FPR yigize ikigirwamana ku buryo ishaka ko bayitura n'amaturo yari aya Kiliziya?

Genda kiliziya Gatorika mu Rwanda warakubititse, si ibanga nawe ugeze kumuteremuko.

Muti byifashe bite ?:Ndi umukiristu wa Diyoseze ya Kabgayi ariko natangajwe cyane n’aho mu gihe cy’ivanjiri yo ku cyumweru badusomera ibaruwa y’umushumba wa diyoseze ya Kabgayi akaba n’umukuru w’inama y’abepisikopi mu Rwanda.

S’ibanga kuko uwo muco turawusanganywe iwacu mu maparuwasi wo gusomerwa ubutumwa bwa musenyeli, uhagarariye intumwa ya Papa mu Rwanda cyangwa se ubwa Papa nyirizina bugenewe abakiristu Gaturika ku isi yose .

Ubwo butumwa busa nk’ubwasimbuye ivanjiri nta bundi ni ubwa cya Kigega cyiswe Agaciro Development Fund ndetse mu nyandiko muraza kwisomera Musenyeri Smaragde MBONYINTEGE we yagihaye Batisimu kuri uwo munsi akita ikigega cy’iterambere!!

Ni ubwa mbere mu mateka y’isi habayeho ibintu nk’ibi aho inama y’abepisikopi iterana aho kwiga ku karengane k’intama(abaturage) bashinzwe kuragira ahubwo bagafasha rushimusi kusogota n’izacitse kw’icumu.

Mbanje kwisegura ku basomyi ba The Rwandan kuko ntari bwivuge mu mazina yanjye muzi akarengane tubamo iminsi yose hano iwacu mu Rwanda uvuze ibintu uko ubibona iba ingengabitekerezo, ugakurwa ku kazi abana n’umugore ukabangarana ukabura ikibatunga. Rero benshi mu banyarwanda twahisemo guhumiliza ngo bucye Kabili. Abari hanze mujye mutuvuganira aho mubasha kugera ndetse ntimwibagirwe no kudusabira umunsi umwe twizeye ko ukuri kuzatsinda ikinyoma.

Ibintu bijya gucika twumvishe ku ma radiyo hose mu gihugu ko batangije ikigega cyiswe Agaciro DF reka sinakubwira abatuyobora batatugishije inama bati twihesheje agaciro twatanze imishahara yanyu mu Kigega, turaruca turarumira ntibyacira aho mu mirenge n’imidugudu inama ziratera ubutitsa ngo twiheshe agaciro naho biba uko, ukabaha utwo ufite, ubu mu miryango hafi ya yose ubukene buranuma.

Byumvikane neza ko nta munyarwanda batateye icyo gipindi ndetse no kugera k’umuturage waje kurema isoko azanye agatebo k’ibijumba barayagabanye! Abitwa abacuruzi bo uwo mwuga aho bukera barawurekera amasosiyete ya FPR kuko utwo bacuruje twose FPR iba yaduteye imboni bakatugabana.

Twibukiranye neza icyateye ishingwa ry’icyo Kigega Agaciro DF. Byavuye ku mutwe w’inyeshyamba wa M23 ubu wahindutse ARC, Leta ya Paul Kagame yashinze muri Congo kugira ngo yigwizeho imitungo ya Congo we n’agatsiko ke hanyuma akaba yari abikoze umwanya utari muto, nyuma amahanga akaza kumukomanyiriza agahagarika imfashanyo bageneraga leta yu Rwanda. None twe rubanda rugufi tukaba aritwe nsina ngufi ari kwigirizaho nkana ndetse tukaba turi ya ndogobe avuga agendaho.

Kubera kwigira Ikigirwamana mu gihugu amaturo y’abakene twaturaga mu Kiliziya nayo yiyemeje kuyashinga kontabule we(comptable) NCUTI Manasseh .

Birasekeje kandi biteye n’agahinda ibibazo by’uruhuli bivanze n’ubukene amadiyoseze yose afite muri rusange ukumva afasha leta y’inkora maraso ya Kagame idahwema kwica inzirakarengane z’abanyarwanda n’abanyekongo, igafata abana ba bakobwa n’ababyeyi babagore ku ingufu.

By’umwihariko Diyoseze ya Kabgayi ubu nibwo yari imaze kuzura agatwe aho Padiri MUSENGAMANA Papias yakoze akazi kadasanzwe kugira ngo igaruke ku murongo .

