Kuri uyu wa mbere tariki ya 12 Gicurasi 2014, Capitaine Innocent Sagahutu wari ufungiye Arusha ku rukiko mpuzamahanga ku Rwanda yarekuye igihano cye kitarangiye kuko ubundi yagombaga kurekurwa mu ntangiriro za 2015.
Muri Gashyantare uyu mwaka  urugereko rw’ubujurire rw’urukiko rw’Arusha rwagabanyirije igihano Capitaine Innocent Sagahutu wari umwe mu bayobozi ba Bataillon de reconnaissance. Imyaka 20 yari yarakatiwe yaragabanijwe ishyirwa kuri 15. Amaze guhanagurwaho urupfu rw’uwari Ministre w’Intebe Agathe Uwiringiyimana. Ariko yarezwe ngo kuba ntacyo yakoze ngo abuze abasirikare yayoboraga kwica abasirikare 10 b’ababiligi. Sagahutu mu myaka yakatiwe hakuwemo 14 amaze afungiye Arusha.
Capitaine Innocent Sagahutu yavukiye mu cyahoze ari Komini Gisuma muri Cyangugu mu 1962, yarangije mu ishuri rikuru rya gisirikare ry’i Kigali (ESM) mu 1986 muri Promotion ya 22, ahita yoherezwa gukorera muri Bataillon de reconnaissance muri Camp Kigali. Yize ibyo kurwanisha za Burende ahitwa i Mbanza-Ngungu mu cyahoze ari Zaïre. Nyuma y’igitero cy’ingabo za FPR mu 1990. Sagahutu wari Lieutenant icyo gihe yitwaye neza ku rugamba aho yoherezwaga hose cyane cyane mu Mutara ku buryo yahawe ipeti rya Capitaine mbere y’igihe. Muri Mata 1994, yategekaga Escadron A ya Bataillon de reconnaissance yabaga muri Camp Kigali, za Burende yayoboraga zarwanye ku mujyi wa Kigali kugeza mu kwezi kwa Nyakanga 1994, ingabo zose za FAR zisohotse mu mujyi wa Kigali.
Capitaine Sagahutu arekuwe akurikira abandi basirikare benshi ba FAR bagizwe abere (Gen I.G. Kabirigi, Gen BEM Ndindiriyimana, Major BAM Nzuwonemeye..) n’abarekuwe barangije igihano bahawe (Lt Col BEMS Nsengiyumva, Lt Col Muvunyi..)
Ubwanditsi
The Rwandan
