Amakuru ava i Bujumbura mu gihugu cy’u Burundi aravuga ko abantu 3 barimo abapolisi 2 bishwe abandi benshi barakomereka mu mugoroba wo ku wa gatanu tariki ya 1 Gicurasi 2015 mu bitero 2 bitandukanye byabereye rimwe.
Igitero cyaguyemo abantu cyabaye ahagana saa moya n’igice (19H30) isaha y’i Bujumbura, ahitwa mu Kamenge mu majyaruguru y’umujyi wa Bujumbura, kugeza ubu ako gace kakaba katari kararanzwemo intureka zo muri iyi minsi zatangiye ku cyumweru tariki ya 26 Mata 2015, ubwo abadashyigikiye ko Perezida Nkurunziza batangiraga imyigaragambyo nyuma y’aho ishyaka CNDD FDD riri ku butegetsi mu Burundi ryatangazaga nyuma ya Konger yaryo yo ku wa gatandatu tariki ya 25 Mata 2015 ko Petero Nkurunziza azarihagarira mu matora ya Perezida wa Repubulika ateganijwe muri Kamena uyu mwaka.
Nk’uko bitangazwa na Polisi y’u Burundi ngo abapolisi 2 bishwe undi umwe arakomereka mu Kamenge, umuturage utuye mu Kamenge yavuze ko uretse abo bapolisi ngo hanapfuye umuturage 1 abandi 2 barakomereka.
Nk’uko byatangajwe n’umukuru wa polisi mu Burundi André Ndayambaje, ngo muri uwo mugoroba uretse mu Kamenge ngo abapolisi batatu bakomerekeye mu mujyi hagati wa Bujumbura.
Umupolisi wo mu rwego rwo hejuru mu Burundi utashatse ko amazina ye atangazwa, yavuze ko abapolisi bari kw’irondo ku maguru batewe igisasu cya Grenade hagati ya saa moya na saa mbiri z’umugoroba mu Kamenge n’imodoka ya polisi yari ije gutabara nayo iraswaho. Muri ako kanya kandi ngo hatewe grenade na none ku bapolisi bari mu mujyi hagati i Bujumbura.
Umuturage wo mu Kamenge wabonye ibyabaye avuga ko byatangiye haterwa Grenade ku bapolisi 2 bari mw’irondo umwe ahita agwaho undi akomereka ku maguru iyo Grenade yakurikiwe n’amasasu menshi. Mu kanya gato Grenade yindi yaturikiye munsi y’imodoka y’umukuru wa polisi muri ako gace wari uje muri ako kanya atabaye, uwo mukuru wa polisi asohotse mu modoka yahise araswa agwa aho. Uwo muturage akomeza avuga ko umuturage umwe nawe yishwe n’amasasu naho umugore n’umwana bakomeretswa na Grenade ya kabiri yatewe ku modoka ya polisi.
Umunyamakuru wageze aho byabereye yabonye imyobo 2 yacukuwe na za Grenade ndetse n’amaraso menshi atari yakuma.
Umupolisi mukuru utashatse ko amazina ye ajya ahagaragara yashinje abigaragambya badashaka ko Perezida Nkurunziza akomeza kwiyamamaza ko ari bo bagabye ibi bitero. Yagize ati: ” niba bashaka intambara baraza kuyibona”
Igitangaje n’uko abibumbiye hamwe mu gutegura imyigaragambyo yo kwamagana Perezida Nkurunziza bari bamaze akanya gato batangaje agahenge k’iminsi 2 nta myigaragambyo bakaba bari basabye Perezida Nkurunziza gutangaza ko aretse kwiyamamaza bitarenze ku wa mbere tariki ya 4 Gicurasi 2015.
Nabibutsa ko uretse aba bapolisi bishwe iyi myigaragambyo imaze guhitana abantu 7 barimo n’umusirikare warashwe n’umupolisi naho abandi bantu benshi bakaba barakomeretse.
Ubwanditsi
The Rwandan
