko imihate abo bayoborana igihugu bashyiraho ngo abaturage boye guhunga ingobyi yakabahetse, iki gihugu kiyiburizamo! Uyu mukino wo gushinja igihugu gituranyi, kuba impamvu ituma ubutegetsi bwa Kigali butagera ku mihigo bwiyemeje; ukaba ari umukino mushya cyane muri politiki y’ubudasa bw’Inkotanyi! Twizere ko mu guhigura imihigo, ku bayobozi b’ibanze, batazatera mu ndirimo y’umuyobozi wa “gavumenti”; ko ibyo bagambiriye kugeraho byose, bikomwa mu nkokora n’igihugu gituranyi! Abatavuga rumwe na Leta ya Kigali, amahanga n’imiryango mpuzamahanga, bari bakomeje kurega iyi Leta urugomo n’imiyoborere mibi; bave ku giti dore umuntu! Igihugu gituranyi nicyo cyo kubazwa byose!! Uwapfuye yarihuse, adataramiwe n’intore izirusha intambwe!
Prezida KAGAME kandi ntiyaciriye aho! Yagize atya anenga abavuga ko ku Imana ari heza, nyamara bababwira kuyisanga bagaseta ibirenge -ntumbaze abafite inshingano zo kwihutishiriza abandi urugendo rw’ubuzima bwo ku isi-!! Mu kugaragaza itandukaniro rye n’abo; ngo ni uko we nataha ku muremyi we azashinjagira, kubera ko nta mwenda we (Rurema) azaba atahanye -udushyi duke tw’abumijwe n’iyo ngingo ngo kaci kaci-!! Prezida kagame yageze aho avuga n’akari imurori, acyurira umuhungu wa Rwigema, ko abamushuka bamubeshya kuzamugira umuntu runaka mu Rwanda -ahari umukuru w’igihugu- nyamara ko batazabigeraho… Yavuze kugeza n’aho ahishuye ko yagiranye nawe ikiganiro kirekire akirangiza amashuri yisumbuye; yarangiza akamuha n’ubutumwa -ubufasha bw’amafaranga ahari- amushyikiririza TETA na mama we… Yashoje ahishura ko hagati ye n’umuryango wa RWIGEMA, harimo ikibazo cy’amatiku maremare, ndetse n’amagambo maremare; nk’uko bisanzwe iteka icyo kibazo nacyo agikoreza ugomba kwikorezwa ibibazo byose biremereye u Rwanda n’abanyarwanda: umuturanyi mubi! KAGAME yakuriye inzira ku murima, abafite ibyo bamubeshyera -ni ku rupfu rwa RWIGEMA yaciraga amarenga-, ko izo ntambara atazazirwana, kubera ko afite izindi ntambara zimushishikaje kurwana -ahari wenda yishishikarijwe n’izo arwana Mozambike, CAR na DRC aho yisahurira umutungo kamere-!
Prezida KAGAME akaba yashoje kwinigura muri iyi politiki ye guterana amagambo, kwandarika igihugu gituranyi, no gukoreza bamwe imikoro yamubereye ingorabahizi, harimo nk’uwo gucyura impunzi; yihohora ko nawe azi neza ko ibyo yavugiye aho bitari bikwiye! Mu buryo bwo kwihagararaho asobanura ko ari umunyapolitiki, bityo aho ari hose n’ahadakwiriye akaba agomba konona gahunda zisanzwe, azivangamo politiki! Mugusa n’uwica icyiru cyo konona ubugeni bwa TETA na MARVIN; yabemereye kuzabagabanyiriza ku mikoro y’umurengera, yibitseho -nk’umukuru w’igihugu ugisahura-! Ntiyaretse kandi no gucikwa ngo yishyire hanze ko, hari hashize igihe kirekire cyane atabonana na TETA, habe n’umubyeyi we, habe na nyirakuru! Niyo mpamvu ahari yaba yiniguye cyane, abahera umukoro w’injyanamuntu ubugeni buhangaje; ahari kuko ntahandi yari kuzabakura ngo awubahe, nk’uwubatse uruzitiro rukomeye hagati y’imiryango yombi!
Mu kurangiza iyi nkuru kandi nk’umwanditsi, twihishuriye ko kuba Prezida KAGAME yaritabiriye ubu bugeni, akabwitiranya n'”inama ya CHAMA” cyangwa se “inama ya Leta” cyangwa se “causerie morale”; bizagora ubu bugeni kuzagira urwibutso rw’amashusho. Ibi bikaba bishingiye ko abari bacyuje ubugeni, bisanze mu kindi giterane cya politiki, nayo iciriritse, – yubakiye ku matiku, amazimwe, isebanya n’iyandarika- bagahinduka amasura kubera ubwoba n’ihahamuka… N’ikimenyimenyi videwo y’ubugeni yari yasangijwe ku mbuga-nkoranyambaga, byaje kuba ngombwa ko ku bushishozi bwiza ikurwaho! Bishoboke ko iyi videwo yakuweho, hagamijwe kwirinda kwifashisha ubugeni bw’inzirakarengane, mu gutoteza amahanga, abanyagihugu… ;no kuyobya abanyarwanda gushakira ibisubizo by’ibibazo bibugarije ku gihugu gituranyi, aho kubaza abayobora igihugu ku nshingano bakomeje konona nkana!
Ijambo bwite Prezida KAGAME yavugiye mu bugeni bwa Teta na Marvin, waryiyumvira mu nkuru y’amajwi ya Therwandan.com ahakurikira!