Dore bimwe mu bibazo twahise twibaza nk’abakristu :

1.Amafaranga kiliziya Gatulika mu Rwanda ikoresha iyakura he ?
Amafaranga ya za kiliziya zo mu bihugu bikiri mu nzira y’amajyambere ava mufashanyo z’abandi bakiristu bo hanze ndavuga i Burayi, Amerika, Canada,.. baba bigomwe kugira ngo ajye gufasha abakene, abo barwayi batagira ubitaho mbese umumaro wayo uvuze ko usa nk’uwa croix rouge ntiwaba wibeshye. Gusa n’uko nayo amaze gukendera kubera ubukungu butakifashe neza mu bihugu byabo none mu Rwanda abitwa abashumba ba Kiliziya Gatulika biyemeje kuyatwerera ingoma ya Kagame yahawe akato n’isi yose .(ese uruka afata uhitwa ?)
Ko tubona abana b’abasore n’inkumi bava ku mashuli barazingamye kubera imirire mibi ayo yo gushyira mu gaciro mwabaguriyemo ibishyimbo bakarya bagahaga cyangwa se mugafasha abirukanwa babuze za minerval.

2.Ese iki gikorwa aba bashumba bafashe akanya ko kugisengera basanga bihwitse ibyo bagiye gukora ? Cyangwa ni bwa bwoba bwahawe intebe mu Rwanda bubibakoresha? Twe turabona ko twagambaniwe nka Gahini yica Abeli basangiye ibere cyangwa Yuda agambanira Yezu.

3.Ese Musenyeri Smaragde Mbonyintege kuki atigana minisiteri y’uburezi ngo yegere ministri RWANGOMBWA John ngo nawe amusonere nkuko abalimu yabasoneye? Bityo abakristu bahumekeho kabili. Aha abaturage bibaza aho kiriya kigega gitangirira n’aho kigarukira bikabayobera.

4.Kuba umukristu bikwiye gusorerwa? Aha byaratuyobeye umukene umwatse n’utwo yacungiragaho ngo nibwo ugiye kumugira umukire? Ngayo amajyambere y’uru Rwanda.

5.Ese Musenyeri Smaragde ko atari yigisha ku mitungo ya FPR ikomeje kwirundaho? Ngizo indenge nziza za Kagame agendamo kandi Leta ikongera ikamwishyura, ngayo amahoteli ahenze araramo none ngo abatindi nyakujya ngo batange amafaranga mu Gaciro DF yo kujya kwica abatavuga rumwe n’ubutegetsi bahungiye i mahanga .

6.Ese Musenyeri Smaragde yaba azi abacunga kiriya kigega? Yaba azi gahunda gifitiye abanyarwanda? Ese ubundi Leta y’u Rwanda ayifasha ni agashami ka kiliziya gatulika? Koresha ubwenge wize mukure abaturage ku ngoyi mureke gukoreshwa n’ijwi rya Satani .

7. Ese Uretse gukora mu nkovu z’abakristu Musenyeri Smaragde ashobora gusobanurira abakristu uwahekuye kiliziya akica umunsi umwe abasenyeli batatu? Mgr Vincent NSENGIYUMVA, Thadée NSENGIYUMVA, Joseph RUZINDANA n’abandi bihayimana bagera kuri 15, na n’ubu ababishe bakaba bakigororerwa n’iyi ngirwa leta iri kutumaraho utwacu, tureke ibyo kuba bagihekeranye muri Bazilika y’i Kabyayi ntacyo bimubwiye? Kubashyingura mu cyubahiro ntacyo byari bivuze?

8.Ese ijwi ryanyu ryabaye ipfabusa ntacyo rikimaze? Imfungwa ziri kuborera mu buroko ko ntacyo muzivugaho:Deo Mushayidi, Victoire Ingabire, Me Ntaganda Bernard, Dr Niyitegeka Théoneste utanirengagije abasaseridoti bari kuri iyo ngoyi kandi muzi neza ko barengana. Abo bose bakeneye ubuvugizi bwanyu nyamara mwahisemo kwibera ibiragi ngo muzavugira nka Ildebrand KARANGWA gusa.

Nyakubahwa mushumba wa diyoseze ya Kabgayi mukaba n’umukuru w’inama y’abepisikopi mu Rwanda, intama mushinzwe kuyobora zirababaye agahinda ni kose kubera kubura ubuvugizi. Ese muracyavugira cyangwa mukarenganura abarengana? Iyo turebye ibihe tugezemo twibaza abo mukorera n’abo muvugira bikatuyobera. Ese musigaye mukorera FPR? Cyangwa FPR niyo isigaye ikorera kiliziya y’u Rwanda?
Umuco wo guhakirizwa si mwiza igihe ni iki ngo uwahekwaga yigenze, amafuti yakozwe n’agatsiko ka Kagame yaramenyekanye. Mwiminjiremo agafu mureke kuvugirwamo bityo mugarurirwe icyubahiro mwahoranye.

Bakristu bavandimwe ni musabire ku mana abashumba banyu kuko bari mu bihe bigoye.

Mugire amahoro y’Imana.

Umukristu wa Diyosezi ya Kabgayi